“Kua Maeke ke Talia”
1 Lagataha, ne vagahau a Iesu ke he hana tau tutaki ke he fakamauaga, ne hagaao a ia ke he nofo tokotaha ko e ‘mena foaki atu.’ Ti tala age a ia: “Ko ia kua maeke ke talia, kia talia ai e ia.” (Mata. 19:10-12) Fai tau he mole, ne tohi he aposetolo ko Paulo hagaao ke he aoga he nofo tokotaha mo e fakamalolo e falu ke muitua hana fakafifitakiaga he nakai fai hoana. (1 Kori. 7:7, 38) Tokologa he vaha nei ‘ne talia’ ke nofo tokotaha ti hane olioli e tau aoga ia. Ko e heigoa falu mena nei?
2 Fekafekau “mo e Loto Nakai Fakalavelave”: Ne maama e Paulo kua foaki he nofo tokotaha ki a ia e fai magaaho ke fekafekau ki a Iehova “mo e loto nakai fakalavelave.” Tatai mo e vaha nei, maeke he matakainaga tane nofo tokotaha ke fakalaulahi atu ke he Aoga Fakaako Fekafekau, ti ataina lahi foki e tagata nofo tokotaha ke hu atu ke he gahua paionia, ako taha vagahau kehe, hiki ke he matakavi kua lata lagomatai, gahua he Peteli, po ke ata ma e falu kotofaaga pauaki he fekafekauaga. To lahi e magaaho hana ke taute e fakaakoaga fakatagata hokulo mo e manamanatu mo e matutaki tata ki a Iehova he liogi mai he loto. Kua mahani e tagata nofo tokotaha ke lahi atu e magaaho ke lagomatai e ia e falu. Ko e tau gahua oti pihia ke he ‘aoga fakatagata’ ni he taha.—1 Kori. 7:32-35; Gahua 20:35.
3 Ko e gahua nakai fakalavelave pihia ke he Atua kua tamai e tau paleko loga. He mole e 27 e tau i Kenya, ne tohi he matakainaga fifine nofo tokotaha: “Ne loga lahi e tau kapitiga mo e lahi mahaki e gahua! Ne taute mena auloa a mautolu [mo e] ahi atu e taha ke he taha. . . . Ne maeke ia au ke fakaaoga e tokanoaaga mo e hikihikiaga lahi kua maeke he nofo tokotaha ke lavelave tumau he fekafekauaga, ti tamai he mena nei ki a au e fiafia lahi.” Ne lafi e ia: “Ko e fakafetuiaga haku mo Iehova ke he tau tau loga kua hokulo.”
4 Maeke ke Talia: Ne pehe a Iesu ko e kakano he feaki e mena foaki he nofo tokotaha kua lata “ha ko e kautu he lagi.” (Mata. 19:12) Tuga ni ha mena ne foaki atu, kua lata e nofo tokotaha ke fakaaoga fakamitaki ke tamai e olioli mo e tau aoga. He fakaaoga e tau magaaho kua tamai he nofo tokotaha mo e falanaki ki a Iehova ma e pulotu mo e malolo, tokologa e tau tagata nakai mau kua hokotia ke maama e uho he maeke ke talia ma e mena foaki ia.