Tutala Mo e Falu ke he Mena Galo he Fiafia he Magafaoa
1 Ko e magafaoa ko e fakaveaga matakautaha he kaufakalatahaaga he tagata, mo e hau he magafaoa e tau maaga, tau taone, tau fahi motu, mo e tau motu katoa. He vaha nei kua pehia lahi e fakalatahaaga he magafaoa kua nakai la pihia fakamua. Kua tupu e tau fakaohoohoaga malolo lahi he fakamatakutaku e kitiaaga he moui magafaoa. Kua fakaaue ha a tautolu ha kua foaki mai e Iehova, ko e Fakatokatoka he fakatokaaga he magafaoa, ki a tautolu e tau fakaakoaga ke maeke ia tautolu ke moua e fiafia he magafaoa! Ko lautolu kua muitua ke he tau takitakiaga hana kua tote hifo e tau mena vihi mo e fua mai e kautuaga he fakalatahaaga he magafaoa. To ha ha ia tautolu e kotofaaga ia Sepetema ke tutala mo e falu ke he tohi Ko e Mena Galo he Fiafia he Magafaoa. Kia fakailoilo he tutala ke he tau tagata ke he tala he moui magafaoa. Kia kapitiga, mauokafua, mo e fakalotomatala. Ko e heigoa ka liga talahau e koe?
2 Kia kamata e koe he fakatu e huhu tuga:
◼ “Kua mailoga nakai e koe kua tokologa he tau magafaoa kua uka ke fakauka ke he tau pehiaaga he moui? [Fakaata ma e tali.] Kua fakakite he tau hokotakiaga kua tokologa e tau tagata kua moua ai e tau mena vihi ke he kaina. Ko e heigoa kua talitonu a koe ke lagomatai e tau magafaoa ke moua e mauokafua mo e fiafia? [Fakaata ma e tali.] Ha kua fakatu he Atua e fakatokaaga he magafaoa, nakai kia mitaki ke kumikumi e tau takitakiaga ne foaki e ia? [Totou 2 Timoteo 3:16, 17.] Ko e fakaakoaga aoga lahi pihia kua tohi mai he tohi nei, Ko e Mena Galo he Fiafia he Magafaoa.” Ti huhu ke he tagata ko e heigoa e manamanatuaga hana ke he mena vihi fa mahani he magafaoa, fakakite e veveheaga kua talahau ai e mena vihi ia, ti foaki e tohi.
3 He liu ahi atu, kia liga moua e koe e foliaga he kamata e fakaakoaga Tohi Tapu he talahau:
◼ “Kua manamanatu au ke he mena ne talahau e koe ke he tala he moui magafaoa, ti kua ta mai e au ma hau taha mena kua manatu au to fiafia a koe ki ai. [Fakakite e porosua Manako, fuluhi ke he lau tohi 16, ti totou e tau huhu ono i luga.] Maaliali ai, kua lata ke igatia e tau tagata he magafaoa ke taute e vala hana ke lafi ke he fiafia he magafaoa. Ka fai minuti gahoa a koe, to fakatata e au e puhala ke moua e koe e aoga lahi mai he vala tala nei.” Ti kamata he fakaakoaga 8.
4 Taha puhala foki ke kamata e fakatutalaaga ko e talahau e mena vihi, liga he talahau:
◼ “Pete e manako e tau tagata oti ke logona e manatu he mauokafua mo e makonaaga, kua tuga ke nakai kautu moli e tokologa he tau magafaoa ke he mena nei. Ko e heigoa ka manatu e koe ke lagomatai a lautolu ke kumi e fiafia moli? [Fakaata ma e tali.] I tuai, ne fakakite he Tohi Tapu e tau mena vihi kehekehe na kua kitia e tautolu he tau magafaoa he vaha nei. [Totou 2 Timoteo 3:1-3.] Pete ia, kua talahau foki he Tohi Tapu ke he tau magafaoa e mena ke taute ke fakamafola aki e tau mena vihi nei mo e ke moua e fiafia tukulagi. Ko e tau matapatu fakaakoaga ne kua fakakite mai he tohi nei, Ko e Mena Galo he Fiafia he Magafaoa.” Ti fakakite e puha fakamanatu he fakahikuaga he veveheaga ia, totou ai, ti foaki e tohi.
5 Ka liu a koe, fakaaoga e porosua “Manako” ke kamata e fakaakoaga. Liga ke talahau e koe:
◼ “Ne nava lahi au ke he mautali hau ke kumikumi e tau matapatu fakaakoaga Tohi Tapu kua hagaao ke he moui magafaoa. Kua fakakite he iloaaga e tau fua mitaki lahi kua moua he muitua ke he fakatonuaga ne moua he Tohi Tapu. Ko e fakamaamaaga mukamuka anei he kakano ne pihia ai.” Totou e paratafa he fakaakoaga 1 he porosua Manako, fakalataha mo e Salamo 1:1-3 po ke Isaia 48:17, 18. Ka fai magaaho, kitekite ke he vala ne toe he fakaakoaga. Tala age to liu mai ke fakaako tokoua e fakaakoaga ne toe.
6 Hagaao ke he Tohi ha Tautolu: He iloa ai kua uho e tau tohi oti ha tautolu mo e lomiaga kua totogi tupe, kua fakauaua kia a koe he foaki e tau mekasini, tau porosua, po ke tau tohi ke he tau tagata ne feleveia mo koe? Iloa moli fefe e tautolu kua nakai foaki e tautolu e tohi ke he tau tagata nakai loto fakaaue? Ko e taha puhala ko e huhu ke he tagata kaeke ke mavehe to totou e ia e tohi kua fakakite e koe.
7 Ka foaki e tohi “Fiafia he Magafaoa,” ma e fakatai, liga ke talahau e koe e mena nei:
◼ “Ka mavehe a koe ke totou e tohi nei, to toka e au mo koe mo e nakai fai totogi. [Fakaata ma e tali.] Liga ke manatu a koe to fahia fefe a tautolu ke taute e mena nei. Ha kua lagomatai he tau mena fakaalofa foaki noa e gahua ha mautolu. Ka manako a koe ke foaki e mena fakaalofa tote ke he gahua ha mautolu, to talia fiafia e au.” Taha e matakainaga tane ne tote e taliaaga ato ua e mena ne hiki e ia. Fakamua, ne lafi e ia e kupu, he talahau: “Ka manako a koe ke foaki e mena fakaalofa he aho nei ke he gahua ha mautolu, to talia fiafia e au.” Taha foki, ne leva e fakamaoki hana ke fakaata e tagata ke tali. Ti mauokafua e logonaaga hana kua fakaaue tuai ke he tohi mo e to totou ai.
8 Kia lali fakamalolo ai ke he mena kua maeke a tautolu he tutala ke he falu hagaao ke he mena galo kua takitaki atu ke he fiafia he magafaoa—he muitua ke he tau fakaakoaga kua fakatoka mai he Kupu he Atua.—Sala. 19:7-10.