Matagahua Pauaki he Lalolagi Katoa ke Fakailoa e Fonoaga he Faahimotu “Kua Tata Mai e Laveakiaga!”

Ko e Tau Tagata Fakailoa he Tau Fakapotopotoaga Takitaha ke Tufatufa e Laupepa Fakailoa Pauaki

¹ Kamata he vahā tau tupu he 2006 he Faahi Tokelau he Fua Lalolagi mo e matutaki ato oti e tau fonoaga faahimotu he lalolagi katoa, to fakaaoga e laupepa pauaki ke taute aki e matagahua pauaki ke fakailoa e tau fonoaga faahimotu ka fakahoko he 155 e motu. To putoia ke he matagahua nei e tau fonoaga faahimotu kua setulu pauaki ke taute i Sihamani, he Repapiliki a Czech, mo Polani ia Iulai mo e faahi tapu fakamua ia Aokuso 2006.

² He onoono ke he tulā fakahiku he vahā nei he fakaotiaga, ko e tau fonoaga, kua fakakite e maveheaga he Atua ke laveaki mai he fakatokaaga kelea nei, kua lata ke fakaohooho lahi ki a lautolu kua latatonu. Kua lata e fekau ke fakalaga a lautolu ke manamanatu ke he tau mena he vahā i mua. Ke fai magaaho e tau miliona tagata ke logona e fekau mafanatia mo e amaamanakiaga, molea e 98,000 fakapotopotoaga he Tau Fakamoli a Iehova he lalolagi katoa kua fakamalolō ke fakalataha fakamakai ke fakailoa e fonoaga kua uiina a lautolu ki ai.

³ To loga e laupepa ka ta atu ke he tau fakapotopotoaga ke maeke e tau tagata fakailoa takitaha ke taki 50 e laupepa. Ka fai ka toe ti maeke ke fakaaoga he tau paionia he fakapotopotoaga. Ke he tau fakapotopotoaga takitaha, to kamata e matagahua he tolu e faahi tapu ato hoko e aho ka kamata e fonoaga nukua kotofa e fakapotopotoaga ki ai. Kua lahi e magaaho nei ne fakaatā ke teitei oti, po ke oti e fonua he fakapotopotoaga he gahua.

⁴ Kua pulega ai, ke he ha matakavi, kua maeke ke fakaolo age e laupepa ke he tagata he kaina. Ka e, ka nakai fai tagata he kaina, maeke ke toka fakalotomatala e laupepa he gutuhala. Kua lata ke taute e laliaga fakamakutu ke tufa oti e tau laupepa he tolu e faahi tapu.

⁵ Kua mauokafua a mautolu to lahi mahaki e fakamatala ka taute ha ko e laliaga lahi nei he lalolagi katoa ke fakailoa e Fonoaga he Faahimotu “Kua Tata Mai e Laveakiaga!” tuga kua fakakite mai he vala nei. Liogi a mautolu ke he monuina lahi ha Iehova ki luga he tau laliaga fakatagata haau he fakalataha ke he matagahua nei he lalolagi katoa.