Puhala ke Fakamatala he Fakaaoga e Tokaaga Fakatātā he Tau Tohi

Ko e fakamatala he fakaaoga e peleō utafano po ke laulau fakatātā kua fakakite kua lauia mitaki lahi he futiaki mai a lautolu ne loto fakamooli ke he kupu mooli. (Ioane 6:44) Ko e mena ia, ne fakamalolō ke he tau motua ke fakatokatoka e fakamatala ke he toloaga he tau matakavi he fonua he fakapotopotoaga ke he tau faahi ne tokologa e tau tagata ne ō hui ai. Ha kua nakai taha ni e tuaga he tau peleō fakatātā utafano, fa mahani ke nakai lata ke ole fakaatāaga mai he tau tui ne mua. Ko hai kua latatonu ke fai vala? Ko e tau tagata fakailoa ne fakakite e fifiliaga mitaki, fakakite a lautolu he puhala fakalilifu, mo e iloa e puhala fakatutala mitaki. Hanei falu mena ka lagomatai e tau tagata fakailoa ke kautū he taute mo e nakai taute.

Taute:

Kia fakakapitiga, fakafeleveia, mo e lagomatai ke he tau tagata ō fano. Falu tagata fakailoa ne mamali mafanatia mo e mai he loto ti totonu e puhala fakaalofa atu. Ka onoono e taha tagata ke he tokaaga fakatātā he fakatemole a ia, liga pehē a koe, “Maeke a koe ke uta taha mena ka loto a koe.”
Tū he mena kua latatonu e mamao mai he tokaaga fakatātā. Falu matakavi ne kautū e tau tagata fakailoa ka tutū a lautolu nakai mamao lahi mahaki mai he tokaaga fakatātā. Falu ne mailoga ko e puhala nei kua fakauaua aki e tau tagata ō hui ke aafe atu, ti tutū mamao a lautolu mo e fakatali to tū taha tagata he tokaaga fakatātā. He fina atu e tagata ke he tokaaga fakatātā, lali ke tutala ki a ia, liga he hūhū, “Kua manamanatu nakai a koe ke he hūhū ia fakamua?”
Fakaaoga tumau e Tohi Tapu.
Fakamaama e fakaholoaga fakaako Tohi Tapu ke he ha tagata kua uta e taha he tau tohi fakaako ha tautolu, tuga e tohi Fakaako he Tohi Tapu. Tutala ki ai ke fakakite he matini hila e vitiō Ko e Ha ne Fakaako e Tohi Tapu?
Ka maeke, ti moua e vala tala matutaki mai ia lautolu ne fiafia. Ka nakai nofo e tagata he matakavi ha mutolu, matutaki ke he tagata fakailoa he takatakaiaga haana ke fakakia a ia ne fiafia.