Ko e Aoga Ue Atu he Pulotu Faka-Atua
1 Kua manatu falu tagata na kua lata e Tau Fakamoli a Iehova ke hagaaki fakatonu e tau laliaga ha lautolu he lagomatai ke fakatote hifo e tau lekua ne fehagai mo e tau tagata he vaha nei. Kua kaumahala e tau tagata pihia ke kitia e aoga ue atu he gahua fakaako Tohi Tapu ha tautolu. Kua pihia he tohi he aposetolo ko Paulo: “Ha ko e kupu ke he satauro ko e mena goagoa ia kia lautolu kua malaia; ka ko e malolo he Atua ia kia tautolu kua fakamomoui.” (1 Kori. 1:18) Moli, kua iloa e tautolu ko e fekafekauaga Kerisiano ko e gahua aoga lahi hane taute ke he lalolagi he vaha nei.
2 Ko e Moui Laukauka Mogonei: Ko e tau laliaga he tagata ke fakamafola e tau lekua he tagata ne fakakaupa lahi e tau fua ne moua. Ne nakai la taofi he matafakatufono e tupu lahi he matahavala. Ko e tau maveheaga he mafola mo e tau matakau taofi mafola ne nakai la fakagata e felakutaki. Ko e tau fakaholoaga kaufakalataha ne kaumahala ke utakehe e mativa. (Sala. 146:3, 4; Iere. 8:9) Kehe ai, ko e fekau he Kautu ne hikihiki e tau momoui he tau miliona he lagomatai a lautolu ke fakatapulu ke he tagata fou nukua talia ke he Atua. (Roma 12:2; Kolo. 3:9, 10) He taute pihia, kua olioli e lautolu e puhala holo ki mua he moui he magaaho tonu nei.—1 Timo. 4:8.
3 Ko e Fiafia he Vaha Anoiha: He lafi ke he lagomataiaga ki a tautolu ke kautu ke he tau paleko fakalutukia he moui, kua fakamalolo he pulotu faka-Atua a tautolu ke pulega lauia mitaki ma e vaha anoiha. (Sala. 119:105) Kua fakahao ai a tautolu mai he taute e tau laliaga fakateaga ke fakafou e fakatokaaga nei. (Fakama. 1:15; Roma 8:20) Ko e fakaaue ha ia ha tautolu he nakai moumou e tautolu e ha tautolu a tau momoui ke tutuli e tau foliaga ne kua fakavaia hokoia! Ka e, kua hagaaki e tau laliaga ha tautolu ke he maveheaga moli a Iehova he “lagi fou mo e lalolagi fou” ke nofo ai e tututonu. Ka hoko mai e aho he fakafiliaga ha Iehova, to nakai taumaleku ko lautolu ne falanaki ke he pulotu faka-Atua ne taute e fifiliaga hako.—2 Pete. 3:10-13; Sala. 37:34.
4 Pete kua tuga e nakai aoga e pulotu faka-Atua ki a lautolu kua hufia ke he ‘pulotu he lalolagi nai,’ ka ko e puhala aoga ni a ia ke muitua ki ai. (1 Kori. 1:21; 2:6-8) Ti, kua matutaki a tautolu ke fakapuloa ke he lalolagi oti e fekau kua puna mai he Atua, ko e ‘pulotu ne tokotaha.’—Roma 16:27
.