Fakahauhau e Navaaga
1 “Ko e tama fifine mitaki nakai au he aho nei?” he tagi he tama fifine tote he magaaho mohe. Ne ofo e matua fifine hana he huhu ia. Pete ne mailoga e lali fakamalolo he tama fifine hana he aho ia ke mahani mitaki, ne fakaheu e ia ke talahau ha kupu loto fakaaue. Kua eke e tau hihina mata he tama fifine tote ia mo fakamanatuaga ko tautolu oti kana—ikiiki mo e momotua—kua lata mo e navaaga. Kua fakahauhau nakai e tautolu a lautolu ne takatakai viko ia tautolu he talahau e loto fakaaue ma e mitaki kua taute e lautolu?—Fakatai 25:11.
2 Ne foaki mai he tau matakainaga Kerisiano loga e tau kakano mitaki ke nava ki a lautolu. Kua gahua malolo e tau motua, tau fekafekau lagomatai, mo e tau paionia ke fakakatoatoa e tau matagahua ha lautolu. (1 Timo. 4:10; 5:17) Kua ukufakina e tau mamatua matakutaku Atua ke feaki e tau fanau ha lautolu ke he tau puhala ha Iehova. (Efeso 6:4) Kua tau fakamalolo e tau fuata Kerisiano ke totoko “e agaga he lalolagi.” (1 Kori. 2:12; Efeso 2:1-3) Kua fekafekau tua fakamoli e falu ki a Iehova pete ni e fuakau fakahaga, tau lekua malolo tino, po ke falu kamatamata. (2 Kori. 12:7) Kua lata a lautolu oti ia mo e navaaga. Kua navanava nakai e tautolu e tau laliaga mitaki ha lautolu?
3 Fakatagata mo e Fakahako: Kua loto fakaaue moli oti a tautolu he logona e navaaga mai i mua ke he fakapotopotoaga. Pete ia, ko e navaaga kua mua atu e fakahauhau he magaaho ka talahau fakahako mai ni ki a tautolu takitokotaha. Ma e fakatai, he veveheaga 16 he tohi ha Paulo ke he tau Roma, ne talahau fakahako e ia e tau talahauaga loto fakaaue hagaao ki a Fipe, Pisila mo Akula, Tufaina mo Tufosa, mo Peresita, mai he falu. (Roma 16:1-4, 12) Kua liga fakahauhau ha ia hana tau kupu ki a lautolu ia ne tua fakamoli! Ko e nava pihia kua fakailoa moli ke he tau matakainaga ha tautolu kua manako ki a lautolu mo e taute ai ke fetataaki auloa a tautolu. Kua fai navaaga fakahako nakai a koe ke he taha he fou nei?—Efeso 4:29.
4 Mai he Loto: Ke fakahauhau moli, kua lata e navaaga ke moli. Maeke he tau tagata ke kitia kua vagahau mai a tautolu he loto po kua “vagahau mo e fakavai” noa. (Fakatai 28:23) He fakamahani a tautolu ke mailoga e mitaki he falu, to omoi e tau loto ha tautolu ke nava atu. Kia fakamokoi a tautolu he foaki e navaaga moli, he iloa ko e “kupu ke he hana aho ke lata ai, kua mitaki lahi haia.”—Fakatai 15:23.