Vala 4—Taute e Tau Fakaakoaga Tohi Tapu Holo ki Mua
Fakamahani e Tau Tagata Fakaako ke Tauteute
1 Ko e tagata fakaako ne totou tuai e fakaakoaga, kua fakamaimailoga e tau tali, mo e manamanatu e puhala ke talahau ai ke he tau kupu ni hana nukua lata ke mafiti e holo ki mua fakaagaga. Ko e mena ia, ka fakatu e fakaakoaga tumau, tauteute tokoua e fakaakoaga ke fakakite e puhala ke he tagata fakaako. Laulahi e tau tagata fakaako, to lagomatai ai ka tauteute tuai tokoua e veveheaga po ke fakaakoaga katoa.
2 Fakamaimailoga mo e Fakamaumau: Fakamaama e puhala ke kumi e tau tali hako ke he tau huhu ne tohi ai. Fakakite ke he tagata fakaako e lagaki he tohi fakaako hau ne kua fakamaimailoga ni e koe e tau matapatu kupu po ke tau alaga kupu. He manamanatu a koe ke he vala tala, liga manako a ia ke muitua e fifitakiaga hau, he fakamaimailoga ni e mena kua lata ke lagomatai a ia ke manatu e tali he lagaki ni hana. (Luka 6:40) Ti huhu ki a ia ke talahau e tali he tau kupu ni hana. To fakaata he mena nei a koe ke kitia e maama mitaki hana ke he vala tala.
3 Ko e kumikumi fakamitaki he tau kupu tohi ne tu ai ko e vala aoga lahi he tauteute he tagata fakaako ma e fakaakoaga. (Gahua 17:11) Lagomatai a ia ke kitia ko e mena lalago he kupu tohi ne tu ai e manatu he paratafa. Fakakite ki a ia e puhala ke fakamaumau fakaku he fahi he fakaakoaga hana he tohi. Peehi ki a ia e manatu ko e fakaveaga e Tohi Tapu ma e mena ne ako e ia. Fakamalolo a ia ke fakaaoga fakamitaki e tau kupu tohi ne tu ai he tau talahauaga hana ka fakaako.
4 Fakamaama Ku mo e Liu Fakamanatu: Fakamua to kamata e tagata fakaako hana tauteute tuai fakamatafeiga ke he vala tala ka aoga ki ai, to lagomatai ki a ia ke moua e onoonoaga laulahi ke he matakupu. Fakakite ko e mena maeke ia ia ke fakamaama e vala tala he kumikumi ku ke he mataulu he veveheaga, tau mataulu tala, mo e tau fakataiaga. Fakamaama e mena ia to oti e tauteute tuai hana ma e fakaakoaga, to pulotu a ia ke fai magaaho ke liu fakamanatu e tau matapatu manatu ne ha ha he fakaakoaga, liga he fakaaoga e puha liu fakamanatu kaeke kua fai. Ko e fatiakiaga pihia to lagomatai a ia ke tokaloto e vala tala.
5 Ko e fakamahani e tagata fakaako ke tauteute fakamitaki ma e fakaakoaga hana ka lagomatai a ia ke taute e tau talahauaga kakano lahi he tau feleveiaaga he fakapotopotoaga. To lagomatai foki a ia ke feaki e tau puhala fakaako nukua aoga lahi ki a ia ka oti hana fakaakoaga Tohi Tapu fakatagata.