Feaki e Fiafia ke he Fakatokaaga Mekasini
1. Maeke fefe ia tautolu ke fakaaoga e fakatokaaga mekasini ke feaki e fiafia?
1 Tokologa e tagata ne feleveia mo tautolu he fekafekauaga ne fiafia ke he tau aahi atu ha tautolu mo e talia e tau tohi ka e tehatehaua ke talia e fakaakoaga Tohi Tapu tumau. Taha puhala ke feaki e fiafia ha lautolu kakano he fakatokaaga mekasini. Ka toka e koe e tau mekasini, fakamau hifo e higoa mo e kaina he tagata, aho ne hoko atu, tau fufuta ne talia, mo e kupu tohi ne fakatutala ki ai, ko e ha mena ni ne mailoga e koe ne fiafia e tagata ki ai. Mo e tau fufuta mekasini fou, kumi e tau manatu ka fiafia a lautolu ki ai he fakatokaaga mekasini hau, mo e fakatutala hagaao ki ai ka aahi atu. (1 Kori. 9:19-23) He fai magaaho, to liga fakatupu he taha mena ne totou e lautolu i loto he tau senolo ha tautolu e fiafia ha lautolu ke manako ke iloa atu foki.
2. Ko e ha kua mafiti lahi mogonei ma e tau tagata ke kumi a Iehova, mo e ko e heigoa foki kua maeke ia tautolu ke taute ke lagomatai a lautolu?
2 Ka e, mailoga e tautolu to nakai eke e laulahi he tau tagata mo tau fekafekau ha Iehova ha ko e totou ni ha lautolu he tau mekasini. Ha kua mafiti lahi mogonei ma e tau tagata ke kumi a Iehova, ko e heigoa foki kua maeke ia tautolu ke taute ke lagomatai a lautolu? (Sefa. 2:2, 3; Fakakite. 14:6, 7) Maeke ia tautolu ke feaki e fiafia ha lautolu he fakakite fakatekiteki age e kupu tohi ne fifili he tau magaaho takitaha ne uta e tautolu e tau mekasini.
3. (a) Maeke fefe ia tautolu ke tauteute e tau fakaholoaga he tau fakatutalaaga ne taha e kupu tohi? (e) Ko e heigoa e tau matakupu ne manamanatu lahi e tau tagata he fonua hau ki ai?
3 Fakatutalaaga ne Taha e Kupu Tohi: Manamanatu ki a lautolu he fakatokaaga mekasini ha tautolu, mo e tauteute e tau fakaholoaga he tau fakatutalaaga ne taha e kupu tohi ma e tau manako pauaki ni ha lautolu takitaha. (Filipi 2:4) Ke fakatai ki ai, ka mate laia taha fakahele, liga aahi atu lagaloga a koe ke tutala ke he mena ne talahau he Tohi Tapu hagaao ke he tuaga he tagata mate mo e amaamanakiaga ke he liu tu mai. Ko e vala tala he tohi Reasoning i lalo he matapatu mataulu “Mate” mo e “Liu Tu Mai” ka lata ke kumikumi ki ai ma e tau fakatutalaaga ne taha e kupu tohi. Ko e tau fakatutalaaga foki ke he tau mataulu pihia, tuga e puhala ka utakehe aki e gagao, fuakau, mo e mate, ka mui pauaki ki ai. Ko e foliaga ke kumi e mataulu tala ne fiafia ke he tagata mo e fakakite fakahaga ki a ia e tau mena ne talahau he Tohi Tapu hagaao ki ai.
4. Ko e ha ne aoga ai ke foaki e fakamaamaaga ka fakaaoga e tautolu e tau Tohiaga Tapu, mo e taute fefe ai e tautolu?
4 Foaki e Maamaaga: Pete kua mitaki ke fakamukamuka mo e fakaku e tau fakatutalaaga pihia, kua nakai kuenaia ke totou e kupu tohi ne fifili. Nukua fakapouli e Satani e tau manamanatuaga he tau tagata ke he tala mitaki. (2 Kori. 4:3, 4) Ko lautolu foki ne mahani mo e Tohi Tapu kua lata ke lagomatai ke maama ai. (Gahua 8:30, 31) Ti, kia fai magaaho ke fakakakano mo e fakamaama e tohi, tuga ni ka taute e koe e lauga hau he Aoga Fekafekau Fakateokarasi. (Gahua 17:3) Kia mailoga moli kua kitia he tagata e aoga lahi he Kupu he Atua ke he moui hana.
5. Maeke fefe e fakatokaaga mekasini ke eke mo fakaakoaga Tohi Tapu?
5 Ka olioli e tagata ke he mena ne ako e ia, kia fakalaulahi fakahaga e tau fakatutalaaga ke lafi ua po ke tolu e tau tohi he Tohi Tapu he tau ahiahi takitaha. Kumi puhala ke fakakite age e porosua Manako po ke tohi Iloilo. He puhala nei, to liga fakahiku e fakatokaaga mekasini ke eke mo fakaakoaga Tohi Tapu.