Fakatokatoka Fakahako e Kupu he Atua
1 He fakamatala ke he fekafekau ne mua ne “tala age ai a Filipo, kua kamata he tohi ia kua fakamatala atu kia ia e tala mitaki kia Iesu.” (Gahua 8:35) Ko Filipo “kua fakatokatoka fakahako e kupu moli.” (2 Timo. 2:15) Ke he vaha nei, pete ia, kua mailoga he tau leveki faifano e tokologa he tau tagata fakailoa kua lavea ke fakaaoga e Tohi Tapu ka fakamatala. Fakaaoga nakai e koe e Tohi Tapu he fekafekauaga hau?
2 Ko e Kupu he Atua e punaaga he tau mena oti ne talitonu mo e fakaako atu e tautolu. (2 Timo. 3:16, 17) Ko e mena ia ne futia aki e tau tagata ki a Iehova mo e fakaako a lautolu ke lata mo e moui. Ko e kakano haia ne aoga kia tautolu ke fakaaoga e Tohi Tapu he fekafekauaga ha tautolu ka e nakai tala noa ke he tau mataulu tala kua fiafia a tautolu ki ai. (Hepe. 4:12) Ha kua tokologa e tau tagata ne tote e iloaaga ke he Tohi Tapu, kua lata ia tautolu ke totou mai i ai ke fakakite ki a lautolu e tau takitakiaga aoga ne foaki mai i ai mo e vaha anoiha ne fakatoka mai ma e tau tagata.
3 Totou Fakahako Mai he Tohi Tapu: Liga lali a koe ke fano ke he gutuhala mo e nakai fai kato fakamatala. Liga tuku e koe e tau tohi fakaaoga ne amanaki ke foaki he tama kato paka mo e toto e Tohi Tapu he lima po ke tuku he kato tapulu. Ti, ka tutala a koe mo e tagata, maeke ke aaki mai e Tohi Tapu mo e nakai fakafuafuakelea ke he tagata ke tuga kua lali a koe ke talahau he lauga. Tu a koe ke he puhala kua maeke he tagata fanogonogo hau ke muitua fakalataha ke he Tohi Tapu hau. Liga ole foki ki a ia ke totou fakalahi mai e taha kupu. To fai lauiaaga mitaki ka kitia e ia e mena ne talahau mai i loto he Tohi Tapu ka e nakai he logona noa ni mai ia koe. Moli, ke lagomatai a ia ke maama e kakano he kupu tohi, peehi e tau kupu ne talahau e manatu.
4 Fakataitai he Taha e Kupu Tohi Tapu: Mole e fakafeleveia hau, liga pehe a koe: “Ne kumi e tau tagata ke he tau punaaga kehekehe ma e takitakiaga he tau momoui ha lautolu. Ko e heigoa ne logona e koe ko e punaaga mitaki lahi ma e takitakiaga aoga? [Fakaata ma e tali.] Ko e heigoa e manatu hau ke he talahauaga nei? [Totou Tau Fakatai 2:6, 7, ti fakaata ma e tali.] Ko e iloilo he tagata kua fakamoli ai kua fakaatukehe he gatigati, hane takitaki e tau tagata tokologa ke fakaatukehe. Ko e iloilo he Atua, mogoia, kua fakamoli tumau ke fai falanakiaga mo e aoga.” Ti fakakite e tohi hau ne fa e fakaaoga, mo e talahau mai i ai taha e fakafifitakiaga he iloilo aoga he Atua.
5 Ne fakaaoga e Iesu e tau Tohiaga Tapu ke lagomatai a lautolu ne loto fakamoli. (Luka 24:32) Ne fakamoli e Paulo faka-Tohi Tapu e tau mena ne fakaako e ia. (Gahua 17:2, 3) Ko e mauokafua mo e olioli ha tautolu ke he fekafekauaga to tupu lahi ai he eketaha a tautolu ke fakamahani fakalahi ke fakatokatoka fakahako e Kupu he Atua.