Fakamafanatia a Lautolu kua Fakatutuku
1. Ko e ha kua lata ke fakamafanatia a lautolu kua fakatutuku?
1 Ko e logonaaga momoko lahi mahaki ka mate e fakahele, mua atu ki a lautolu ne nakai fai amaamanakiaga ke he Kautu. (1 Tesa. 4:13) Tokologa kua fa manamanatu: ‘Ko e ha ne mamate e tau tagata? O ki fe a lautolu? To liu nakai au ke kitia e fakahele haaku?’ Kua ha ha i lalo e falu manatu ke fakamafanatia a lautolu ka feleveia mo tautolu he gahua he fonua ne kua fakatutuku he mate taha he magafaoa po ke kapitiga.—Isaia 61:2.
2. Kaeke ke tala mai e tagata he kaina ki a tautolu kua maanu a ia, kua lata kia ke fakamakamaka ni a tautolu ke fakamatala fakalaulahi atu?
2 He Taha Gutuhala ke he Taha Gutuhala: Kua liga tala mai e tagata he kaina ki a tautolu ko e fai tagata ne mate foou he magafaoa haana. Kua lahi kia e maanu haana? Kua puke kia e fale he tau tagata he magafaoa hane maanu? He tau tuaga pihia, kua liga mitaki ke nakai fakamatala fakalaulahi atu. (Fakama. 3:1, 7) Liga maeke ia tautolu ke talahau e tau manatu momoko ha tautolu, foaki taha tuleke, mekasini, po ke porosua kua felauaki, ti mavehe fakatekiteki. Ti maeke ke liliu atu a tautolu he taha magaaho hagahaga mitaki ke tutala fakalaulahi ke he fakamafanatia mai he Tohi Tapu.
3. Kaeke kua hagahaga mitaki e tau tuaga, ko e heigoa e tau kupu tohi ka liga fakakite e tautolu ke he tagata he kaina hane maanu?
3 Ke he falu magaaho, liga mailoga e tautolu kua lata ke lahi e mena ka talahau he feleveiaaga fakamua. Ka e nakai ko e magaaho anei ke fakahako e tau onoonoaga hepe, liga maeke ia tautolu ke totou e kupu Tohi Tapu mo lautolu ke he maveheaga he liu tu mai. (Ioane 5:28, 29) Po ke maeke ia tautolu ke fakakite e talahauaga he Tohi Tapu hagaao ke he tuaga ha lautolu kua mamate. (Fakama. 9:5, 10) Liga ko e taha tala Tohi Tapu hagaao ke he liu tu mai ka foaki foki e fakamafanatia. (Ioane 11:39-44) Taha puhala foki ko e talahau e tau kupu he amaamanakiaga ki a Iehova ne fakakite e Iopu ne tua fakamooli. (Iopu 14:14, 15) Ato mavehe, liga foaki e tautolu e What Happens to Us When We Die?, Ka Mate a Ia ne Ofania e Koe, po ke taha porosua foki po ke tuleke kua lata. Po ke liga toka e tautolu e tohi Fakaako he Tohi Tapu, talahau e vala tala he veveheaga 6, ti fakatoka ke fakatutala e vala tala ia ka liliu.
4. Ko e heigoa falu magaaho foki ke foaki e tautolu e fakamafanatia?
4 He Falu Magaaho: Kaeke ke taute e mauku po ke liogi he mate he Fale he Kautu, to o mai nakai falu ne nakai talitonu? Kua maeke ke foaki e tau tohi fakamafanatia ki a lautolu. Ko e falu fale mate kua loto fakaaue he moua e tau tohi kua lata ma e tau magafaoa kua mauku. He falu magaaho, kua hafagi he tau fakailoaaga ki a lautolu kua mamate ne tutū he nusipepa e puhala ke tohia e tohi fakamafana kū ke he tau tagata he magafaoa ne fakatutuku. Ko e taha mena ne tupu, he mole e moua e tohi mo e falu tuleke i loto, ne o atu e tagata taane ne takape mo e tama fifine haana ke he kaina he tagata fakailoa mo e hūhū: “Ko mutolu kia e tau tagata ne fakafano mai e tohi nei? E, kua manako au ke iloa lahi hagaao ke he Tohi Tapu!” Ne talia he tagata taane nei mo e tama fifine haana e fakaakoaga Tohi Tapu ti kamata ke o he tau feleveiaaga he fakapotopotoaga.
5. Ko e ha kua lata ia tautolu ke mataala ke he tau magaaho ke fakamafanatia a lautolu kua fakatutuku?
5 Pehē ia Fakamatalaaga 7:2: “Kua mua he mitaki he fano ke he fale kua tagi ai, ke he fano ke he fale kua eke ai e galue.” Kua fa mahani e tagata ne fakatutuku ke fanogonogo ke he Kupu he Atua ka fakatatai ke he tagata kua fiafia. Kua lata ia tautolu oti ke mataala ke mailoga e tau tuaga mitaki ke fakamafanatia a lautolu kua fakatutuku he mate e fakahele.