Lagomatai he Magaaho kua Lata Ai
1 He magaaho ne mailoga he aposetolo ko Peteru e latatonu ke fakamalolo e tau matakainaga talitonu, ne fakaohooho he kapaletu hana a ia ke fakamanatu fakaalofa mo e fakamafana age a lautolu. (2 Pete. 1:12, 13; 3:1) Ne ole a ia ki a lautolu ‘kua moua e tua’ ke fakatumau ke tupu ki mua e tau fua fakaagaga ke “nakai teva, po ke teao ke he maama mitaki ke he Iki ha tautolu ko Iesu Keriso.” (2 Pete. 1:1, 5-8) Ko e kakano ha Peteru ke lagomatai a lautolu ke tumau fakamoli ke he uiaga mo e fifiliaga nukua moua e lautolu mai ia Iehova, ke liga moua a lautolu “kua nakai fai ila, mo e nakai talahaua kelea.” (2 Pete. 1:10, 11; 3:14) Ke he tokologa, ko e fakamafanaaga hana kua lagomatai lahi he magaaho kua lata ai.
2 Ke he vaha nai, ko e tau leveki Kerisiano kua manamanatu pihia foki ke he tau tagata he Atua. Ke he “tau aho fakamui to hohoko mai ai e tau aho uka,” ti kua tokologa e tau fekafekau ha Iehova hane taufetului ke fakauka mai he tau tutuaga matematekelea uka. (2 Timo. 3:1) Ha ko e matematekelea fakatupe, fakamagafaoa, po ke fakatagata, ko e falu kua tatai e tau logonaaga mo Tavita: “Ha kua agaagai au he tau mena kelea kua nakai maeke he totou; kua moua au he haku a tau hala, kua nakai maeke ai au ke kitekite; kua loga, ka e gahoa haku a tau lauulu, kua oti haku a manava.” (Sala. 40:12) Maeke e tau matematekelea nai ke mamafa lahi ke he falu ti liga fakatikai e lautolu e tau mena fakaagaga ti oti e fakalataha makaukau ke he tau fekafekauaga Kerisiano. Moha ia, pete ha lautolu a tau matematekelea, ne ‘nakai nimo e lautolu e tau poaki ha Iehova.’ (Sala. 119:176) Ko e magaaho tonu anei kua lata he tau motua ke foaki e lagomatai kua lata ma lautolu ia.—Isaia 32:1, 2.
3 Ke fakamoli e manako nai, kua fakamafana ke he tau motua ke taute taha laliaga pauaki ke lagomatai a lautolu kua nakai fakalataha ke he gahua fakamatala he magaaho nai. Ko e laliaga fakamakamaka pihia hane fa e taute he magaaho nai mo e to hoko atu ke he mahina a Mati. Kua ole ke he tau leveki fakaakoaga tohi ke ahiahi ki a lautolu kua lolelole ke foaki e lagomatai fakaagaga mo e onoonoaga ke lagomatai ke liu matutaki ha lautolu a tau gahua mo e fakapotopotoaga. Ka manako lagomatai, to maeke ke fakatoka e fakaako Tohi Tapu fakatagata. To liga ole ke he falu ke lagomatai ai. Ka uiina a koe ke lagomatai, ko e tau laliaga hau kua aoga lahi, mua atu ka foaki e koe e fakamafanaaga ke he puhala totonu, mo e maama.
4 Kua fai kakano a tautolu oti ke olioli he magaaho ka liu matutaki e taha mo e tau gahua he fakapotopotoaga. (Luka 15:6) Ko e ha tautolu a tau laliaga ke lagomatai a lautolu ne lolelole to liga fua mai moli “ko e tau kupu kua vagahau mo e lata ai.”—Fakatai 25:11.