Feaki e Aga ke Hoko Tuai
1. Ko e heigoa e fakafifitakiaga ne fakatoka e Iehova hagaao ke he aga ke hoko tuai?
1 Kua hoko mai tumau a Iehova ke he magaaho tonu. Ma e fakatai, kua foaki e Ia ke he haana a tau fekafekau e ‘lagomatai ke he aho kua lata ai.’ (Hepe. 4:16) Foaki foki e Ia e ‘tau mena kai fakaagaaga ke he tau magaaho tonu.’ (Mata. 24:45) Ti maeke a tautolu ke mauokafua ko e aho he ita lahi haana ka hoko mai, to “nakai mule mai.” (Hapa. 2:3) Kua aoga lahi ai ki a tautolu e aga hoko tuai ha Iehova! (Sala. 70:5) Ha kua lavelave mo e nakai mitaki katoatoa e tau tagata, ko e paleko mooli a ia ki a tautolu ke hoko tuai. Ko e ha kua lata ia tautolu ke feaki e aga hoko tuai?
2. Ko e ha e aga hoko tuai kua tamai e lilifu ki a Iehova?
2 Ko e aga ke hoko tuai kua lavea he tau aho fakamui nei he tokologa e tagata kua ofaofa ni a lautolu ka e nakai tautaofi e tau manako. (2 Timo. 3:1-3) Ti ka hoko tuai e tau Kerisiano ke he gahua tupe, tau fakaholoaga, mo e tau feleveiaaga, kua mailoga ai he falu, ti tamai he mena nei e lilifu ki a Iehova. (1 Pete. 2:12) Fa maeke nakai ia tautolu ke hoko tuai ke he gahua tupe, ka e fa mule ke he tau fakaholoaga fakateokarasi? Ko e hoko tuai ke he tau feleveiaaga Kerisiano, putoia ai e lologo hafagi mo e liogi, kua fakatātā ai e manako ke fifitaki ha tautolu a Matua he lagi.—1 Kori. 14:33, 40.
3. Ko e ha e aga ke hoko tuai kua fakakite e manamanatu ke he falu?
3 Ko e aga ke hoko tuai ne fakakite kua manamanatu a koe ke he falu. (Filipi 2:3, 4) Ma e fakatai, ka hohoko tuai a tautolu ke he tau feleveiaaga Kerisiano, putoia foki e tau feleveiaaga ma e gahua he fonua, kua nakai fakalavelave e tau matakainaga. Ke he taha faahi, kaeke kua mahani a tautolu ke hohoko mule, kua fakakite ai ke he falu, kua mua e aoga he magaaho ha tautolu ke he magaaho ha lautolu. Ko e aga ke hoko tuai ne fakatātā kua maeke ke falanaki ki a ia, ko e aga makai foki mo e tua—ko e tau aga ne kua fiafia ki ai e tau tagata kua agaagai ia tautolu.
4. Kaeke kua mule tumau a tautolu, maeke fēfē ia tautolu ke fakatolomaki ki mua?
4 Kaeke kua mule tumau a koe, manamanatu fakahokulo ke he tau kakano ne pihia ai. Fakatokatoka e setulu ne kua latatonu mo koe ke maeke ia koe ke taute e tau matagahua ke he tau magaaho kotofa. (Fakama. 3:1; Filipi 1:10) Ole lagomatai ki a Iehova. (1 Ioa. 5:14) Ko e aga ke hoko tuai ko e taha puhala ke fakakite e loto fakaaue ke he tau poakiaga mua atu ne ua he Matafakatufono—ke fakaalofa ke he Atua mo e ke fakaalofa ke he tau katofia ha tautolu.—Mata. 22:37-39.