Maeke Nakai e Tama Haau ke Taute e Fifiliaga Hokulo?
1. Ko e heigoa e fifiliaga nukua taute he tau fuata Fakamoli ke he fakaaoga he toto? Talahau e fakatai.
1 Fifiliaga hokulo hagaao ke he heigoa? Ke he tau fagai toto. Tuga ne fakakite mai he vala tala ne fakamataulu “Fano Tuga ne Fakaako Mai e Iehova” he fufuta he Ko e Kolo Toko ia Iulai 1, 1991, ne taute he tau fanau he Tau Fakamoli a Iehova e tau fifiliaga mauokafua ke fakamoli e manako ha lautolu ke omaoma ke he fakatufono he Atua ke he toto nukua aoga ni ki a lautolu tuga he aoga ke he tau mamatua ha lautolu. Liga to pihia foki nakai ke he tama tote haau?
2. Ko e heigoa e tuaga matafakatufono ne fakaaoga he taha hopoaga ke he tama ne nakai talia ke fagai toto, mo e ko e heigoa he tau mamatua Kerisiano mo e tau fanau ha lautolu ka ako mai he mena nei?
2 Ko e Heigoa ne Talahau he Matafakatufono? He Tau Faahi Kaufakalataha, ko e hopoaga tokoluga lahi ne kautū ai ke talia e tonuhia he tama tote ka e motua ke nakai talia e fagai toto ko e Hopoaga Tokoluga ha Illinois. He liu kitekite ke he matafekau he matakainaga fifine ne 17 e tau, ne poaki he hopoaga: “Kaeke kua maaliali mo e mauokafua e fakamoliaga kua lahi e tama tote ke maama e fua ka tupu mai he gahua haana [mo e] ke taute e fifiliaga tuga e tagata lahi, ti ko e tohi fakave ke he tama tote ka e motua mogoia kua fakaatā ki a ia e tonuhia matafakatufono ke talia e ia po ke nakai e tau tuluiaga fakaekekafo.” Pete kua nakaila fai tonuhia pehenei e hopoaga ha Niu Silani, ko e matafakatufono pihia tuga ne fakagahua he Hopoaga Tokoluga ha Illinois to liga fakaaoga. Ti, he filifilia po kua motua nakai e tama tote ke taute e fifiliaga ma haana, to liga hūhū e tau ekekafo po ke tau takitaki ke he tagata gagao ke logona a ia he talahau haana nakai talia fakatagata ke he fagai toto. Kua lata he fuata mui ke maama mitaki e hokulo he tuaga fakaekekafo haana mo e tau fua ka moua mai he tau puhala tului ne fifili e ia mo e talahau fakamahino mo e mauokafua a ia ke he haana tau taofiaga fakalotu hagaao ke he matafakatufono he Atua ke he toto.
3. Ko e heigoa e tau hūhū kua lata e tau mamatua ke manamanatu fakahokulo ki ai, mo e ko e ha?
3 Ko e Heigoa he Tama Haau Ka Talahau? Maeke nakai e tau tama haau ke talahau ni e lautolu ha lautolu a tau talahauaga hagaao ke he matakupu nei? Kua talitonu nakai mo e loto katoatoa a lautolu ko e poakiaga faka-Atua a nei ke ‘fakamamao mo e toto’? (Gahua 15:29; 21:25) Maeke nakai ia lautolu ke fakamaama e taofiaga ha lautolu mai he tau Tohiaga Tapu? To lalago fakamalolō nakai e lautolu ha lautolu a fifiliaga mauokafua hagaao ke he toto kaeke talitonu e tau ekekafo kua fakahagahaga kelea e tau momoui ha lautolu, pete ka nakai fakalataha e tau mamatua mo lautolu? Ha ko e “vaha mo e tau mena ke tutupu ai kua hoko ia kia [tautolu] oti,” maeke fēfē ia mutolu ke tauteute tuai e tau fanau ha mutolu ma e ha paleko fakalutukia ke he ha lautolu a mahani fakamoli?—Fakama. 9:11; Efeso 6:4.
4, 5. (a) Ko e heigoa e matagahua he tau mamatua, mo e maeke fēfē ia lautolu ke fakamoli ai? (e) Ko e heigoa e tau foakiaga kua ha ha ai ke lagomatai e tau mamatua?
4 Tau Mamatua, Ko e Heigoa ha Mutolu Ka Taute? Ha ha ia mutolu e fakalagoaga ke fakaako e tau fanau ha mutolu hagaao ke he onoonoaga he Atua ke he toto. (2 Timo. 3:14, 15) Kua moua e fakamaamaaga mahino he tohi Reasoning, lau 70-4. Fakaako fakamatafeiga ai mo e magafaoa haau. He fakaaoga e vala “If Someone Says—” he lau 74-6, taute e tau fakaakoaga fakataitai mo e tau fanau ha mutolu ke lagomatai a lautolu ke fai iloaaga ke fakamaama e tau mena ne talitonu a lautolu ki ai mo e tau kakano. (1 Pete. 3:15) Falu foakiaga ke fakaako aki a tautolu hagaao ke he matakupu he toto kua putoia ai he porosua How Can Blood Save Your Life? mo e Ko e Kolo Toko ia Iulai 1, 2004, lau 8-18. Lafi ki ai, ko e tau polokalama vitio Transfusion-Alternative Health Care—Meeting Patient Needs and Rights mo e No Blood—Medicine Meets the Challenge, kua moua mogonei he DVD ne fakamataulu Transfusion Alternatives—Documentary Series, kua foaki mai e tau vala tala mauokafua hagaao ke he lauia mitaki he tau vai fakaekekafo mo e iihi ne nakai fakaaoga e toto. Kua kitekite mo e fakatutala foou nakai e magafaoa ha mutolu ke he tau ata nei?
5 Lagomatai e tau fanau ha mutolu ke ‘fakamoli ki a lautolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa’ hagaao ke he toto. Ti to maeke ia lautolu ke taute e fifiliaga hokulo ne ha ha ai e fakamonuinaaga ha Iehova.—Roma 12:2.