Lata Nakai ke Fakalataha ke he Lotu ne kua Fakatokatoka?

Ko e tali he Tohi Tapu

E, manako e Atua ke fakalataha auloa e tau tagata ke tapuaki. Pehē e Tohi Tapu: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; Aua neke tiaki e fakapotopotoaga ha tautolu.”​—Heperu 10:24, 25.

Pehē a Iesu: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:35) Ke fakakite e feofanaki, kua tapuaki fakalataha e tau tutaki ha Iesu. Kua fakatokatoka a lautolu ke he tau fakapotopotoaga ne feleveia tumau ke tapuaki. (1 Korinito 16:19) He puhala nei, kua fakalataha auloa e tau matakainaga he lalolagi katoa.​—1 Peteru 2:17.

Fai mena foki kia e tagata ke taute ke fakalataha ke he lotu?

Fakakite mai he Tohi Tapu kua lata e tau tagata ke fakapotopoto auloa ke tapuaki ke he Atua, ka e nakai fakaako kua fiafia e Atua he fai lotu a ia. Ke talia he Atua, kua lata e tagata ke fakaaoga e tau fakaakoaga ke he moui haana he tau aho oti. Ma e fakatai, pehē e Tohi Tapu: “Ko e hanai e oma [po ke lotu] he Atua kua mitaki mo e fakamoli ki mua he Atua e Matua, ke ahi e tau tagata kua mamate e tau matua, mo e tau fifine takape ke he ha lautolu a matematekelea, kia leveki foki e ia a ia neke ilaila a ia he lalolagi.”​—Iakopo 1:27.