Kia Nonofo Fakalatalata ha kua Tata Mai e Fakaotiaga
1 Kua fakamaama tumau he Kupu he Atua e aho a Iehova hane hau ‘tuga e tagata kaiha’—ko e fakaofo, fakamafiti, mo e fakatotomo. (1 Tesa. 5:2; Mata. 24:43; 2 Pete. 3:10; Fakakite. 3:3; 16:15) “Ko e mena ia,” he talahau e Iesu, “kia nonofo tauteute ai a mutolu; ha ko e magaaho nakai manatu ai e mutolu, ke hau ai e Tama he Tagata.” (Mata. 24:44) Fakatumau fefe e tautolu e mataala fakaagaga ha tautolu he tata mai e fakaotiaga? Ko e kei kua moua he tomatomaaga he agaga: “Kia nonofo fakalatalata.”—1 Pete. 4:7.
2 Ko e nonofo fakalatalata kua putoia e onoonoaga ke he tau mena mai he tuaga ha Iehova. (Efeso 5:17) Kua lagomatai a tautolu ke kitia a tautolu ko e “tau tagata paea mo e tau tagata kehe” he lotouho he fakatokaaga nei. (1 Pete. 2:11) Kua fakamalolo a tautolu ke manamanatu ke he mena kua aoga moli, ke fakatoka e tau mena kua mua, mo e taute e tau fifiliaga mitaki.—Filipi 1:10.
3 Fakatoka e Tau Foliaga Fakaagaga: Ko e fakatoka mo e moua e tau foliaga fakaagaga kua lagomatai a tautolu ke nonofo fakalatalata. Fai foliaga fakaagaga nakai a koe hane fa e lali ki ai mogonei? Hane lali nakai a koe ke totou e Tohi Tapu he tau aho oti, fina atu ke he tau feleveiaaga Kerisiano oti, totou e tau lagaki takitaha he Ko e Kolo Toko mo e Awake!, po ke liga fakalahi e gahua hau ke he fekafekauaga? Ka fakatoka e koe e tau foliaga kua hako ma hau, eketaha he tutuli ki ai, ti ole ki a Iehova ke fakamonuina e tau laliaga hau, to liga ofo a koe ke he tau fua.
4 Ne huhu e motua ke he hoa mau fuata hagaao ke he tau foliaga fakaagaga ha laua. Kua taute he huhu a laua ke mailoga kaeke ke fakamukamuka e laua e moui ha laua mo e fakaoti e kaitalofa mamafa, to maeke ia laua ke paionia. Kua fifili a laua ke taute e foliaga ia ma laua. Ne totogi fakamakai e laua e kaitalofa ti kumi puhala ke fakatote hifo e tau gahua nakai aoga ne fofo e tau magaaho mo e tau malolo ha laua. He tu e tau taha, ne hokotia a laua ke he foliaga ha laua. Ti ko e heigoa e fua? Kua pehe e tane: “Ane mai nakai fai foliaga nakai hokotia a maua ke he tuaga pehenei mogonei. Kua fiafia lahi a maua. Kua totoka mo e laukauka e moui ha maua. Kua fai kakano mo e fai amaamanaki moli ai.”
5 He tatali a tautolu ke he aho a Iehova, kia fakatumau e mataala fakaagaga ha tautolu he nonofo fakalatalata, he hagaaki mau ke taute e finagalo he Atua.—Tito 2:11-13.