Ko e Matagahua ne Fua Mitaki

Tolu e faahi tapu to hoko e fonoaga, to liu foki e tau fakapotopotoaga ke taute e matagahua ke uiina e tau tagata ne fiafia he fonua ke fakalataha mai. Fai kakano mitaki ma e matagahua lagataha nei he tau. Ko lautolu kua talia e uiina mo e o mai ke he fonoaga kua fa fiafia ke he tau lauga faka-Tohi Tapu, ko e tau faahi gahua kua fakatokatoka fakamitaki he tau tagata gahua foaki noa, mo e tau mahani mitaki mo e kaufakalataha ha tautolu. (Sala. 110:3; 133:1; Isaia 65:13, 14) Pete he pihia, fai fua nakai e matagahua ha tautolu, mua atu he tau matakavi ne mamao e o maiaga he tau tagata ne fiafia ke fakalataha ke he fonoaga?

He mole e fonoaga faahimotu he 2011, ne moua he la ofisa e tohi mai he taha fifine ne moua e ia e uiina he gutuhala haana. Ne fa mahani a ia ke fakamumuli ka nokonoko e Tau Fakamoli a Iehova. Ne tohi e ia: Na fulufuluola e kaina haaku, mitaki e taane, ti manatu au kua moua oti e tau mena ke fakafiafia ai au. Momoko ni ha kua nakaila fiafia au, ti nakai fai kakano mooli e moui haaku. Ti fifili au ke fina atu 320 e kilomita ke he fakaholoaga he Aho Faiumu.” Ne fiafia lahi a ia ke he fonoaga ti vilo a ia ke he taane ke tala age kua nofo hifo a ia he pō ke liu fano foki he Aho Tapu. “Ne fanogonogo au ke he tau lauga oti, feleveia mo e tokologa he Tau Fakamoli a Iehova, ti fifili au ke ai fai fakaotiaga e mena nei.” He liu atu ki kaina, ne kamata a ia ke fakaako ti mole e fā e mahina ne eke a ia mo tagata fakailoa nakaila papatiso. “Ne fiafia lahi au he moua e uiina ia he gutuhala haaku ha ko e mogonei kua fai kakano mooli e moui haaku!”

Ko e falu ne moua e uiina to fakalataha mai. Ko e mena ia, kia fakamakutu ke he matagahua aoga lahi nei. Tamai e tau uiina ne toe ke he taone he fonoaga, ti fakaaoga ai ke fakamatala he ha magaaho.

[Puha he lau 5]

To Foaki Fēfē e Tautolu e Uiina?

Ke maeke ke oti e fonua ha tautolu, kua lata ni ke fakakū. Liga talahau e tautolu taha mena pehē: “Fakaalofa atu. Kua putoia a mautolu ke he gahua he lalolagi katoa ke tufa e uiina nei. Ha ē e lagaki haau. To moua e koe e falu vala tala fakamatafeiga i loto he uiina.” Kia hakahakau. Ka fakalataha ke he matagahua he tau matahiku faahi tapu, kua lata foki ia tautolu ke foaki e tau mekasini kaeke kua lata.