Fufuta Pauaki he Awake! ka Fakakite ia Sepetema
1 Ne fiafia e laulahi he tau tagata ke he leo he tau manu lele mo e kitekite ke he toaga laā. Pete ia, tokologa ne kaumahala ke talahau na tufugatia he Matua fakahele he lagi e tau mena nei. To ha ha ia tautolu e magaaho mitaki lahi ke talahau e tuaga tufuga ha Iehova he tufatufa e fufuta pauaki he Awake! (Isaia 40:28; 43:10) Kua hagaao katoatoa e fufuta ha Sepetema ke he matakupu “Fai Tufuga Nakai?”
2 Ke he Fonua: Ka maeke, fakatoka ke fakalataha he fekafekauaga he taha fale ke he taha fale mo e fakapotopotoaga he tau Aho Faiumu oti. Ti atāina ke foaki e fufuta pauaki he falu magaaho he faahi tapu. To fiafia pauaki e tau faiaoga mo e falu kua gahua he faahi fakaako tama ke he fufuta nei. Ko e mena ia, lata ke taute e tau fakatokaaga pauaki ke aahi atu ki a lautolu ia he fonua haau.
3 Ka fakakite e fiafia, toka e hūhū mo e tagata ke tali e koe he aahi atu ka hau. Ma e fakatai, maeke ia koe ke hūhū hagaao ke he kakano ne fakaatā he Tufuga fakahele e matematekelea lahi. Ti, ke he liu aahi atu, maeke ia koe ke fakakite e veveheaga 1 po ke veveheaga 11 he tohi Fakaako he Tohi Tapu. Po ke liga fifili a koe ke hūhū hagaao ke he finagalo he Tufuga ma e lalolagi ti fakatutala mogoia ke he veveheaga 3 ka liu atu.
4 He Aoga: Ka fano a koe he aoga, he ha he foaki e Awake! pauaki ko e mena fakaalofa ke he tau faiaoga mo e tau kapitiga aoga haau? He tuku e lagaki he laulau haau ka fakalagalaga e tau hūhū hagaao ke he taofiaga haau. To liga moua e koe e tau magaaho ke fakaaoga e tau vala tala i loto ka tutala a koe ke he tua haau he tau fakatutalaaga he poko aoga mo e he magaaho ka tohi tala. Ke lagomatai a koe, kua ha ha i loto he lagaki nei e “Young People Ask” ne matapatu e vala tala “Maeke Fēfē Au ke Lalago e Taofiaga Haaku ke he Tufugatia?”
5 Kua lata a Iehova ke fakalilifu mo e fakaheke ke he tau mena ne tufuga e ia. (Fakakite. 4:11) Maeke ia tautolu ke fakalilifu e Tufuga ha tautolu mo e lagomatai e falu ke taute pihia he foaki fakamakai e fufuta he Awake! ha Sepetema.