Fakaako ke he Puhala Mukamuka
1. Ko e heigoa e taha vala aoga lahi he fakaako atu ne maama mo e lauia mitaki?
1 Ko e puhala mukamuka e matapatu ke he fakaako atu ne lauia mitaki. Manamanatu ke he puhala fakaako ha Iesu, ko e Faiaoga ne Mua, ka lagomatai a tautolu ke fakaholo ki mua e ‘puhala fakaako atu’ ha tautolu.—2 Timo. 4:2; Ioane 13:13.
2. Ko e heigoa ne putoia ka fakaako atu ke he puhala mukamuka, ti ko e heigoa e tau lauiaaga he fakaako atu pihia?
2 Vagahau ke he Puhala Mukamuka: Ha ha he Lauga he Mouga e falu kupu mooli mua ue atu ne talahau ai he tagata ke he puhala mukamuka. (Mata., veveheaga 5-7) Ko e moto tagata ne fanogonogo ki a Iesu ne ‘ofomate ke he hana tau kupu.’ Ne omoomoi e tau fekafekau ne fakafano atu ke tapaki a ia ati talahau e lautolu: “Kua nakai fai tagata taha ke vagahau ke tuga e tagata na.” (Mata. 7:28, 29; Ioane 7:46) Kua nakai lata ia tautolu ke fakaaoga e tau kupu uka, tau alaga kupu halahū, po ke tau fakataiaga fakamatafeiga ke talitonu katoa he falu e kupu mooli. Maeke e kupu mooli ke fakamaama fakamaaliali he fakaaoga e tau kupu fa mahani.
3. Ko e ha ne liga tapoohi he falu e toloaga ha lautolu, ti maeke fēfē ke kalo mai he mena nei?
3 Fatifati e Lahi: Ne manamanatu a Iesu ke he toloaga haana he fifili e lahi he vala tala ka tala age ki a lautolu he taha e magaaho. (Ioane 16:12) Kua lata ia tautolu ke matakite mo e hikihiki ke he mena nei, mua atu ka fakamatala ke he tau magafaoa, tau tagata fiafia foou, po ke tau fanau. Kua lata ia tautolu ke fakaeneene ke nakai tapoohi a lautolu aki e tau vala tala pete ne tuga kua fanogonogo fakamakutu a lautolu. Ko lautolu ne loto fakamooli to matutaki ke fakaako ke iloa e Atua mooli, ko Iehova.—Ioane 17:3; 1 Kori. 3:6.
4. Ko e ha kua aoga ke hagaaki ke he tau matapatu manatu ka e nakai ke he tau kupu fakamatafeiga?
4 Hagaaki ke he Tau Matapatu Manatu: Ne nakai fakamalokiloki e Iesu e fakaako atu haana he loga lahi e tau kupu fakamatafeiga. He pehē a ia: “[Ko] lautolu katoa ha he [“tau tuagamau fakamanatu,” NW], [to] o mai ai,” nakai ko e magaaho a ia ma haana ke tala age e tau mena loga hagaao ke he ua e vahega ha lautolu ka fakaliu tu mai. (Ioane 5:28, 29) Ka taute e tau fakaako Tohi Tapu, kua lata ia tautolu ke hagaaki ke he tau matapatu manatu mo e fakamamao mai he hihiga ke talahau e tala ne nakai lata mo e fakaakoaga he tohi.
5. Ko e heigoa e monuina kua liga moua e tautolu ka fakaako atu ai ke he puhala mukamuka?
5 Ko e fakaaue ha ia ha tautolu ha kua fakaako e Iehova a tautolu ke he puhala mukamuka ke he tau mena oti kua lata ia tautolu ke iloa! (Mata. 11:25) Maeke ia tautolu ke fakaaoga ai e puhala mukamuka ke he fakaako atu ha tautolu ti moua e tau olioli he gahua fakamatala ne fua mitaki.