Fakaholoaga Foou he Aho Toloaga Pauaki

Ha kua moua e agaaga tapu, ne malolō lahi mahaki e tau Kerisiano fakamua ke foaki fakamakutu ke he fakapuloaaga he tala mitaki. (Gahua 1:8; Kolo. 1:23) Ko e fakaholoaga ma e aho toloaga pauaki he tau he fekafekauaga he 2007, “Kia Fakamatala Katoatoa e Kupu,” ka lagomatai a tautolu ke mumuitua e tau fakafifitakiaga mitaki lahi ha lautolu.​—Gahua 18:5, NW.

He tutala ke he Kupu he Atua, ne pehē e Patuiki ko Tavita: ‘Kua hakohako e fakatufono a Iehova, kua liuaki mai e agaga ha lautolu kua goagoa.’ (Sala. 19:7) Ko e fakaholoaga ne kua taute fakamakutu ma e aho toloaga pauaki he 2007 to fakakite e aoga he tau Tohiaga Tapu “ke fakatonu ai” mo e to fakamalolō a tautolu oti ke fakaaoga e Kupu he Atua ke fakamatala mo e ke fakaako mo e aga fakamafiti. (2 Timo. 3:16, 17) Ko e fakaholoaga foou to fakakite e puhala ke kalo mai a tautolu he tau matahele mo e ke aoga ai he fakagahua e tau matapatu fakaakoaga he Tohi Tapu he tau momoui ha tautolu he tau aho takitaha. To lagomatai foki a tautolu ke fakaaoga e Kupu he Atua ke lagomatai e tau fuata ke tupu ki mua fakaagaaga.

Kia lali ke haia i ai ka kamata e fakaholoaga, mo e fanogonogo fakamitaki. Fakamaumau hifo e tau manatu kua maeke ia koe ke fakagahua fakatagata. Fakakite e loto fakaaue haau ma e tau fakaakoaga mo e tau fakamanatuaga kua tuku mai, ti manamanatu ke he puhala kua amanaki a koe ke fakagahua e tau mena kua ako.

Ko e fakaholoaga he aho toloaga pauaki ka fakalahi e loto fakaaue ha tautolu ke he Kupu he Atua, to fakamanatu ki a tautolu ke mauokafua tumau he fakamatala e tala mitaki he Kautu mo e fakamakutu, mo e fakakite ki a tautolu e puhala ke lagomatai falu ke taute pihia foki. Ti kia eketaha ke nakai to noa he ha takitakiaga fakaagaaga mo e fakamaamaaga mai ia Iehova ke he mena nei!​—Isaia 30:20e, 21.