Fakamonuinaaga he Fakakite e Fakaaue ke he Fakaalofa a Iehova—Vala 2
1 He mahina kua mole hagaao ke he matakupu nei, ne fakakite e tautolu ko e fa e puhala ke fakakite e tautolu e fakaaue ma e fakaalofa ha Iehova ke he fekafekauaga. (1 Ioane 4:9-11) Mogonei to lafi ki ai lima foki e puhala ke taute e mena nei. He fakalataha katoa a tautolu ke lagomatai fakaagaga e falu, kua fakamonuina a tautolu.
2 Fakaaoga e Magaaho he Tau Magaaho ke Fakamatala: Hanei e mogo kua lauia mitaki ke kumi e tau tagata kua hogeia mo e fia inu ma e mahani tututonu mo e foaki e tau tohi ke lagomatai a lautolu. Mitaki lahi ke ‘fakaaoga e tau aho he mouiaga nai’ ke fakamatala tumau mo e ke he ha tagata he tau tagata ne feleveia mo tautolu. (Efeso 5:16) Ko e magaaho anei kua lata ke fakamalolo fakalahi a tautolu ke fakaaoga e puhala nei ke fakamatala, nukua fakaaue a tautolu ke he fakaalofa he Atua mo e tau manako he tagata, to fakaaoga e tautolu e magaaho he tau magaaho ke fakamatala tumau.—2 Timo. 1:7, 8.
3 Taha e misionare kua fakamonuina fakalahi he fetutalaaki mo e tagata ne o atu tokoua he tekesi. Ne fanogonogo e tagata. Kua liliu aahi atu kia ia, ati kamata ai e fakaakoaga Tohi Tapu. Ne hu mai e tagata ia ke he kupu moli mo e fakatolomaki atu ke eke mo taha motua he fakapotopotoaga!
4 Kia Tohitohi: Ka e liga nakai maeke ia tautolu ke o atu he taha fale ke he taha fale ha kua nakai malolo e tino po kua kelea e matagi. Maeke ia tautolu he tohitohi, ke tohi e tohi fakaku ke fakamatala atu ke he tau tagata ne mahani mo tautolu mo e fakahu, kia lautolu ne maanu ha kua mate e taha ha lautolu ne ofania, po ko lautolu ne nakai nonofo i kaina ka o atu he fonua. Maeke ia tautolu ke humaki e tuleke mo e ha i ai e maveheaga fakave ke he Tohi Tapu mo e fakamafana atu e tagata ke matutaki mai kaeke fai huhu a ia. Fakaaoga e matahigoa he kaina hau po ke he Fale he Kautu; ka e fakamolemole, aua fakaaoga e matahigoa kaina he la ofisa.
5 Fakamatala he Telefoni: Ko e puhala homo lahi anei ke moua e tau tagata ne uka ia tautolu ke feleveia he gahua taha fale ke he taha fale. Kaeke taute mo e lotomatala, mo e mahani totonu, fakatekiteki, mo e fakailoilo, to moua e tautolu e tali mitaki lahi. Fakatoka ai he Fepuari 2001 Ha Tautolu a Fekafekauaga he Kautu, lau 5-6, e tau puhala lauia mitaki ke moua mai e tau fua mitaki.
6 He fakaaoga he matakainaga fifine e telefoni ke fakamatala, ne huhu age a ia ke he taha fifine po kua manamanatu nakai a ia ke he tau mena anoiha ka tutupu ki a ia mo e hana magafaoa. Tala age e fifine kua manamanatu tuai a ia. Ati talahau e ia ha ko e hana a fakaatukehe, kua vevehe kehe e ia a ia he kaina hana. Amohia ha ko e fakaalofa he matakainaga fifine, ne talia e fifine ke fakalataha mo ia he makete ne tata ki a ia. Ne fua mai, kua talia agataha he fifine e fakaakoaga Tohi Tapu!
7 Fakafeleveia e Tau Tagata Kehe: Kaeke fakaalofa a tautolu ke he tau katofia ha tautolu, to mataala a tautolu ke mailoga e tagata kehe ka ahi mai ke he feleveiaaga ha tautolu mo e fakafeleveia fakamafana a ia. (Roma 15:7) Fakakite age kua hau a ia ke he tau tagata ne fiafia moli ke he moui fakaagaga hana. Ko e fakaalofa moli ha tautolu mo e foakiaga he fakaakoaga Tohi Tapu fakatagata nukua maeke ke omoi a ia ke talia e lagomatai ha tautolu.
8 Mahani Mitaki ha Tautolu: He mahani mitaki ha tautolu, kia fakalilifu e tautolu e kupu moli. (Tito 2:10) Kaeke talahau he tau tagata he lalolagi e tau mena mitaki ha ko tautolu ko e Tau Fakamoli a Iehova, to fakaheke atu ai e lautolu ha tautolu a Atua. (1 Pete. 2:12) Ko e mena foki anei ka eke lagomatai e falu ke kamata atu he puhala he moui.
9 Ane ha he liu fatiaki e tau puhala lima nei ke fakakite e fakaaue ha tautolu ma e fakaalofa mua ue atu ha Iehova ma tautolu mo e fakagahuahua ai? (1 Ioane 4:16) Ka taute pihia e koe, to helehele e koe e tau fakamonuinaaga.