Setulu he Magafaoa—Tau Feleveiaaga he Fakapotopotoaga
1 Kaeke ko koe ko e matua Kerisiano, kua manako a koe ke tutupu hake e fanau hau ke fakaalofa mo e fekafekau ki a Iehova ti hiku ke moua e moui tukulagi ke he lalolagi fou ne mavehe he Atua. Maeke fefe ia koe ke lagomatai a lautolu ke tuku fakamua e tapuakiaga ki a Iehova he tau momoui ha lautolu? Ko e puhala aoga lahi ko e fakafifitakiaga hau. (Fakatai 20:7) He manatu e fakafifitakiaga he matua fifine Fakamoli hana, ne pehe taha matakainaga fifine: “Kua nakai fai fakauaua ko e o nakai a mautolu ke he feleveiaaga.” Ne manatu tukulagi e ia e mena nei.
2 Kua loto fakaaue nakai e magafaoa hau ke he kakano he tau feleveiaaga he fakapotopotoaga? Ko e fakaakoaga ne moua e tautolu he tau feleveiaaga nei kua fakamalolo a tautolu ke taute e finagalo he Atua, mo e fakalatahaaga ne olioli e tautolu mo e tau matakainaga ha tautolu kua eke mo punaaga aoga lahi ma e fakamafanaaga. (Isaia 54:13; Roma 1:11, 12) Pete ia, ko e matapatu kakano he tau feleveiaaga pihia ke fakaheke atu ki a Iehova “ki mua he fakapotopotoaga.” (Sala. 26:12) Kua foaki mai he tau feleveiaaga faka-Kerisiano ki a tautolu e tau magaaho ke fakatata e fakaalofa ha tautolu ma Iehova mo e ke tapuaki ki a ia.
3 “Kia O Fakalaulau”: He loto fakaaue ma e kakano tapu he tau feleveiaaga ha tautolu ka omoomoi a tautolu “kia o fakalaulau” neke feaki e tautolu e aga mau ke fakato e tau feleveiaaga ma e tau mena nakai aoga lahi. (Efeso 5:15, 16; Hepe. 10:24, 25) He magaaho ka taute e setulu he magafaoa hau, to liga kamata ai he fakamailoga e tau magaaho ma e tau feleveiaaga he fakapotopotoaga. Ti matakaki neke fakaata falu gahua ke fakatauhele aki. Taute moli mogoia ke tuku fakamua e o atu ke he tau feleveiaaga ma e magafaoa hau.
4 Kua omoomoi nakai a tautolu he magaaho ka totou hagaao ke he tau matakainaga ha tautolu ne kautu ke he tau fakatauhele ke o atu ke he tau feleveiaaga mo e tau toloaga? Pete kua nakai kelea lahi e tau tutuaga hau, ka kua fakafehagai foki a koe mo e tau paleko. Ko Satani kua fakamalikiti e uka ma e tau tagata he Atua ke tapuaki ki a Iehova. Ka e, kia mauokafua to mailoga he fanau hau e tau laliaga malolo he magafaoa hau ke o atu ke he tau feleveiaaga he fakapotopotoaga. Moli, he taute pihia, to liga foaki e koe ki a lautolu e mena fakaalofa fakaagaga ka nakai maeke ke nimo.