Fakakite e Fiafia Fakatagata—He Nava
1 Kua atihake he nava mooli e tau agaaga he tau tagata, fakalagalaga ke gahuahua, ti tamai ki a lautolu e olioli. Tokologa e tagata fakailoa ne moua ko e nava mooli fakakū kua fa lagomatai ke fiafia e tau tagata ke fanogonogo. Nava fēfē e tautolu e tau tagata he lali ke folafola e tala mitaki ki ai?
2 Kia Matakite: Kua mailoga e Iesu Keriso ne lilifu e tau gahua mitaki he tau fakapotopotoaga ne fitu ha Asia Tote. (Fakakite. 2:2, 3, 13, 19; 3:8) Pihia foki, ko e fiafia mooli ke he tau tagata ne feleveia mo tautolu he fekafekauaga ka fakalagalaga a tautolu ke kumi puhala ke nava ki ai. Ma e fakatai, ko e lotopā maopoopo, ko e fakatātā he matua e fakaalofa hofihofi ke he fanau haana, po ke mamali mo e fakafeleveia fakakapitiga he tagata he kaina a tautolu nukua foaki ki a tautolu e magaaho ke nava atu. Kua mailoga mooli mo e fakaaoga nakai e koe e tau magaaho pihia?
3 Kia Eke mo Tagata Fanogonogo Mitaki: Ka fakamatala ke he falu, uiina a lautolu ke talahau e tau manatu he hūhū e tau hūhū kua latatonu. Fakakite ki a lautolu e lilifu he fanogonogo ke he tau mena ne talahau e lautolu. (Roma 12:10) Liga, to moua e koe taha mena ke nava atu mooli mo e maeke ke fakalaulahi e mena ne tutala ki ai.
4 Kia Fakailoilo: Ko e heigoa kua lata ke taute e tautolu ka talahau he tagata he kaina taha mena ne nakai tatai mo e kupu mooli he Tohi Tapu? He nakai talia ke he talahauaga hepe ia, kia fakaaue ke he manatu he tagata ti matutaki ke talahau “Mailoga e au kua lahi e manamanatu haau ke he matakupu nei.” (Kolo. 4:6) Ka fakafetoko e tagata, maeke ia tautolu ke nava ki a ia ha ko e fiafia mooli haana ke he matakupu. Ko e puhala totonu pihia kua liga fakatote hifo e totoko malolō haana ke he tala mitaki.—Fakatai 25:15.
5 Ke foaki e fakamalolōaga, kua lata ke mooli e nava ha tautolu. Ko e fakaaoga he tau kupu atihake kua fakalilifu a Iehova mo e futia e falu ke he fekau he Kautu.