Leo Kofe kua Fakahauhau
1 Ko e lologo mo e leo fakatagitagi ko e vala aoga he tapuaki moli. I Isaraela i tuai, ne uhu e Asafo mo e hana tau matakainaga: “Kia fakaaue atu ā mutolu kia Iehova . . . Kia lologo atu ā mutolu kia ia, kia uhu lologo a mutolu kia ia; kia talahau atu ā e mutolu hana tau mana oti.” (1 Nofo. 16:8, 9) He vaha nei to fakamalagaki e tautolu e tau leo ha tautolu he lologo ki a Iehova ke he tau feleveiaaga he fakapotopotoaga he tau fahitapu takitaha. (Efeso 5:19) Ko e magaaho mua atu ha anei ke fakaheke ke he hana higoa!—Sala. 69:30.
2 Ko e fanogonogo ke he Kingdom Melodies, fakatokaaga leo fakatagitagi he tau lologo he Kautu, kua maeke ke fakapuke e tau manamanatuaga ha tautolu aki e tau manatu fakaagaga. “He ta e tau leo fakatagitagi, ne liu au manatu e tau kupu,” he fakamaama he taha matakainaga fifine. “Ko e puhala mitaki ha ia ke toka tumau a Iehova he manamanatuaga haku he hane fanogonogo fiafia ke he leo lologo!”—Filipi 4:8.
3 Tau Magaaho ke Olioli Ai: Ko e ta e Kingdom Melodies i kaina kua tamai e matagi fakaagaga ne mafanatia ke fakatolomaki aki e mafola he magafaoa. “Kua ta tumau e mautolu e [leo kofe] nei he kaina mo e motoka ha mautolu ti nakai fiu ke he tau leo kofe atihake ia,” tohia ai he taha magafaoa. “Fa mahani ke foaki he Kingdom Melodies e fakatokaaga mafola kua hako he manamanatuaga ka tauteute ma e tau feleveiaaga Kerisiano po ke ka fina atu ke he toloaga.” Ne pehe e matakainaga fifine: “Kua fakalagalaga moli ke fanogonogo ki ai he magaaho ka taute gahua kaina au—ko hai ne manamanatu kua olioli au he hane fatufatu he tau mena unu? Kua pulega au ke ta e leo kofe nei ka lolelole e logonaaga haku. Kua ha ha ai he leo kofe e lauiaaga malagaki! . . . Kua fakalagalaga he tau lologo takitaha e fiafia lahi.” Ha ha ai nakai e tau magaaho kua maeke he leo kofe fakahauhau pihia ke lagomatai ki a koe?
4 Ko e loga he tau leo kofe he vaha nei kua fakaata e aga he lalolagi. Maeke he tau matua ke lagomatai e tau fanau he feaki ke kamata e leo kofe atihake he fakaaoga fakamitaki e tau taofiaga Kingdom Melodies. Tokologa e tau tagata fakaako ke he Tohi Tapu mo e tau tagata fiafia ka fiafia foki ke iloa hagaao ke he tau lologo fulufuluola fakaagaga nei, ne kua fakaheke a Iehova mo e lagaki e agaga.—Sala. 47:1, 2, 6, 7.