Tolu e Puhala ke Fakaholo ki Mua e Fakaako Atu Haau
1. Ko e ha kua lata ia tautolu ke kumi ke fakaholo ki mua e fakaako atu ha tautolu?
1 Ko e tau tagata fakailoa Kerisiano oti ko e tau faiaoga. He ha tautolu a o atu fakamua, liu aahi atu ke fakaholo ki mua e fiafia, po ke taute e fakaako Tohi Tapu, kua foaki e tautolu e tau vala tala. Ko e tau vala tala oti ne fakaako e tautolu kua uho lahi. Kua fakakikila e tautolu e maama ke he “tau Tohi Tapu,” ke maeke e tau tagata ke ‘fakailoilo ke moua ai e moui.’ (2 Timo. 3:15) Ko e lilifu homo ue atu! Hanei tolu e puhala ke fakaholo ki mua e fakaako atu ha tautolu.
2. Maeke fēfē a tautolu ke fakaako ke he puhala mukamuka?
2 Fakamukamuka: Ka iloa mitaki e tautolu e matakupu, maeke ai ke mukamuka ke nimo e puhala uka he vala tala ka liga nakai iloa mitaki he taha tagata. Ti ka taute e fakaako Tohi Tapu, kia nakai fakalokiloki e fakaakoaga haau aki e tau vala tala matafeiga loga ne nakai aoga. Ka e fakamaama age e tau matapatu manatu. Ko e tutala tumau nakai kakano kua mitaki e fakaako atu. (Fakatai 10:19) Kua fa mitaki lahi mahaki ke totou ni e tau matapatu kupu tohi. Ka oti e totou e kupu tohi, hagaaki ke he vala kua fakatutala ki ai. Ko e Lauga he Mouga, ne fakamau ia Mataio veveheaga 5 ke he 7, kua ha ha i ai e hokulo he tau kupu mooli, ka e fakaako e Iesu ke he puhala mukamuka mo e tau kupu gahoa ne fifili fakamitaki.
3. Ko e heigoa e uho he tau fakataiaga, ti ko e vahega fakataiaga fe kua fa mitaki lahi?
3 Tau Fakataiaga: Fakalagalaga he tau fakataiaga e manamanatuaga, fakaohooho e tau logonaaga, mo e lagomatai ke manatu. Ua logona hifo kua lata a koe ke eke mo tagata talahau tala ke talahau e tau fakataiaga mitaki. Fa fakaaoga e Iesu e tau fakataiaga kū ne nakai halahū. (Mata. 7:3-5; 18:2-4) Ko e tau fakatino mukamuka ne vali he laupepa ka aoga lahi foki. He manamanatu tuai ki ai, ka moua e koe e tau fakataiaga lauia mitaki.
4. Maeke fēfē a tautolu ke fakaaoga fakamitaki e tau hūhū?
4 Tau Hūhū: Taute he tau hūhū e tagata fakaako haau ke manamanatu. Ko e mena ia, kia fakauka ka oti e talahau e koe e hūhū. Ka tala age mafiti e koe e tali, to nakai iloa mooli e koe e mena ne maama he tagata fakaako haau. Ka hepe e tali haana, liga mitaki ke takitaki a ia ke he fakahikuaga hako he fai hūhū foki ka e nakai fakahako hokoia a ia. (Mata. 17:24-27) Mooli, nakai ko e tau faiaoga mitaki katoatoa a tautolu. Ko e mena ia, kua fakamafana he Tohi Tapu a tautolu ke mataala tumau ke he fakaako atu ha tautolu. Ko e taute pihia e tautolu to tamai e tau monuina tukulagi ki a tautolu mo e ki a lautolu oti kua fanogonogo ki a tautolu.—1 Timo. 4:16.