Ko Hai Ka Fiafia ke he Mena Nei?
1. He totou a tautolu ke he lagaki he Ko e Kolo Toko po ke Awake! ko e heigoa ha tautolu kua lata ke manamanatu ki ai, mo e ko e ha?
1 Na tauteute Ko e Kolo Toko mo e Awake! ke lata ma e fonua he lalolagi katoa. Ko e mena ia, kua loga e tau matakupu kehekehe i loto he tau vala tala. He totou e tautolu e tau vala tala takitaha he lagaki ni ha tautolu, kua lata ia tautolu ke manamanatu ko hai ka fiafia ki ai, ti eketaha ke foaki ai ke he tagata pihia.
2. Ko e heigoa e tau mataulu tala he tau mekasini ha tautolu ka fiafia pauaki e falu ki ai?
2 Kua fakatutala kia e Kolo Toko foou ke he matakupu faka-Tohi Tapu ne tutala a koe mo e kapitiga gahua haau ki ai he mogo kua mole? Fai vala tala kia ke he moui magafaoa ka liga lagomatai e taha he magafaoa? Fai tagata nakai ne fa mahani mo koe kua taute ke fenoga atu ke he taha motu ne kua fakakite i loto he Awake!? Fai mekasini nakai ka liga fiafia pauaki ki ai e falu pisinisi po ke tau matakau he fakatufono ne ha ha he matakavi haau? Ma e fakatai, ko e mekasini ne fakamaama e tau mena uka ne fehagai ki ai e tau tagata momotua to liga fiafia pauaki ai e tau kaina ne leveki a lautolu. Ko e tau matakau ne leveki e tau matafakatufono to liga fiafia ke he mekasini ne hagaao ke he matahavala.
3. Talahau e mena ne tupu ke fakakite e mitaki he foaki e tau fufuta mekasini pauaki ki a lautolu kua liga fiafia ke he tau vala tala i loto.
3 Tau Fua Mitaki: He moua e Awake! ia Oketopa 2011 ke he “Puhala ke Feaki e Tau Tama Mitaki,” ko e hoa mau i Aferika Toga ne vilo atu ke he 25 e aoga he matakavi he fakapotopotoaga ha laua. Tokouafulu ma ua ne talia e tau lagaki ti tufatufa ai ke he tau tama aoga ha lautolu. Ko e taha hoa mau he motu ia ne manatu pihia foki ti foaki e tau lagaki ke he tau aoga he matakavi ha laua. Tau faiaoga he taha aoga ne fifili ke fakaaoga e mekasini he tau fakamahaniaga he tau faahi tapu takitaha mo e he fakaholoaga totou ha lautolu. Ne tala age he hoa mau e mena nei ha laua ke he leveki takaiaga. Ti fakamalolō mogoia e ia e tau fakapotopotoaga he takaiaga haana ke o atu ke he tau aoga he tau matakavi ha lautolu. Ne loga lahi e tau ole ne moua he la ofisa ma e mekasini ia ati liu e fufuta ia lolomi foki!
4. Ko e ha kua manako a tautolu ke tufa fakalahi atu e tau mekasini?
4 Kua fakatutala he tau mekasini ha tautolu e kakano mooli he tau mena hane tutupu ti takitaki atu ke he Tohi Tapu mo e Kautu he Atua. Ko e tau mekasini ia ni he lalolagi katoa kua “fakailoa mai e fakamouiaga.” (Isaia 52:7) Ko e mena ia ati manako a tautolu ke tufa fakalahi atu ai. Ko e puhala mitaki ke taute e mena ia ko e hūhū hifo ki a koe, ‘Ko hai ka fiafia ke he mena nei?’