Muitua e Fakafifitakiaga ne Fakatoka e Iesu
1. Ko e heigoa e fakafifitakiaga ne fakatoka e Iesu?
1 He fakalataha a tautolu ke he gahua taute tutaki, kua lata ke tokaloto e tautolu ko e fakafifitakiaga ha tautolu to lauia lahi a lautolu kua kitekite mai. Ne fakaako a Iesu ke he kupu mo e gahua. Ko lautolu ne kitekite ki a ia kua maeke ke kitia haana makutu, fakaalofa ma e tau tagata, manako lahi ke fakatokoluga e higoa he haana Matua, mo e mauokafua a ia ke taute e finagalo he haana Matua.—1 Pete. 2:21.
2. Ko e tau puhala fe he fakafifitakiaga ha tautolu ka lauia a lautolu ka gahua mo tautolu he fekafekauaga?
2 He Fekafekauaga he Taha Fale ke he Taha Fale: Ke tuga a Iesu, ko e fakafifitakiaga ha tautolu kua fakaohooho a lautolu kua gahua fakalataha mo tautolu. Ka mailoga he tau tagata fakailoa foou mo e nakaila mahani lahi e makutu ha tautolu he fakalataha ke he fekafekauaga, to manamanatu a lautolu ke he kakano uho he fakalataha ha lautolu ke he gahua fakamatala. Ka kitia e lautolu e olioli mo e fiafia mooli ha tautolu ke he falu tagata, to fakamanatu ki a lautolu e aoga he fakatātā e tau aga pihia he fekafekauaga ha lautolu. Ka mailoga e lautolu e makai ha tautolu he fakaaoga e tau Tohiaga Tapu, he taute e tau liu aahi atu, mo e he taute e tau fakaakoaga Tohi Tapu, to omoomoi a lautolu ke taute pihia foki.
3. Liga fakaako fēfē he fakafifitakiaga ha tautolu e tau tagata fakaako Tohi Tapu, mo e ko e heigoa ha lautolu ka ako?
3 Ka Taute e Tau Fakaakoaga Tohi Tapu: To kitia mooli he tau tagata fakaako Tohi Tapu ha tautolu e tau mahani ha tautolu. Ma e fakatai, pete he liga fakamaama e tautolu e aoga lahi he tauteute ma e fakaakoaga, kumi e tau kupu tohi, mo e fakamailoga e tau matapatu manatu, to kitia e lautolu kua mau tauteute a tautolu po ke nakai. (Roma 2:21) Ka hoko tuai a tautolu he magaaho kotofa ke fakaako mo lautolu, to nakai manako a lautolu ke fakaatā e falu gahua ke tauhele e fakaakoaga Tohi Tapu ha lautolu. To nakai fakauaua foki to mailoga e lautolu e foaki noa fakatagata ha tautolu ma e fekafekauaga mo e tua katoatoa ha tautolu. Nakai ofo ai ko e tau tagata fakaako ha lautolu ne muitua fakatata ke he fakafifitakiaga ha Iesu kua fa mahani ke eke mo tau tagata fakamatala makutu mo e fua mitaki.
4. Ka o atu a tautolu ke he tau feleveiaaga he fakapotopotoaga, ko e heigoa ne fakaako he fakafifitakiaga ha tautolu?
4 Ka O Atu he Tau Feleveiaaga he Fakapotopotoaga: Kua fai vala a lautolu oti he fakapotopotoaga Kerisiano ke fakaako, puhala he fakafifitakiaga he tau feleveiaaga he fakapotopotoaga. Ko lautolu ne fiafia ti kamata ke fakalataha mai ke he tau feleveiaaga to aoga mai he fakafifitakiaga mitaki ne kitia e lautolu he fakapotopotoaga. To mailoga e lautolu e mafanatia fakamatakainaga, fakalatahaaga Kerisiano, mo e gali e tau tapulu mo e tauteuteaga. (Sala. 133:1) Ko e fakafifitakiaga ha tautolu he fakamooli ke fakalataha ke he tau feleveiaaga he fakapotopotoaga mo e ke talahau e tua ha tautolu ke he tau tagata to mailoga foki. Ko e tagata ahiahi ke he taha he tau feleveiaaga ha tautolu ne kitia e mafiti he tama fifine tote he kumi he kupu tohi i loto he Tohi Tapu ni haana mo e puhala ne muitua fakamatafeiga a ia he totou ai. Ne omoomoi he fakafifitakiaga he tama fifine a ia ke ole ma e fakaako Tohi Tapu.
5. Ko e ha kua nakai lata ia tautolu ke fakateaga ke he aoga he fakafifitakiaga ha tautolu?
5 Kua fakamalolō he tau Tohiaga Tapu a tautolu ke mumuitua ke he fakafifitakiaga mitaki he falu. (Filipi 3:17; Hepe. 13:7) Ko e mena ia, kua lata ia tautolu ke manatu kaeke ke muitua fakatata e tautolu e fakafifitakiaga ne fakatoka e Iesu, to kitia ai he falu mo e maeke ke omoomoi a lautolu ke he puhala mitaki. He mailoga e mena nei, kia tokaloto e tautolu e tau kupu he 1 Timoteo 4:16: “A koe kia koe ni, katoa mo e hau a fakaako atu, kia tumau ki ai.”