Fakamonuinaaga he Fakakite e Fakaaue ke he Fakaalofa a Iehova​—Vala 1

¹ Kua tohia he aposetolo ko Ioane: “Kua fakaalofa a tautolu, ha ko e mena ne fakamua mai [e Iehova e] fakaalofa kia tautolu.” (1 Ioane 4:19) He manamanatu hifo a tautolu ke he tau mena katoa ne foaki e Iehova ma tautolu, ne omoomoi a tautolu ke fakakite e fakaaue hokulo ke taui ai. Fakatoka e Iesu e fakafifitakiaga ke taute e mena nei ha kua fakamatala mo e omaoma ke he higoa he Atua mo e Kautu. (Ioane 14:31) Aoga lahi ma tautolu ke kikite e falu puhala kua maeke ia tautolu ke fakakite e fakaaue ma e fakaalofa a Iehova mo e tau fua ne moua ai.

² O Atu he Taha Fale ke he Taha Fale: Fakaako age e Iesu e puhala ma e tau tutaki hana ke taute e gahua fakamatala he Kautu. Ne kitia maali he tau talahauaga hana na o atu a lautolu he taha fale ke he taha fale, ke fakamatala e tala mitaki. (Luka 9:1-6; 10:1-7) Ko e fakaalofa ke he Atua mo e katofia ne omoi a tautolu ke o atu tumau he taha gutuhala ke he taha gutuhala he mogoia ne fakafehagai a tautolu mo e mahani fakateaga mo e taufetoko. Ka e mai he mena ia, kua aoga fakatagata a tautolu ha kua fakamalolo e tua ha tautolu, ne katoa e mitaki ha tautolu, mo e fakakikila e amaamanakiaga ha tautolu.

³ Ha kua takitaki he tau agelu e gahua, ne moua e tautolu e tau tagata tokologa kua hogeia mo e fia inu he kupu moli. (Fakakite. 14:6) Kua talahau he tau tagata ko e liogi a lautolu ma e lagomataiaga he mogoia ne hoko age e taha Fakamoli ke he gutuhala ha lautolu. Tokoua e Tau Fakamoli mo e taha tama tote ne o atu he taha fale ke he taha fale he aelani Caribbean. Ne fifili he tau tagata lalahi ke fakaoti e gahua ha laua ma e aho ia, ka e finatu tokotaha e tama ke he gutuhala ti nokonoko. Ati hafagi he fifine e gutuhala. Ne kitia he tau tagata lalahi e mena nei, ti o atu a laua ke tutala mo ia. Kua uiina e ia a lautolu ke he fale ti tala age e ia ko e oti la ia e liogi hana ke he Atua ke fakafano age e Tau Fakamoli ke fakaako Tohi Tapu mo ia!

⁴ Fakamatala ke he Puhalatu: Ha kua uka lahi ke moua e tau tagata i kaina he falu matakavi, kua lauia mitaki ke fakamatala he tau puhalatu ke he tau tagata. Lafi atu, tokologa ne nonofo he tau maaga ne puipui lapatoa e tau gutuhala po ke tau poko fale tokoluga ne nakai maeke ia tautolu ke o atu he taha gutuhala ke he taha gutuhala. Ko e mena ia, ko e fakaaue ha tautolu he fakaalofa a Iehova ne omoomoi a tautolu ke fakaaoga e tau magaaho oti ke matutaki mo e tau tagata e fekau he Kautu, pihia foki ka fakamatala he tau puhalatu.​—Fakatai 1:20, 21.

⁵ Ke Liliu Aahi Atu: Ha kua kumikumi a tautolu ki a lautolu “ne loto holoilalo,” manako ia tautolu ke fakamakona e manako ia. (Mata. 5:3) Ko e mena nei ne liliu a tautolu ke fakamalu e tau tega he kupu moli ne to e tautolu. (1 Kori. 3:6-8) Ne tokai he matakainaga fifine i Ausetalia e tuleke mo e fifine ne nakai tuga ke talia. Ka e, ne lali fakamakamaka e matakainaga fifine ke liu moua a ia ki kaina. He mogo ne liu moua a ia, kitia he matakainaga fifine ha tautolu mai he mogo fakapa ne feleveia, kua fakatau he fifine e Tohi Tapu tau uka. Ne kamata he matakainaga fifine e fakaakoaga mo e fifine!

⁶ Taute he Tau Fakaakoaga Tohi Tapu: Ko e fahi anei ne fiafia lahi mo e palepale mitaki he fekafekauaga ha tautolu. Ko e fakamonuinaaga ha ia ke lagomatai e tau tagata ke iloa a Iehova, ke kitia e faliuaga he tau momoui ha lautolu ke fakafiafia aki a ia, mo e onoono atu he papatiso a lautolu he tukulele e tau momoui ha lautolu ke he Atua!​—1 Tesa. 2:20; 3 Ioane 4.

⁷ He tala ke mui mai, to kikite fakalahi atu e tautolu e tau puhala kua fakamonuina a tautolu ha kua fakakite e fakaaue ma e fakaalofa a Iehova.