Tau Laliaga Kaufakalataha he Lalolagi Katoa ke Tukuogo e Fonoaga he Faahimotu “Muitua ke he Keriso!”
To Liu Foki e Tau Tagata Fakailoa ke Tufa e Tau Laupepa Fakailoa Pauaki
1 He tau kua mole ko e matagahua he lalolagi katoa ke tukuogo e Fonoaga he Faahimotu “Kua Tata Mai e Laveakiaga!” ne lauia malolō ki a lautolu ne fiafia mai. Ko lautolu ne talia e uiina pauaki ti o mai ne mailoga ke he magaaho fakamua e kaiaga mahuiga fakaagaaga ne ha ha he Tau Fakamoli a Iehova. (Isaia 65:13) Ne fiafia a lautolu ke lafi mo e tau matakainaga Kerisiano ne mafanatia mo e kaufakalataha ha tautolu. (Sala. 133:1) Ke lagomatai e tokologa ke o mai ke he Fonoaga he Faahimotu “Muitua ke he Keriso!” to liliu foki a tautolu ke tufa e tau laupepa fakailoa pauaki ke he lalolagi katoa.
2 Tau Fua he Tau kua Mole: Fakavē ke he tau hokotaki ne moua he tau faahi oti he lalolagi, nukua mitaki lahi e tau fua he tukuogo e Fonoaga he Faahimotu “Kua Tata Mai e Laveakiaga!” He tau matakavi loga kua fioia e tautolu e fiafia mai he tau tagata. Ke fakatai ki ai, he taha taone, ne tohi he nusipepa e vala tala ne ono e vala hagaao ke he matagahua: “Ke hokotia mafiti ke he tau tagata oti kua gahua fakamakutu e Tau Fakamoli ke he tau katofia—he loloa e tau tulā ne gahua, mamao e tau mena ne ō hui ki ai, ti tala fakamafiti.” He kaufakalataha ke tufa e laupepa fakailoa ne fakalagalaga e fiafia he tau tagata uta tala he taha taone, ti taute e tau vala tala fakamatafeiga hagaao ki ai. Ti tolu e nusipepa ne hokotaki fiafia e tau gahua ha tautolu ato hoko e fono. Ne molea ua e lau he tau vala tala loloa ne tohi he taha tagata hokotaki i loto he fufuta nusipepa he Aho Tapu. Ne fakamatafeiga e tau taofiaga, fakamatakainaga, tufa e tau laupepa fakailoa, mo e fonoaga ha tautolu. Magaaho ne foaki he taha tagata fakailoa e uiina he gutuhala, ne hehele he tagata he fale, he talahau: “E. Na totou laia e au he pepa!” Ne pehē foki taha tagata he fale: “Ko e mole la ia e totou haaku hagaao ki a mutolu, a kua hoko mai tukua a koe mogonei! Ko e uiina ka haaku a nā?” Ti lafi e ia, “Ko e mena mitaki lahi anei he Tau Fakamoli a Iehova ne taute.”
3 Kua kitia e tau tagata tokologa ne fiafia hane o mai ke he fonua he fonoaga mo e tau uiina he tau lima ha lautolu. Ko e falu tagata fiafia kua o mai he tau taone mamao ke he fono. Ko e tau laliaga makutu ha tautolu ke uiina falu ne lafi atu ke he malikiti he tau tagata ne o mai, ti taha e motu ne holo hake ke 27 e pasene he tau tagata ne ō ke he fonoaga mai he tau kua mole.
4 Tau Gahua he Matakavi: Maeke ia mutolu ke kamata ke tufa e laupepa fakailoa he tolu e faahitapu ato kamata e fonoaga. Kua lata ke taute e tau laliaga oti ke gahua katoa e matakavi he fakapotopotoaga. He tau fakapotopotoaga ne lahi mahaki e matakavi, liga lata he tau tagata fakailoa ke toka fakailoilo e laupepa fakailoa he tau kaina nakai fai tagata he faahitapu fakahiku ato hoko e fonoaga. Kua lata e tau fakapotopotoaga ke lali ke tufa oti e tau fufuta laupepa fakailoa mo e gahua fakalahi ke he matakavi ke he mena kua maeke. Ko e tau laupepa ne toe kua lata ke fakaaoga he tau paionia he fakapotopotoaga.
5 Ko e Mena ka Talahau: Liga talahau e koe taha mena pehēnei: “Kua fakalataha a mautolu ke he gahua he lalolagi katoa ke tufa e uiina nei ke lata mo e mena aoga lahi ka tupu i mua. Ko e lagaki haau a ē. To moua e koe e falu fakamaamaaga i loto he uiina.” He fakakū e fakafeleveiaaga ka fakaatā ke loga e laupepa ka tufa. Mooli, kaeke ke fai hūhū e tagata he fale, fakaaoga taha magaaho ke tali ai. Ka fakakite e fiafia, tohi hifo ti liu mafiti atu ke he tagata.
6 Kua aoga ha ia ke eketaha a tautolu ke muitua ke he Keriso! (Ioane 3:36) To lagomatai he ha tautolu a fonoaga he faahimotu ne ha i mua e tau tagata oti ka o mai ke taute mooli e mena ia. Mooli kua lata ia tautolu ke amanaki to liu foaki fakalahi foki e fakamatala ha ko e gahua kaufakalataha nei ke tukuogo e Fonoaga he Faahimotu “Muitua ke he Keriso!” Ko e mena ia, kia fakamakutu ke uiina e tau tagata tokologa ke o mai. Kia fakamonuina fakalahi e Iehova e tau laliaga fakatagata haau he fakalataha a koe ke he matagahua kaufakalataha nei he lalolagi katoa.