Fakamafana e Tau Loto Malipilipi
1 Ne nakaila fai magaaho ia he fakamauaga tuai he tagata ne kua mua atu e lata ke foaki e fakamafanaaga. He muitua ke he takitakiaga he Patuiki ha tautolu, ko Keriso Iesu, kua gahua foki a tautolu ke “pipi e tau loto ne malipilipi.”—Isaia 61:1.
2 Puhala: Ke fakamafana e tau tagata, kua lata e fekafekauaga ha tautolu ke mailoga he tau mena ka talahau ne lagotatai mo e atihake. Ka fakatote hifo e tautolu e tutala ke he tau gahua kelea he lalolagi mo e tau taofiaga fakavai, to eke e kupu mooli he tau Tohiaga Tapu mo e amaamanakiaga fiafia he tau maveheaga mafanatia he Atua mo matapatu he fakatutalaaga ha tautolu. Kua nakai kakano e mena nei ke nakai lata ke tutala hagaao ki a Amaketo. Ko e poakiaga ha tautolu ke fakapuloa e “tau ke fakaalofa mai ai a Iehova, mo e aho ke lalago ai he Atua ha tautolu,” mo e ke “vagahau atu a koe kia ia ke mafanatia a ia, ke liu mai a ia he hana puhala kelea.” Pete ia, ko e vagahau atu hagaao ki a Amaketo mo e fakamaamaaga ke he mena ka tupu mai he moumouaga ia kua nakai kakano ke ufiufi e matapatu he tala mitaki ke he Kautu he Atua.—Isaia 61:2; Eseki. 3:18; Mata. 24:14.
3 Mai he Taha Gutuhala ke he Taha Gutuhala: Ko e mena aga mau ke feleveia mo e tau tagata ne fakaatukehe ha kua gagao, ko e mate e fakahele, tau nakai fakafili tonu, po ke tau lekua fakatupe. Ha ko tautolu kua fifitaki ke he Keriso, kua “fakaalofa hohofi” a tautolu mo e fakakite e aga totonu ki a lautolu kua feleveia mo tautolu he fekafekauaga. (Luka 7:13; Roma 12:15) Pete kua totou e tautolu taha po ke ua e kupu tohi ne felauaki ke he lekua, kua lata ia tautolu ke “alumaki ke fanogonogo,” ti fakaatā e tagata ke talahau haana tau logonaaga. (Iako. 1:19) He mole e fanogonogo fakamua, to mautauteute mogoia a tautolu ke foaki e fakamafana.
4 He magaaho kua latatonu he fakatutalaaga, to liga pehē a tautolu, “Manako au ke totou mo koe falu kupu mafanatia mai he Tohi Tapu.” Kua lata ke fifili fakamitaki ke nakai eketaha ni ke fakahako e tau onoonoaga hepe oti ka liga talahau he tagata. Ka ko e matapatu ha tautolu ke foaki e fakamalolōaga mo e fakamafanaaga he fakaaoga e tau Tohiaga Tapu ke atihake e loto. Hagaao ke he mena nei, maeke ia koe ke kumi e Reasoning From the Scriptures lau 117-121 i lalo he mataulu “Fakamalolōaga.” Po ke maeke ia koe ke age ke he tagata he fale e lagaki he tuleke Fakamafana a Lautolu ne Fakaagitau ti fakatutala ke he tau vala tala atihake i loto.
5 Kumi Magaaho ke Fakamafana Falu: Iloa nakai e koe taha tuuta kaina, kapitiga gahua, kapitiga aoga, po ke tagata he magafaoa ne kua manako ke he fakamafanaaga? Maeke nakai ke lali ke aahi atu ki a lautolu ia he tau kaina ha lautolu mo e foliaga ke fakamafana mai he tau Tohiaga Tapu? He iloa e kakano ne manako fakamafanaaga a lautolu, kua maeke ia koe ke mautauteute ma e tuaga pauaki ia. Hagaao ke he mena nei, ko e falu kua tohi e tau tohi po ke vilo atu he telefoni. Ko e fakaalofa mooli ke he katofia ka omoomoi a tautolu ke fakakite e fakaalofa mooli mo e foaki e fakamafanaaga kua lata ne mai he tau Tohiaga Tapu.—Luka 10:25-37.
6 E, kua poaki ki a tautolu ke fakamafana a lautolu ne maanu, ke atihake e tau loto kua momoko, mo e talahau e amaamanakiaga ma e tuaga fiafia anoiha. Ko e fakamafanaaga hanei kua manako e tau tagata he lalolagi katoa ki ai. Ko e tutala fiafia hagaao ke he tau mena mitaki nukua mavehe mai he Atua ka tamai e mafanatia mo e amaamanakiaga ke he tau tagata loto fakamooli. Kia manatu tumau e tautolu e lata ke fakamafana a lautolu kua loto malipilipi.