Lata e Tau Mamoe ha Iehova ke Leveki Fakahelehele

“Kia iloa e mutolu ko Iehova ko e Atua a ia; . . . ko e hana a motu a tautolu, ko e fuifui mamoe ne fagai e ia.”​—SALAMO 100:3.

1. Taute fefe e Iehova hana a tau fekafekau?

KO IEHOVA ko e Leveki Mamoe Mua Ue Atu. Kaeke ko tautolu ko e tau fekafekau hana, to kitia e ia a tautolu ko e hana tau mamoe mo e foaki mai ki a tautolu e leveki fakahelehele. Kua fakamafana mo e fakamalolo he ha tautolu a Matua he lagi a tautolu mo e takitaki a tautolu ke he “tau puhala he tututonu ha ko e hana higoa.” (Salamo 23:1-4) Ko e Leveki Mamoe Mitaki, ko Iesu Keriso, ne lahi e fakaalofa ki a tautolu ati foaki e ia hana moui ma tautolu.​—Ioane 10:7-15.

2. Ko e tuaga fe ne moua he tau tagata he Atua a lautolu?

² Ha ko e tau tagata ne moua e leveki fakahelehele, kua maeke ai a tautolu ke talahau mo e salamo: “Kia fekafekau a mutolu kia Iehova mo e fiafia; ati o mai a ki mua hana mo e kalaga fiafia. Kia iloa e mutolu ko Iehova ko e Atua a ia; ko ia ne eke a tautolu, ka e nakai ko tautolu; ko e hana motu a tautolu, ko e fuifui mamoe ne fagai e ia.” (Salamo 100:2, 3) E, kua olioli a tautolu mo e nakai haofia. Kua tuga ai kua puipui mai a tautolu he tau tagata mahani kelea i loto he pa mamoe ne kaupa maka mao.​—Numera 32:16; 1 Samuela 24:3; Sefanaia 2:6.

Tau Leveki Fakamakai he Fuifui Mamoe

3. Taute fefe he tau motua Kerisiano kotofa e fuifui mamoe he Atua?

³ Kua pihia ai ne olioli lahi a tautolu ko e tau mamoe he Atua! Kua takitaki he tau motua kotofa a tautolu. Nakai taute a lautolu ke ‘eke mo iki,’ ke pule ki a tautolu, po ke lali ke eke mo tau iki he tua ha tautolu. (Numera 16:13; Mataio 20:25-28; 2 Korinito 1:24; Heperu 13:7) Ka e kehe mai, ko e tau leveki loto fakaalofa a lautolu ne fakagahuahua e fakatonuaga he aposetolo ko Peteru: “Kia leveki e mutolu e fuifui mamoe he Atua ha ia mutolu, kia leoleo ki ai mo e fakamakai, ka e nakai he ole fakamakamaka ai; aua foki neke eke mo e fia eke koloa, ka ko e loto fiafia. Aua neke tuga he tau tagata kua fia iki ke he kaina he Atua, ka kia eke a mutolu mo tau fakafifitaki ke he fuifui mamoe.” (1 Peteru 5:2, 3) Ne tala age he aposetolo ko Paulo ke he tau motua katofia hana: “Hanai, a mutolu kia mutolu, katoa mo e fuifui mamoe oti kana kua kotofa a mutolu he Agaga Tapu ke eke ai mo leoleo, kia leveki e ekalesia he Atua ne fakafua e ia māna [“aki e toto he Tama ni hana,” NW].” Ti kua lahi ha e fakaaue he tau mamoe ke he tau tagata kotofa nei he agaga tapu ha kua “fakahelehele e fuifui mamoe”!​—Gahua 20:28-30.

4. Ko e faga fakafetuiaga fe ha Charles T. Russell mo e fuifui mamoe ne kua talahaua lahi ai?

⁴ Ne foaki e Iesu ke he fakapotopotoaga e “tau mena fakaalofa ke he tau tagata,” ko e falu ko e “tau faifeau,” po ke tau leveki, ne taute ke he puhala fakahelehele e fuifui mamoe ha Iehova. (Efeso 4:8, 11; King James Version) Taha mai he tau tagata nei ko Charles T. Russell, ko e pelesiteni fakamua he Sosaiete he Kolo Toko. Kua ui a ia ko e Faifeau Russell ha ko e tau gahua fakaalofa hohofi hana he leveki e fuifui mamoe i lalo he Iki Leveki Mamoe, ko Iesu Keriso. He vaha nei, kua kotofa he Kau Fakatufono he Tau Fakamoli a Iehova e tau motua Kerisiano, mo e kua fakaeneene ai ke nakai fakaaoga e tau kupu pehenei ke tuga e “faifeau,” “motua,” po ke “faiaoga” mo tau mataulu. (Mataio 23:8-12) Ka e, kua taute he tau motua he vaha fou nei e gahua faifeau, po ke levekiaga, ma e aoga he tau mamoe he fagaiaga ha Iehova.

