Fakaholoaga Foou he Toloaga he Takaiaga

Kua manako e lalolagi ke talitonu a tautolu to tumau tukulagi e fakatokaaga nei. Ka e, nakai pihia e talahauaga he Kupu he Atua ki a tautolu. (1 Ioa. 2:15-17) Kua lagomatai a tautolu ke loto fakaaue ko e ‘tanaki e tau koloa he lalolagi’ ko e tau mena fakateaga. Ke fakamalolō e tau tagata he Atua, to fakalaulahi he fakaholoaga he toloaga he takaiaga ma e tau he fekafekauaga he 2007 e matakupu, ‘Kia Tanaki e Tau Koloa ke he Lagi.’​—Mata. 6:19, 20.

Ko e manamanatu velevelekoloa ne hagaao ki ai he Efeso 2:2 ko e “pule ha he pulagi, ko e agaga haia kua gahua ai ni ainei kia lautolu kua faliuliu.” Tuga ni e matagi mooli ne ha ha ai ke he tau matakavi oti, ne fafagu ki ai, ti holofa pihia foki e “agaga he lalolagi nai.” (1 Kori. 2:12) Ha kua pikitia lahi e fakaohoohoaga haana, ne pehē kua ha ha i ai e “pule.” Ko e fakaholoaga foou he toloaga he takaiaga ka lagomatai a tautolu ke kalo mai he manamanatu velevelekoloa ti hagaaki katoatoa tumau ke he tau mena kua mua e aoga ki a tautolu. (Mata. 6:33) Lafi ki ai, to lagomatai he fakaholoaga a tautolu ke falanaki ki a Iehova he taute e fekafekauaga ha tautolu pete ne tau peehiaga mo e tau kamatamata ne liga fehagai mo tautolu.

Manatu ke fakalataha a koe ke he tau aho ua ia mo e ke maeke a koe ke “au atu ai he manamanatu.” (Hepe. 2:1) Fakamaumau hifo e tau manatu ku ka maeke ke fakagahua e koe ke he moui mo e fekafekauaga haau. He fakalataha ke he kamataaga ke hoko ke he fakaotiaga he fakaholoaga fakaagaaga uho nei, to atihake mo e fakamalolō a koe ke fakatumau ke ‘tanaki e tau koloa ke he lagi’!