Lata ke Fakaheke Fakalahi ki a Iehova
Ko e Kaiaga Afiafi he Iki ka Fakamanatu ia Aperila 16
1 Kua amaamanaki lahi mahaki he gutu atu a tautolu ki a Aperila 16, 2003. He po ia to fakamanatu e tautolu e mate ha Iesu, he fakalataha auloa e tau miliona he tau matakainaga tapuaki he lalolagi katoa ke fakaheke e higoa ha Iehova. Kua lata a Iehova mo e fakahekeaga katoatoa ha tautolu ma e foakiaga homo ue atu he lukutoto. Puhala mai ai, to foaki e ia e tau monuina ue atu ke he tau tagata omaoma oti. Kua fakalataha loto katoa a tautolu mo e salamo he kalaga: “Kua homo atu a Iehova, ti lata ke fakaheke fakalahi kia ia.”—Sala. 145:3.
2 Ko e magaaho anei ma e manamanatu fakahokulo ke he mahani mitaki he Atua mo e kaitalofa he fakaaue kua ha ha ia tautolu ki a Iehova he fakafano mai “hana Tama fuataha ke he lalolagi, kia momoui a tautolu kia ia.” (1 Ioane 4:9, 10) He kitekite mo e omaoma ke he Kaiaga Afiafi he Iki kua nava ke he tau loto ha tautolu ha kua “fakaalofa noa mai a Iehova, mo e fakaalofa hofihofi noa . . . ti lahi ni hana fakaalofa.” (Sala. 145:8) Moli, ko e lukutoto ko e fakakiteaga makimaki ha Iehova he fakaalofa ke he tau tagata oti kana. (Ioane 3:16) Ka fakaata e tautolu e fakaalofa he Atua mo e manamanatu ke he puhala tua fakamoli ha Iesu he mahani fakamoli, kua omoi a tautolu ke fakaheke ki a Iehova. Ke hoko ke he tukumalagi, to fakaheke e tautolu a ia ha ko e hana fakaalofa lahi ne fakakite he taute e moui tukulagi ke moli ma tautolu.—Sala. 145:1, 2.
3 Lagomatai e Falu ke Fakaheke a Iehova: Ko e loto fakaaue ma e mena fakaalofa mua ue atu he Atua he lukutoto kua omoi a tautolu ke uiina e falu ke fakalataha mo tautolu he fakaheke a Iehova. Ne omoomoi e salamo ke tohi: “To talahau atu e lautolu e fakamanatuaga he hāu a mahani mitaki lahi; to kalaga fiafia foki a lautolu ha ko e hāu a tututonu.” (Sala. 145:7) He tau kua mole hokoia, ne foaki he Tau Fakamoli a Iehova he lalolagi katoa molea e piliona he tau tula ke he gahua fakamatala. Ko e heigoa ne fua mai he tau gahua ha lautolu? He tau fahi tapu takitaha, ne avelesi ke molea e 5,100 ia lautolu ne papatiso he fakamailoga ha lautolu a tukuleleaga ki a Iehova. Ko e 15,597,746 e katoatoa ne o atu ke he Fakamanatuaga, putoia ai molea e hiva e miliona ne nakai la kamata ke fakaheke a Iehova ko e tau tagata fakailoa he tala mitaki, ti kua amaamanaki atu ke he tupu ki mua! Ko e tau tagata fakapuloa he Kautu, kua tokiofa e tautolu e kotofaaga ke fakapuloa e tala mitaki mo e hiki atu e tau loto he falu ki a Iehova, hana Tama, mo e Kautu.
4 Ko e puhala mitaki ke fakamalolo e falu ke fakalilifu a Iehova ke uiina a lautolu ke fakalataha mai mo tautolu he fakamanatu e Kaiaga Afiafi he Iki. Kua tohi hifo nakai e koe a lautolu ne manako a koe ke uiina mo e falu foki kua lata ke fakamanatu ki ai e aho mo e tula? Kua age nakai e koe e uiina ki a lautolu oti ne tohi hifo e koe? Ka nakai, ti fakamakai ke taute pihia ke he vala magaaho ne toe. Lagomatai a lautolu ke fakaaue ke he kakano he fakamanatuaga. He fakalatahaaga, kia matakaki ke feleveia mo e tau tagata ahiahi mai. Fakafeleveia fakamitaki a lautolu, uta ke feleveia ke he falu, ti nava atu ha kua fakalataha mai a lautolu.
5 Ko e o atu ke he Fakamanatuaga kua maeke ke fakalagalaga a lautolu ne fou ke tupu ki mua fakaagaga. Ko e tagata fakaako Tohi Tapu kua matematekelea he fakaagitau e manamanatuaga, nukua uka lahi mahaki ke fano ke he tau toloaga, ne hau ke he Fakamanatuaga. Ne huhu atu ko e heigoa hana manatu ke he feleveiaaga, ne pehe a ia: “Ko e po kua mua atu e lilifu, ti ko au i ai.” Tali mai ai, ne kamata a ia ke fano ke he tau feleveiaaga.
6 He Mole e Fakamanatuaga: Ko e heigoa ka taute ke lagomatai a lautolu kua fiafia ke eke mo tau tagata fakaheke ha Iehova? To tohi hifo he tau motua a lautolu ne fou kua o atu ke he Fakamanatuaga mo e taute e tau fakatokatokaaga ma e tau tagata fakailoa kua lata ke ahi atu a lautolu he oti la ia e Fakamanatuaga ke liu fakamanatu e tau mena atihake ne ako mo e kitia e lautolu. To manako e falu ke taute e fakaako Tohi Tapu he kaina. Kua lata foki ke uiina a lautolu ke o atu ke he tau feleveiaaga he fakapotopotoaga fakafahi tapu, ha kua maeke he fakalataha tumau ke fakatolomaki ki mua ha lautolu a iloilo ke he Tohi Tapu.
7 Ko e tau fakatokatokaaga ne taute ke fakamalolo a lautolu kua nakai fakalataha tumau mai mo lautolu ne lolelole ke o mai tumau ke he tau feleveiaaga. Ka ole atu e tau motua ki a koe ke lagomatai a ia ne kua lolelole ke liu fakalataha ke he fekafekauaga he fonua, kia mautali ke talia. He fakakite e manamanatuaga fakaalofa pihia ma e tau matakainaga ha tautolu kua tatai mo e tomatomaaga he aposetolo ko Paulo: “Kia mahani mitaki a tautolu fakalata ke he tau aho ha i ai ia tautolu, ke he tau tagata oti kana, ka e au atu ke he faoa ne tua.”—Kala. 6:10.
8 Kia igatia a tautolu oti mo e taute e laliaga pauaki ke fakalataha ke he Fakamanatuaga ia Aperila 16. To nakai manako a tautolu ke tonoa mai he magaaho lilifu lahi nei ke fakaheke a Iehova. E, mogonei mo e anoiha, kia fakaheke a tautolu ki a Iehova ha ko e hana tau gahua lalahi!—Sala. 145:21.