5. Ko e ha kua lata ai ia lautolu ne fou ke iloa e tau motua kotofa he fakapotopotoaga Kerisiano?

⁵ Ha ko e tau leveki mamoe, kua taute he tau motua e vala ke fakaholo ki mua e fakaagaga ha lautolu ne fou. Ti, kua talahau mai he tohi Iloilo Ne Takitaki Atu ke he Moui Tukulagi, he lau tohi 168: “Kia fakamahani atu ke he tau motua kotofa i loto he fakapotopotoaga. Kua iloa lahi e lautolu ke fakagahuahua e iloilo ke he Atua, ha kua moua e lautolu e tau tutuaga kua lata ma e tau leveki ne kua fakatoka mai i loto he Tohi Tapu. (1 Timoteo 3:1-7; Tito 1:5-9) Aua neke fakauaua ke o atu ke he taha ia lautolu ka manako lagomatai a koe ke kautu mai he aga po ke puhala ne fepa mo e tau poakiaga he Atua. To moua e koe na mumuitua e tau motua ke he tomatomaaga ha Paulo: ‘Kia fakamafana a lautolu kua manava tote, kia lagomatai kia lautolu kua lolelole, kia fakauka ke he tau tagata oti kana.’​—1 Tesalonia 2:7, 8; 5:14.”

Ka Manako a Lautolu ne Fou ke Fakamatala

6. Ko e heigoa e fakaholoaga ke muitua ki ai ka manako e tagata fakaako Tohi Tapu ke eke mo tagata fakailoa he Kautu?

⁶ Ka mole e moua he tagata fakaako Tohi Tapu e iloilo mo e kua fina atu ke he tau feleveiaaga he falu a magaaho, liga to manako a ia ke eke mo tagata fakamatala he Kautu, ko e tagata fakamatala he tala mitaki. (Mareko 13:10) Kaeke ke pihia, kua lata he Fakamoli ne fakaako mo ia ke talahau ke he leveki he fakapotopotoaga, ko ia ka taute mo e taha he tau motua he Komiti Fekafekau he Fakapotopotoaga mo e taha motua foki ke feleveia mo e tagata fakaako Tohi Tapu mo e hana a faiaoga. To fakave ai e tutalaaga ke he tohi Organized to Accomplish Our Ministry, tau lau tohi 98 mo e 99. Kaeke kua kitia he tau motua tokoua nei kua tali tonu a ia ne fou ke he tau fakaakoaga aoga lahi he Tohi Tapu mo e kua fakatatai atu ke he tau matapatu fakaakoaga he Atua, to tala age ai ki a ia kua lata tuai a ia ke fakalataha atu ke he fekafekauaga he fonua.a He magaaho ka hokotaki e fekafekauaga hana he tuku e laupepa hokotaki ke he gahua he fonua, to tohi ai he laupepa mao he Fakamauaga he Tagata Fakailoa he Fakapotopotoaga ne kua tohi ai e higoa hana. Kua maeke ai ia ia ne fou ke hokotaki hana gahua fakamatala fakalataha mo e tau miliona he falu ne fa e olioli ‘he fakamatala e kupu he Atua.’ (Gahua 13:5) Ko e fakailoaaga ko e tagata fakailoa nakaila papatiso a ia, to fakailoa ke he fakapotopotoaga.

7, 8. Ke he puhala fe kua lata ke tuku age ke he tagata fakailoa nakaila papatiso e lagomatai ke he fekafekauaga?

