Fifitaki e Nakai Fakamailoga Tagata a Iehova
1 Kua tupetupe a Iehova ke he tau tagata. Ne talia fiafia e ia ha tagata ni ne taute hana finagalo. (Gahua 10:34, 35) He fakamatala a Iesu ke he tau tagata, ne fakakite pihia e ia e nakai fakamailoga tagata. (Luka 20:21) Kua lata ia tautolu ke fifitaki ha laua a tau mahani, tuga he taute e Paulo, ne tohi: “Ko e Iki tokotaha he tau tagata oti kana kua lahi ue atu hana fakaalofa kia lautolu oti kana kua ui kia ia.”—Roma 10:12.
2 Ke fakapuloa e tala mitaki he Kautu he Atua ki a lautolu oti ne feleveia mo tautolu kua ta mai e fakahekeaga ke he Atua. Kua lata ia tautolu ke fakatumau ke foaki e fekau homo ue atu mo e falu, pete ni ko e lanu, tuaga, fakaakoaga, po ke tuaga fakatupe ha lautolu. (Roma 10:11-13) Ko e kakano, kua lata ke fakamatala ki a lautolu ka fanogonogo—tau tagata tane, tau fifine, tau tama, mo e tau fuakau. Kua lata ia tautolu ke o atu ke he tau gutuhala oti ke foaki ke he tau tagata takitaha he fale e magaaho ke logona e kupu moli.
3 Kia Fiafia ke he Tau Tagata Oti Kana: Ko e foliaga ha tautolu ke tutala ke he tau tagata oti ka maeke ia tautolu. He tokaloto e mena nei, ne kautu e falu tagata fakailoa he fakamatala ke he tau tagata he tau ofisa ekekafo, tau fale gagao, mo e tau fale leveki. Kua maeke foki he tau tagata fakailoa ke fakamatala ke he tau takitaki leveki mauku, tau leveki mo e tau fakatonutonu he aoga, mo e tau ikifakafili. He feleveia mo e tau tagata gahua fakatufono, kua latatonu ke fakaaue age ki a lautolu ke he tau lagomatai ne foaki ke he maaga. Kia fakalilifu, mo e fifili e tau vala tala kua lata ne fehagai lahi ke he ha lautolu a faga gahua mo e tau mena vihi ne putoia ki ai.
4 He taha magaaho, ne hoko e matakainaga fifine ke tala ke he ikifakafili he ofisa hana. He mole e tututala fakalagalaga, ne talahau e ikifakafili: “Iloa nakai e koe e mena ne loto au ke he Tau Fakamoli a Iehova? Kua moua e lautolu e tau matapatu fakaakoaga kakano mitaki ne nakai o kehe mai a lautolu i ai.” Ne foaki e fakamatala mitaki ke he tagata tokoluga nei.
5 Kua nakai maeke ia tautolu ke totou e tau loto he tau tagata. Pete ia, he tutala mo e tau tagata oti ne feleveia mo tautolu, kua fakakite e tautolu ha tautolu a tua ke he malolo he Atua ke takitaki e gahua ha tautolu. Ke lafi ki ai, kua foaki he mena nei ke he tau tagata e monuina ke logona mo e talia e fekau he amaamanakiaga. (1 Timo. 2:3, 4) Kia fakaaoga fakapulotu e tautolu e tau magaaho ha tautolu mo e ukufakina ke fifitaki e nakai fakamailoga tagata a Iehova he hokotia atu ke he tau tagata oti kana mo e tala mitaki ka maeke ia tautolu.—Roma 2:11; Efe 5:1, 2.