Fufuta Pauaki he Awake! Ka Foaki ia Novema!
1 Tokologa e tagata ne fai hūhū mooli hagaao ke he aoga he Tohi Tapu. Ka tohia he tau tagata taane, ti ko e ha ne ui ai ko e Kupu he Atua? Ko e heigoa e tau kakano he falanaki ki ai ke takitaki e tau lakaaga haaku? Ka totou mo e fakaako e au e Tohi Tapu, to palepale fēfē e magaaho mo e laliaga haaku? Ko e fakaliliuaga he Tohi Tapu fe kua lata ke fakaaoga e au? Hanei falu he tau hūhū ka tali he fufuta pauaki he Awake! ia Novema ne mataulu “Can You Trust the Bible?” (Maeke Nakai a Koe ke Falanaki ke he Tohi Tapu?)
2 To manako a tautolu ke tufatufa fakalaulahi e fufuta pauaki nei he Awake! ke he fonua ha tautolu. Ka maeke, gahua ke he fekafekauaga he taha fale ke he taha fale mo e fakapotopotoaga he tau Aho Faiumu oti he mahina a Novema. Fakakite e fufuta nei he Awake! ke he tau magafaoa, tau tuuta kaina, tau kapitiga gahua, tau faiaoga, tau kapitiga aoga, mo e tau liu aahi atu. Uta e tau lagaki ka fano a koe ke fakatau mo e fano fenoga. Kua ole fakaloga foki he tau motua e tau lagaki ke loga ai he fakapotopotoaga.
3 Kamata e Fakaakoaga Tohi Tapu: Ka foaki e koe e mekasini, maeke ia koe ke fakatoka e fakavēaga ma e fakaakoaga Tohi Tapu ato fakaoti e fakatutalaaga haau. Ma e fakatai, liga pehē a koe, “Ka liu mai au, manako au ke fakakite atu ki a koe e tali he Tohi Tapu ke he hūhū nei, ‘Ko e heigoa e finagalo he Atua ma e lalolagi?’” Ti liu atu mo e tohi Fakaako he Tohi Tapu ti fakakite ke he tagata he kaina e lau 4-5, po ke fakatutala ke he paratafa 1-3 he veveheaga 3. Ko e taha puhala foki ke talahau, “Ka liu mai au, manako au ke fakatutala e perofetaaga he Tohi Tapu hane fakamooli he magaaho tonu nei.” Ka liu atu a koe, fakakite ke he tagata he kaina e veveheaga 9 he tohi ti fakatutala tokoua e paratafa 1-3. Po ke liga tala age a koe ke he tagata he kaina: “Tokologa ne uka ke maama e mena ne totou e lautolu he Tohi Tapu. Ka liu mai au, manako au ke fakakite atu ki a koe e puhala ke maama mitaki e koe e Tohi Tapu haau.” He liu aahi atu, fakakite age e tohi Fakaako he Tohi Tapu, ti fakatātā e fakaakoaga.
4 Ko e Tohi Tapu ni ne toka ai e ‘tau tohiaga tapu,’ nukua taute a tautolu ke ‘fakailoilo ke moua e moui.’ (2 Timo. 3:15) Ko e mena ia, kua manako oti a tautolu ke fakalataha fakamakai ke he tufatufaaga he fufuta pauaki nei he Awake! ke lagomatai e tau tagata ke feaki e falanaki ke he Tohi Tapu.