⁷ Kua lata e tagata fakailoa nakaila papatiso ma e lagomatai he tau motua mo e falu Kerisiano momotua foki. Ke fakatai ki ai, kua mua atu e holo ki mua fakaagaga hana ki a ia ne taute e Fakaakoaga Tohi he Fakapotopotoaga ne fano a ia ki ai. Liga moua he tagata fakailoa fou e uka ke vagahau ke lauia mitaki ke he gahua he fale ke he taha fale. (Gahua 20:20) Ti liga to manako lahi a ia mo e lagomataiaga, mua atu mai ia ia ne taute e fakaakoaga Tohi Tapu mo ia ke he tohi Iloilo. Ko e tau lagomatai pihia kua lata, ha kua tauteute e Iesu Keriso e tau tutaki hana ma e fekafekauaga.​—Mareko 6:7-13; Luka 10:1-22.

⁸ Kaeke ke lauia mitaki e fekafekauaga ha tautolu, kua aoga lahi ai ke tauteute fakamua. Ti, ko e tau tagata fakailoa tokoua kua liga tauteute tokoua e tau fakafeleveiaaga ne talahau he tau fufuta he tau mahina takitaha he Our Kingdom Ministry. He magaaho ka kamata ha laua a fekafekauaga he fonua, ko ia ne lahi e iloilo ka liga taute e gutuhala fakamua po ke ke ua aki. Ti he oti e fakafeleveiaaga fakafekapitigaaki, maeke he tau tagata fakailoa ke fakamatala tokoua. Ko e gahua tokoua he fekafekauaga ke he tau fahi tapu gahoa ka takitaki atu ke he tau liu ahi atu mo e fakaakoaga Tohi Tapu foki he kaina ke he tohi Iloilo Ne Takitaki Atu ke he Moui Tukulagi. Ko e tagata fakailoa ne lahi e iloilo ka liga taute e fakaakoaga ke he falu vaha ti age mogoia ke he tagata fou ne fakapuloa e Kautu. To fiafia ha e tau tagata fakailoa kaeke ke feaki he tagata fakaako Tohi Tapu e loto fakaaue ma e iloilo ke he Atua!

9. Ko e heigoa e tau fakatokatokaaga ke taute he magaaho ka manako e tagata fakailoa ke papatiso?

⁹ Ha kua holo ki mua fakaagaga e tagata fakailoa nakaila papatiso, kua maeke ia ia ke taute e tukulele ke he Atua ke he liogi mo e manako ke papatiso. (Fakatatai Mareko 1:9-11.) Kua lata ia ia ke fakailoa e manako hana ke papatiso ke he leveki he fakapotopotoaga, ka fakatokatoka mo e tau motua ke liu fakamanatu mo e tagata fakailoa e tau huhu he tau lau tohi 175 ke he 218 he Organized to Accomplish Our Ministry. Ko e tau vala fa ne kua vevehe e tau huhu ki ai ka liga ke taute laga tolu ni he tau motua tokotolu kehekehe ka maeke ke taute pihia. Kaeke ke fetaliaaki a lautolu ko e tagata fakailoa nakaila papatiso kua lahi e maamaaga ke he tau fakaakoaga he Tohi Tapu mo e kua lata he falu a tau puhala, to tala age a lautolu ki a ia kua maeke a ia ke papatiso. Ti ko e fua he hana a tukuleleaga mo e papatisoaga, kua eke a ia ke “fakamailoga” ma e fakamouiaga.​—Esekielu 9:4-6.

Feleveia mo e Tau Manako Pauaki

10. He oti ai e fakaako hana he tohi Iloilo mo e kua papatiso, to maeke fefe e tagata ke fakatolomaki hana a iloilo faka-Tohiaga Tapu?

¹⁰ Ka oti ai e fakaakoaga Tohi Tapu he tagata ke he tohi Iloilo mo e kua papatiso, kua liga nakai lata ke taute e taha fakaakoaga mo ia ke he tohi ke ua aki, ke tuga e United in Worship of the Only True God.b Kua moli ai, ko e tagata papatiso laia, kua fakaako agaia he tauteute a ia ma e tau feleveiaaga Kerisiano mo e fina atu tumau ki ai. To fai iloilo lafi ki luga foki a ia ka moua he omoomoi he manako hana ma e kupu moli a ia ke totou mo e kumikumi fakatagata ke he tau tohi Kerisiano mo e tutala e tau mena faka-Tohiaga Tapu mo e tau katofia ne tua. Ka e kua ka tupu e tau manako pauaki?

11. (a) Kua lagomatai fefe e Pisila mo Akula a Apolo? (e) Ko e heigoa e lagomatai ka tuku age ke he fuata papatiso laia ne fia loto ke mau?

