Aho Pauaki ke Foaki e Tau Fakaakoaga Tohi Tapu
1 Kamata ia Ianuari, to igatia e fakapotopotoaga mo e fifili e taha matahiku vahātapu he tau mahina takitaha, liga he matahiku vahātapu fakamua, ke hagaaki he foaki e tau fakaakoaga Tohi Tapu. To taute e mena nei he Aho Faiumu po ke Aho Tapu, uta ni ke he mena ne felauaki mo e fakapotopotoaga. He aho ia kaeke ke nakai talia he tau tagata he kaina e foakiaga ia, maeke agaia he tau tagata fakailoa ke foaki e tohi Fakaako he Tohi Tapu po ke toka e tau mekasini foou. Kua lata e tau motua mo e tau fekafekau lagomatai oti ke fakalataha katoatoa ke he gahua nei mo e lagomatai e tau tagata fakailoa ke kamata e tau fakaakoaga Tohi Tapu.
2 To fifili he Komiti Fekafekau he Fakapotopotoaga e aho he matahiku vahātapu ke fakatoka kehe ke foaki e tau fakaakoaga Tohi Tapu. Ko e tau fakamanatu tumau kua lata ke talahau ke maeke he tau tagata fakailoa ke mautauteute mo e lali pauaki ke foaki e tau fakaakoaga Tohi Tapu mai he taha fale ke he taha fale mo e ka aahi atu ki a lautolu ne fakakite e fiafia he magaaho fakamua.
3 Puhala ke Mautauteute: Moua e tautolu e tau lagomataiaga ke kamata e tau fakaakoaga Tohi Tapu he uho he Ha Tautolu a Fekafekauaga he Kautu ia Ianuari 2006 mo e tohi Reasoning he lau 12. Liga fifili e falu ke fakaaoga e tuleke, tuga e Manako Nakai a Koe ke Iloa e Kupu Mooli? Kua foaki mai foki he Ha Tautolu a Fekafekauaga he Kautu ia Aokuso 2007 he lau 3 e tau lagomataiaga ke kamata e tau fakaakoaga Tohi Tapu ka liu aahi atu ki a lautolu ne talia e tau mekasini. Kua lata ke setulu he tau motua mo e tau fekafekau lagomatai ke taute e feleveiaaga kū ne 10 ke he 15 e minuti ma e gahua he fonua, ti fakatutala po ke fakatātā taha po ke ua e manatu aoga ke kamata e tau fakaakoaga Tohi Tapu.
4 Mooli, to nakai talia he tau tagata oti e fakaakoaga Tohi Tapu po ke fakatumau e fakaakoaga ha lautolu. Kua nakai lata he mena nei ke taofi a tautolu, ha ko Iehova ne futiaki mai a lautolu ne tuga e tau mamoe ke he fakatokatokaaga haana. (Ioane 6:44) Ne nakai ni ko e matagahua ha tautolu ke gana e tau tega he kupu mooli, ka e pihia ke feaki mo e fakamalū a lautolu ne fai vaka, nukua putoia foki e fakaako e Tohi Tapu mo lautolu ne loto hako. He taute pihia, kua fakagahuahua e tautolu e kotofaaga ko e tau ekegahua he Atua.—1 Kori. 3:9.