Puha Huhu

◼ Maeke fefe ia tautolu ke fakatokatoka fakamitaki e tula he tau feleveiaaga he fakapotopotoaga?

Kua holo mafiti e tula ka fai mena mitaki a tautolu hane tutala ke he tau kapitiga. Ma e kakano nei, kua maeke ke paleko e taute he tau vala he feleveiaaga ke he tula fafati. Ko e heigoa kua maeke ke lagomatai?

Kamata he tula kua kotofa. Magaaho ka feleveia e fakapotopotoaga katoa, kua liga aoga ke uiina tuai e tau tagata he toloaga ke he tau nonofoaga ha lautolu he taha po ke ua e minuti ato kamata e feleveiaaga he tula kua kotofa ke he puhala maopoopo. (Fakama. 3:1) Ke he tau feleveiaaga ne ikiiki e tau matakau, tuga e feleveia ma e gahua he fonua, kua nakai lata ke fakatali ki a lautolu ka mule he hohoko mai.

Tauteute tuai fakamatafeiga. Ko e taha puhala he fatifati fakamitaki he tula ko e tauteute tuai. Kia tokaloto fakamaaliali e kakano he kotofaaga. Kumi e tau uho manatu, ti taute ke kitia maali. Kalo mai he fakatauhele ke he tau mena ikiiki. Tuku fakamukamuka e lauga. Kaeke putoia e tau fakataitaiaga po ke tau huhu tala, fakataitai tuai. Ka maeke, fakataitai ke he tula e vala hau he magaaho ka tauteute tuai fakaleo lahi e koe.

Fatifati e lauga hau. Kaeke ko e kotofaaga hau ko e lauga po ke fakatutala auloa, to liga aoga ki a koe ke vehevehe e lauga hau ke he tau veveheaga. Fifili ko e lahi fefe e magaaho ka fakaaoga ma e tau veveheaga takitaha, mo e tohi he fahi he lau pepa e tau manatu hau. Ti fakakiakia e tula hau he magaaho ka lauga ai. Ke he fakatutala auloa, kalo mai he matahele he kotofa ke loga e tali he kamataaga ti fakatepetepe ka hoko ke he tau vala hokulo i tua. Ko e tau leveki he Fakaakoaga Kolo Toko kua lata ke lahi e magaaho ka fakaata ke taute e puha fakamanatu he matahiku. Kua lata foki ia lautolu ke fakaeneene neke molea atu ke he tula kua fafati ma e lologo fakaoti mo e liogi.

Fakaoti he tula kua kotofa. Kaeke loga e vala ne putoia ke he feleveiaaga, tuga e Feleveiaaga Fekafekau, kua lata e tau tagata lauga takitaha ke manamanatu ke he magaaho ka kamata mo e ka oti ai e vala hana. Ko e heigoa e mena ka taute ka to tua e tula ke he setulu kua fakatoka? Taha po ke ua e matakainaga tane kua liga maeke ke tutuli ke he tula he hagaaki ni ke he tau matapatu manatu mo e mutu hifo e falu fakamaamaaga matafeiga. Ka maeke ke taute e mena nei ko e fakamailoga a ia he faiaoga lotomatala.

Ke he tau tagata fanogonogo, maeke ia tautolu ke lagomatai e matakainaga tane ne takitaki he tali fakaku mo e fakahako ke he manatu. Ko tautolu oti mogoia, kua maeke ke kaufakalataha ke he tau feleveiaaga nukua “fulufuluola mo e taute fakamitaki.”​—1 Kori. 14:40.