¹¹ Ko Apolo foki, kua “iloilo ke he tau Tohi” mo e hakotika e fakaakoaga hagaao ki a Iesu, ne moua e lagomatai he magaaho ne “takitaki age ai e laua [Akula mo Pisila] a ia, mo e fakamatala fakatonu atu e puhala he Atua kia ia.” (Gahua 18:24-26; fakatatai Gahua 19:1-7.) Ha kua pihia, liga kua taute e fuata papatiso laia ke fakakapitiga mo e ke mau. Liga to lagomatai he Kerisiano iloilo lahi a ia ke kumikumi e tau fakailoaaga ke he tau fakatutalaaga nei i loto he tau tohi Kolo Toko. Ke tuga ai, ko e tau tala felagomatai hagaao ke he tau mena nei kua ha ha he tohi Questions Young People Ask​—Answers That Work, Veveheaga 7.c Ko e tagata fakailoa ne taute e fakaakoaga Tohi Tapu mo ia ka liga fakatutala mo ia ne fou e tala nei ka e nakai lata ke taute tumau e fakaakoaga.

12. Ko e heigoa e lagomatai ka foaki ma laua he fakamauaga ne papatiso fou ne kua fai lekua?

¹² Kikite ke he taha fakafifitakiaga. Liga kua fehagai mo e tau lekua e tau hoa he fakamauaga ne papatiso fou ke fakagahuahua e tau matapatu fakaakoaga mahani Atua. Liga to o atu a laua ke he taha motua, ne fakamole e falu magaaho afiafi ke fakatutala mo e tau faka-Tohiaga Tapu mo laua mo e fakatonutonu e onoonoaga ha laua ke he fakailoaaga ne moua i loto he tau tohi Kolo Toko. Ka e, kua nakai lata e motua ke liu taute tumau e fakaakoaga Tohi Tapu mo laua.

Ka Hehe a Ia ne Fou

13. Ko e ha kua lata ai he tau motua he fakapotopotoaga ke fakakite e fakaalofa hofihofi noa ke he tagata papatiso fou ne mahani hehe ka e kua tokihala?

¹³ Kua fifitaki e tau motua ke he Leveki Mamoe Mua Ue Atu, ko Iehova, ne pehe mai: “To fagai e au haku a tau mamoe, . . . to pipi e au a ia ne mafatifati, to fakamalolo e au a ia ne lolelole.” (Esekielu 34:15, 16; Efeso 5:1) Ke felautatai mo e agaga ia, ne fakamafana mai e tutaki ko Iuta ke fakakite e fakaalofa hofihofi noa ke he tau Kerisiano fakauku ne kua fakauaua po ke hohoko atu ke he agahala. (Iuta 22, 23) Ha kua tua lahi a tautolu ke he tau Kerisiano iloilo ke mitaki e tau mena ka taute, kua lata ke fakakite e fakaalofa hofihofi noa ke he tagata papatiso fou​—ko e mamoe​—ne hehe ka kua tokihala. (Luka 12:48; 15:1-7) Ko e tau motua, ne ‘fakafili ma Iehova,’ kua lata ke foaki ke he tau mamoe pihia e levekiaga fakahelehele mo e liuaki mai a lautolu mo e agaga he mahani molu.​—2 Nofoaga he Tau Patuiki 19:6; Gahua 20:28, 29; Kalatia 6:1.d

14. Ko e heigoa ke taute he magaaho ka agahala lahi a ia ne papatiso laia, mo e maeke fefe ke lagomatai a ia?

¹⁴ Ti liga manatu la, he mogoia, kua ha ha he tagata fakailoa ne papatiso laia e lekua mo e inu kava he vaha fakamua mo e liu he falu magaaho ke konahia ke laga taha po ke laga ua. Po ke, kua liga kautu mai a ia he ula tapaka lahi ke he vaha loa ka e kua kaumahala ke he kamatamataaga ke ula fufu ke laga taha po ke laga ua. Pete ni he liogi e matakainaga ha tautolu ke he Atua ma e fakamagaloaga, kua lata ia ia ke kumi e lagomatai he taha motua ke nakai taute e hala ke taute tumau. (Salamo 32:1-5; Iakopo 5:14, 15) He magaaho ka talahau e ia e hehe hana ke he taha he tau motua, kua lata he motua ia ke lali ke liuaki mai a ia ne fou ke he puhala fakaalofa hofihofi noa. (Salamo 130:3) Ko e fakatonutonuaga faka-Tohiaga Tapu ni ka lata ke lagomatai a ia ke fakahakohako aki e tau puhala hana he mole e mena ia. (Heperu 12:12, 13) Ti to fakatutala he motua nei e tau tutuaga mo e leveki he fakapotopotoaga ke fifili ko e lagomatai ha ka lata ke foaki.

