Tapuaki ki a Iehova ko e Magafaoa
1 He vahā Tohi Tapu, ne loga e mena ne taute auloa he tau tagata he magafaoa. Ne taute e lautolu e tau gahua kaina he tau aho takitaha mo e mua atu ne tapuaki ki a Iehova ko e magafaoa. (Levi. 10:12-14; Teu. 31:12) Ke he loga he tau matakavi he vahā nei, ne tote maka e mena ne taute auloa he tau tagata he magafaoa. Pete ia, kua mailoga he tau Kerisiano e aoga he fakalataha ke he tau matagahua ko e magafaoa, mua atu ka hoko ke he tapuakiaga. Kua fakafiafia mooli e Punaaga he magafaoa ke kitia e tau magafaoa hane tapuaki fakalataha ki a Ia!
2 Fakamatala Auloa: He gahua fakalataha ke fakamatala e tala mitaki kua fakamalolō e pipiaga he magafaoa. Ko e mena ia, he lafi ke gahua auloa mo e falu he fakapotopotoaga ke fakamatala, to gahua tumau foki e motua mo e hoana mo e tau fanau haana. (1 Timo. 3:4, 5) Pete e lavelave e setulu, kua maeke he tau leveki faifano ke fakatoka foki e magaaho ke gahua mo e tau hoana ha lautolu he fekafekauaga.
3 Ko e tau matua ne fakamatala mo e tau tama ha lautolu kua maeke ke lagomatai e fanau ke holo ki mua ke eke mo tau tagata fakamatala. To nakai ni mailoga he tau tama e fiafia mo e makona he tau matua ha lautolu ke he fekafekauaga ka e to kitia e lautolu e tau matua ha lautolu ne fakakite e fakaalofa ni ha lautolu ma Iehova mo e tau tagata. (Teu. 6:5-7) Ko e aoga he mena nei kua nakai fakatote hifo he lalahi hake e fanau he kaina. Taha e hoa ne tolu e tama taane ne 15 ke he 21 e tau tau he moui nukua matutaki ke faihoani a laua he fekafekauaga he tau magaaho oti. Ne pehē e matua taane: “Fai mena tumau ne fakaako e maua ki a lautolu he tau magaaho takitaha. Ti taute mooli e maua mo mena fiafia mo e atihake.”
4 Tauteute Auloa: Kua moua he tau magafaoa e aoga ke tauteute auloa ma e fekafekauaga. Kua fa fiafia e tau tama ke he tau magaaho fakamahani mo e tau tagata he magafaoa he fakafetokaki ke taute e tau fakatātāaga po ke eke mo tagata he kaina. Kua fakaaoga he falu e tau minuti gahoa he matahiku he fakaakoaga fakamagafaoa ke taute e mena nei.
5 Kua malikiti e olioli ha tautolu ka fakalataha ke he tau matagahua aoga mo e makona mo lautolu ne ofania e tautolu. Ko e olioli ha ia ma e tau tagata he magafaoa ke gahua auloa he fekafekauaga he fonua mai he taha fale ke he taha fale ti pihia mo e tau liu aahi atu mo e taute e tau fakaakoaga Tohi Tapu! He tapuaki a koe mo e magafaoa haau ki a Iehova, maeke ia koe ke talahau fiafia: “Ka ko au mo e haku a magafaoa, to fekafekau a mautolu kia Iehova.”—Iosua 24:15.