Fakapotopoto e Tau Tagata Mai he Tau Vagahau Kehekehe
1 Kua fakamoli e Kupu he Atua! Ko e tau tagata mai he “tau vagahau oti he tau motu kehe” hane talia e tapuakiaga moli. (Saka. 8:23) Lagomatai fefe he Tau Fakamoli a Iehova e tau tagata mai he ‘tau motu, tau faoa, mo e tau vagahau’ oti kana, ke he tuaga mea ki mua ha Iehova, fakalataha mo e amaamanakiaga ka hao mai “he matematekelea lahi”?—Fakakite. 7:9, 14.
2 Talia he Fakatokatokaaga he Atua: Kua fakatoka he Kau Fakatufono ma e tau tohi faka-Tohi Tapu ke moua ke he kavi ke 380 e vagahau ke maeke he tau tagata he lalolagi oti ke maama mitaki e alito he tala mitaki. Ko e tauteute mo e lomi he tau tohi ke he loga he tau vagahau ko e gahua makimaki. Kua putoia e tau matakau he tau tagata fakaliliu kua lata mo e foaki ki a lautolu e lagomataiaga kua maeke ia lautolu ke fakaliliu e tau tohi ha tautolu ke he tau vagahau nei, ti lomi mo e fakahu ai. Ko e ute he gahua, kua taute ai he tau tagata fakailoa takitaha he Kautu, nukua uta e fekau fakahao moui he Tohi Tapu ke he tau tagata.
3 Talia e Paleko: Ko e lahi he puke tagata vagahau motu kehe kua moua mogonei ke he tau matakavi loga. Ke hokotia ke he tau tagata nei mo e tala mitaki, ko e numera he tau fekafekau he Atua kua lali ke ako e tau vagahau ne fakaaoga ke he tau matakavi nai, tuga e vagahau Niue, Saina, Samoa, mo Tonga. Kua ako he falu e Vagahau Matalima. He la matakavi ha Niu Silani ha ha i ai 18 e fakapotopotoaga mo e 5 e matakau hane fakamatala ke he 8 e vagahau kehe. Ko e falu ne nakai la iloa ia a Iehova po ke nakai fai iloaaga ke he Tohi Tapu hane talia e kupu moli he Kupu he Atua.—Roma 15:21.
4 Maeke nakai ia tautolu ni ke eketaha fakalahi ke fakapuloa e tala mitaki ke he tau tagata he fonua ha tautolu ne o mai he taha motu kehe? (Kolo. 1:25) Loga e tau fakapotopotoaga hane fakatokatoka e gahua fakamatala ke he ha lautolu a tau matakavi vagahau kehe. Kua ako mua he tau tagata fakailoa e lahi he vagahau ke foaki e fakatutalaaga mukamuka, tuga e: “Fakaalofa atu. Hanei e tala mitaki ma hau. [Ti foaki e tuleke po ke porosua kua fai ke he vagahau ia.] Ko e kia.” Hane fakamonuina moli e Iehova e tau tamataaga ikiiki pihia!
5 Kua alaala e fekau he Kautu ke he tau tagata he tau tutupuaga mo e tau vagahau oti kana. Kia fakaaoga e tautolu e magaaho ke talahau atu ai ke he falu.