15. Ke he falu a tupuaga, ko e heigoa e mena kua lata he magaaho ka agahala e tagata papatiso laia?

¹⁵ Ke he falu a tutupuaga kua lahi atu e mena ke taute. Kaeke kua putoia e talahaua mahani kelea, hagahagakelea ke he fuifui, po ke falu lekua lalahi foki, to kotofa ai he kau he tau motua ua e motua ke kumikumi ke he tuaga ia. Kaeke kua moua he tau motua nei e lahi he lekua nei ke lata mo e komiti fakafili, kua lata ia laua ke hokotaki ai ke he kau he tau motua. Ti kotofa ai he kau he tau motua e komiti fakafili ke lagomatai a ia ne hehe. Kua lata he komiti fakafili ke fehagai mo ia ke he puhala fakaalofa. Kua lata ia lautolu ke lali ke liuaki a ia mo e tau kupu faka-Tohiaga Tapu. Kaeke ke fanogonogo a ia ke he tau laliaga totonu he komiti fakafili, ti he mogoia kua maeke ia lautolu ke fifili ko e fai aoga nakai he nakai he hana a nakai fakaaoga ke fai vala ke he tau lauga he feleveiaaga he Fale he Kautu po ke maeke nakai a ia ke lata ke fakaata ke tali he tau feleveiaaga.

16. Ko e heigoa kua lata ke taute he tau motua ke lagomatai a ia ne hehe?

¹⁶ Kaeke ke fanogonogo a ia ne hehe, kua maeke he taha motua po ke ua he komiti fakafili ke fakatokatoka ke taute e laua e tau ahiaga fakamafana mo e manatu ke fakamalolo e tua hana mo e ati hake e loto fakaaue hana ma e tau fakatufono tututonu he Atua. Liga to fegahuaaki a laua mo ia ke he fekafekauaga he fonua ke he taha magaaho mo e taha magaaho. Liga to taute e laua e falu fakatutalaaga faka-Tohiaga Tapu mo ia, he liga fakaaoga e tau tala i loto he Watchtower mo e Awake! kua lata ka e nakai taute tumau e fakaakoaga Tohi Tapu. Fakalataha mo e leveki fakaalofa pihia, to fakamalolo a ia ne hehe ke totoko ke he tau lolelole he tino he tau aho i mua.

17. Ko e heigoa e tau fakaholoaga ke taute ka nakai tokihala mo e tiaki he tagata papatiso ne mahani kelea e puhala agahala hana?

¹⁷ Kua moli, ha kua papatiso laia nakai ko e mena ke piu ki ai ke nakai tokihala he taute e agahala. (Heperu 10:26, 27; Iuta 4) Kaeke he ha tagata papatiso ne mahani kelea ne nakai tokihala mo e tiaki e puhala agahala hana, to tuku kehe mai a ia he fakapotopotoaga. (1 Korinito 5:6, 11-13; 2 Tesalonia 2:11, 12; 2 Ioane 9-11) He magaaho kua lata ai e tuaga nei, to fifili he tau motua e komiti fakafiliaga. Kaeke ke tupu mai e fakaotiaga, to taute e fakailoaaga ku nei: “Kua tuku ki tua a . . . ”e

Lagomatai a Lautolu ke ‘Hohoko Atu ke he Katoatoaaga’

18. Ko e ha kua iloa moli e tautolu ko e tau Kerisiano papatiso fou laia mo e falu foki ka fakatumau ke ako hagaao ki a Iehova mo e hana finagalo?

