Olioli Fakalataha mo Iehova mo e Hana Tama
Ko e Fekau Aoga Lahi he Tau ka Fakamanatu ia Mati 28
1 He fakamanatu e Kaiaga Afiafi he Iki he mole e toaga la ia Mati 28, 2002, kua fakatata e tautolu e fakalatahaaga olioli mo Iehova ko e Atua mo Iesu Keriso. He magaaho aoga pauaki ia, ko lautolu e tau Kerisiano fakauku ne toe ka olioli e “fakafetui” pauaki kua ha ha ia lautolu mo e falu he tau hakega he Kautu, fakalataha mo e Matua, mo e hana Tama. (1 Ioa. 1:3; Efeso 1:11, 12) Totou miliona e ‘tau mamoe kehe’ ka fakaata e magaaho homo ue atu ha lautolu ke fakalataha mo Iehova mo e hana Tama, ko e loto taha mo e manamanatuaga mo lautolu he fakakatoatoa e gahua he Atua!—Ioane 10:16.
2 Gahua Auloa he Fakafetuiaga Tata: Ha ha tumau ia Iehova mo Iesu e fakalatahaaga olioli. Ne leva lahi e feoakiaga tata ha laua ato tufugatia e tagata. (Mika 5:2) Ko e pipiaga hokulo he fakaalofa hohofi ne kamata he vahaloto ha laua tokoua. He fakatino mai e pulotu, ko e Tama uluaki nei he hana a tino fakamua nukua talahau ai: “Ti ha ha i ai au mo ia, ko au [Iehova] ko e tufuga; ne eke foki au mo fiafia hana ke he taha aho mo e taha aho; ne olioli mau au ki mua hana ke he tau aho oti ni.” (Fakatai 8:30) He fakaaoga e tau tau loga he feoakiaga tata mo e Punaaga he fakaalofa ne lauia lahi e Tama he Atua!—1 Ioa. 4:8.
3 Fakalataha mo e tokaloto e lata he tagata ma e fakamagaloaga, ne fifili e Iehova hana Tama fuataha hokoia, nukua fakaalofa moli a ia ke he tau tagata ke foaki e poa lukutoto, nukua foaki e amaamanakiaga hokoia ma tautolu. (Fakatai 8:31) Tuga ni e kaufakalataha ha Iehova mo e hana Tama he fakahoko e finagalo taha, kia kaufakalataha foki a tautolu mo laua mo e falu he tau pipiaga he fakaalofa malolo mo e olioli he taute e finagalo he Atua.
4 Fakakite e Fakaaue ha Tautolu Mai he Loto: He fakalataha ke he Fakamanatuaga mo e fanogonogo fakamatafeiga mo e fakalilifu, maeke ia tautolu ke fakakite e fakaaue moli ma e fakaalofa ha Iehova mo e poa he hana Tama ma tautolu. Ke fakamaama ai e fakafifitakiaga fakaalofa ha Iesu, ko e hana a mahani fakamoli ke hoko ke he mate he foaki e lukutoto, mo e hana pule ko e Patuiki he Kautu ne fakatu he Atua, ti pihia mo e tau monuina ka tamai he Kautu ke he tau tagata. To fakamanatu mai foki ki a tautolu e lata ke fakakite tumau e tua ha tautolu, he gahua fakamakai ke fakalautatai mo e finagalo ha Iehova ko e “tau lagomatai ke he kupu moli.”—3 Ioa. 8; Iako. 2:17.
5 Lagomatai e Falu ke Fakalataha mo Tautolu: Ko e kau he tau motua kua lata ke taute e laliaga pauaki ke fakamalolo e Tau Fakamoli lolelole oti he matakavi ke fakalataha mai ke he Fakamanatuaga he mate he Keriso. (Mata. 18:12, 13) Tohi hifo e tau higoa ha lautolu ka ahi atu ki ai ke nakai nimo taha mo e hoko tino atu ke uiina oti a lautolu.
6 Iloa nakai e koe e falu ka liga ke o mai ke he Fakamanatuaga? Fakailoilo ke ati hake e fakaaue ha lautolu ma e magaaho nei. Uiina mafanatia a lautolu, ti fakafeleveia atu ki a lautolu. Kia eketaha a tautolu ke uiina ke he magaaho aoga lahi nei he tau, e tau tagata fakaako Tohi Tapu ha tautolu mo e falu tagata fiafia, ti pihia mo e tau tagata he magafaoa mo e tau kapitiga mahani. Ko e aoga he lukutoto kua hafagi agaia ki a lautolu kua ako e “mitaki mua ue atu he iloa a Keriso Iesu.” (Filipi 3:8) Ko lautolu kua fakagahuahua e tua ke he poa he Keriso ka maeke ke moua e amaamanakiaga malolo he moui tukulagi.—Ioane 3:16.
7 Aua neke fakateaga ke he malolo nukua ha ha he Fakamanatuaga ki a lautolu ne fakamoli. Ua e tau kua mole he motu ko Papua New Guinea, 11 e tagata fiafia ne fenoga he poti tote ke 17 e tula he tahi loka ke maeke ke fakalataha ai. Ko e ha? Ne pehe a lautolu: “Manako a mautolu ke fakamanatu e Fakamanatuaga he Keriso mo e tau tagata tapuaki oti ha Iehova; ti kua aoga lahi e fenoga.” Manamanatu la ke he fakamakai ne fakakite e lautolu ne fiafia mo e ha lautolu a fakaaue he olioli fakalataha mo Iehova, hana Tama, mo e tau matakainaga Kerisiano!
8 Foaki e fakaakoaga Tohi Tapu ki a lautolu oti ne fiafia. Fakamalolo a lautolu ke fakalataha tumau ke he tau feleveiaaga he fakapotopotoaga mo e ke talahau ke he falu e tau kupu moli hane ako e lautolu. Lagomatai a lautolu ke ‘eke e tau mahani he maama’ he fakaaoga e tau matapatu fakaakoaga he Tohi Tapu ke he tau momoui ha lautolu. (1 Ioa. 1:6, 7) Lagomatai a lautolu ke feaki e fakafetuiaga tata mo Iehova mo e fakatumau ke tupu e fakaaue ma e kotofaaga he taute auloa hana finagalo.
9 Ko e kotofaaga homo ue atu ha a ia ke olioli auloa “mo e loto fakalataha, mo e manatu fakalataha, mo e fakamakamaka fakalataha ha ko e tua ha he vagahau mitaki”! (Filipi 1:27, 28) Kia amaamanaki lahi a tautolu he onoono atu ke he fakafetuiaga fiafia ha tautolu he Fakamanatuaga ia Mati 28, ke fakaaue tumau ki a Iehova mo e hana Tama!—Luka 22:19.