“Kia Nonofo Tauteute Ai a Mutolu”
1 He perofetaaga lahi hana ke he fakaotiaga he fakatokaaga nei, ne hataki e Iesu hagaao ke he hufia lahi ke he tau kapaletu he moui he tau aho takitaha. (Mata. 24:36-39; Luka 21:34, 35) Ha ko e mena to hoko e matematekelea lahi he ha magaaho ni, ati kua lata katoatoa ke omaoma a tautolu ke he tomatoma ha Iesu: “Kia nonofo tauteute ai a mutolu; ha ko e magaaho nakai manatu ai e mutolu, ke hau ai e Tama he Tagata.” (Mata. 24:44) Ko e heigoa kua maeke ke lagomatai a tautolu hagaao ke he mena nei?
2 Taufetului ke he Tau Fakaatukehe mo e Tau Fakalavelave: Taha he tau matahele fakaagaga kua lata ia tautolu ke puipui mai ai ko e “fakaatukehe he tau mena he mouiaga nai.” (Luka 21:34) He falu motu, ko e mativa, nakai fai gahua, mo e tauuka he tau koloa kua uka ke moua e tau foakiaga kua lata mo e moui. He falu motu, ke moua e tau koloa fakatino kua aga mau. Kaeke ke kamata ke molea e kapaletu ha tautolu ke he tau koloa fakatino, to kaumahala a tautolu ke hagaaki ke he tau mena moli he Kautu. (Mata. 6:19-24, 31-33) Kua lagomatai he tau feleveiaaga Kerisiano a tautolu ke fakatumau e hagaaki ia. Ko e foliaga nakai hau ke fina atu ke he tau feleveiaaga takitaha?—Hepe. 10:24, 25.
3 Kua pukenamo e lalolagi he vaha nei he tau fakalavelave nukua mukamuka lahi ke fofo e magaaho uho ha tautolu. Ko e fakaaoga he komopiuta kua eke mo matahele kaeke ke lahi mahaki e magaaho kua fakamole he kitekite ke he Internet, he totou mo e fakafano e E-mail, po ke fefeua he tau pele komopiuta. Lahi e magaaho ka mole noa ke he televisoni, tau kifaga, tau mena ne fiafia he taute, totou ke he tau tohi fakalalolagi, mo e tau sipote, ti tote maka e magaaho mo e malolo ha tautolu ma e tau tutuliaga fakaagaga. He foaki he fakafiafiaaga mo e okiokiaga e fakahauhau ku, ne tataki atu he fakaako Tohi Tapu fakatagata mo e fakamagafaoa ke he tau aoga tukulagi. (1 Timo. 4:7, 8) Kumi magaaho nakai a koe ke manamanatu fakahokulo ke he Kupu he Atua he tau aho takitaha?—Efeso 5:15-17.
4 Kua maeke ia tautolu ke fakaaue lahi ha kua taute he fakatokatokaaga ha Iehova e fakaholoaga he fakaakoaga fakaagaga ke lagomatai a tautolu he “aoga ke hao mai ke he tau mena oti ia ka hohoko mai, ke tutu foki ki mua he Tama he tagata”! (Luka 21:36) Kia fakaaoga katoatoa e tautolu e tau foakiaga nei mo e ‘kia nonofo tauteute ai a tautolu’ ke maeke he tua ha tautolu “ke hoko ai e navaaga, mo e lilifu, mo e fakahekeaga ka fakakite mai a Iesu Keriso.”—1 Pete. 1:7.