¹⁸ To nonofo mau e tokologa he tau fekafekau he Atua he fuifui mamoe. Kua fiafia, foki, a tautolu takitokotaha ke fakatata lahi ke he ha tautolu a Matua he lagi kakano to maeke tumau a tautolu ke ako fakalahi hagaao ki a ia mo e hana a finagalo. (Fakamatalaaga 3:11; Iakopo 4:8) Ko e tau afe ne papatiso he Penetekoso he 33 V.N. ka loga atu e tau mena ke ako. (Gahua 2:5, 37-41; 4:4) Pihia foki e tau Tagata Motu Kehe, ne kua nakai fai talahauaga faka-Tohiaga Tapu. Ke tuga ia, kua moli e mena nei ki a lautolu ne papatiso he mole e lauga ha Paulo he Areopako i Atenai. (Gahua 17:33, 34) He vaha nei foki, kua lahi foki e mena ha lautolu ne papatiso fou ke ako mo e lata ke fai magaaho mo e lagomatai ke fakamalolo aki e fifiliaga ha lautolu ke fakatumau ke taute e mena kua tonu ki mua he Atua.​—Kalatia 6:9; 2 Tesalonia 3:13.

19. Maeke fefe ke lagomatai a lautolu ne o atu ke papatiso ke ‘hohoko atu ke he katoatoaaga’?

¹⁹ Ke he tau tau takitaha kua papatiso ai e tau afe mo e lata ke fai lagomatai ke maeke ia lautolu ke ‘hohoko atu ke he katoatoaaga.’ (Heperu 6:1-3) Ke he kupu, fakafifitakiaga, mo e lagomatai moli ke he fekafekauaga, ka maeke ia koe ke lagomatai a lautolu ke tui e tagata fou mo e ‘fakatumau ke he kupu moli.’ (3 Ioane 4; Kolose 3:9, 10) Kaeke ko e tagata fakailoa iloilo a koe, to uiina he tau motua a koe ke lagomatai a ia ne fou e tua ke he fekafekauaga he fonua po ke fakatutala ke he falu faka-Tohiaga Tapu mo ia ke he falu a fahi tapu ke fakamalolo aki hana a tua ke he Atua, hana a loto fakaaue ma e tau feleveiaaga Kerisiano, mo e falu mena foki. Ko e fakafetuiaga he tau leveki ke he fuifui mamoe kua tuga e matua tane ne tomatoma mo e matua fifine ne mahani molu. (1 Tesalonia 2:7, 8, 11) Ka e, nakai maeke e tau motua mo e tau fekafekau lagomatai gahoa ke leveki e tau mena oti ne kua lata he fakapotopotoaga. Kua tuga e magafaoa a tautolu oti he felagomataiaki. Kua maeke ia tautolu takitokotaha ke taute taha mena ke lagomatai aki e tau katofia tapuaki mo tautolu. Liga, maeke ni ia koe ke foaki e fakamaloloaga, fakamafana atu ki a ia ne tupetupe, mo e lagomatai a ia ne lolelole.​—1 Tesalonia 5:14, 15.

20. Ko e heigoa hau ka taute ke fakapuloa e iloilo ke he Atua mo e ke foaki e leveki fakahelehele ma e tau mamoe he fagaiaga ha Iehova?

²⁰ Kua lata e tau tagata mo e iloilo he Atua, ti ha ko e Fakamoli a Iehova, kua maeke ia koe ke moua e olioli he fakalataha atu ke fakapuloa ai. Kua lata e tau mamoe ha Iehova ke leveki fakahelehele, ti kua maeke ia koe ke taute e matagahua fakaalofa ke lagomatai ke foaki e mena nei. Kia fakamonuina e Iehova hau a fekafekauaga, mo e kia palepale e ia a koe ha ko e hau a lali mai he loto ke lagomatai e tau mamoe he hana a fagaiaga.

[Tau Matahui Tala]

To Tali Fefe a Koe?

◻ Taute fefe e Iehova e tau mamoe hana?

◻ Ko e heigoa ke taute he magaaho ka manako a lautolu ne fou ke fakamatala?

◻ Maeke fefe he tau katofia tali tonu ke lagomatai a lautolu ne fou mo e tau manako pauaki?

◻ Ko e heigoa e tau lagomatai ke foaki age he tau motua ki a lautolu ne hehe ka e kua tokihala?

◻ Maeke fefe ia koe ke lagomatai e tagata papatiso fou ke ‘hoko atu ke he katoatoaaga’?

[Fakatino he lau 14]

Kua talahaua lahi a Charles T. Russell ha ko e leveki fakaalofa he fuifui mamoe

[Fakatino he lau 16]

Taute he tau leveki ne fakaalofa hohofi e fuifui mamoe he Atua mo e fakahelehele