Aoga Fekafekau Fakateokarasi he 2000
1 Moli ni ko e fakamonuinaaga uho e Aoga Fekafekau Fakateokarasi ke he tau tagata a Iehova. Ke he tau tau 50 ne mole, kua miliona e tau tagata kua lagomatai ke fakalaulahi e tau malolo ha lautolu mo tau tagata fakamatala mo e tau faiaoga he kupu moli he Tohi Tapu. (Sala. 145:10-12; Mata. 28:19, 20) Kua kitia nakai e koe e puhala he aoga ne lagomatai aki a koe? To fakamahomo atu pihia ke he tau 2000 kaeke ke fakalataha katoatoa a koe mo e fakaaoga e tau fakatonuaga ne kua foaki i ai.
2 Tau fakaakoaga hagaao ke he tau kotofaaga mo e tau tohi ka fakaaoga i ai kua fakatokatoka ke he lau fakamua he setulu aoga he 2000. Ko e tau magaaho ne fafati ma e tau vala takitaha, ko e mena ne matapatu ki ai, ko e puhala ke fofola atu e lauga, mo e falu a tau matafeiga foki kua kikite i ai. Fakamolemole fakaaoga e magaaho ke totou fakatekiteki e tau fakaakoaga ti taute fakalata ai.
3 Totouaga Fakafahitapu he Tohi Tapu: Ha i ai ua e fakaholoaga kehekehe he totouaga fakafahitapu he Tohi Tapu ne fakatoka ke he setulu aoga. Taha e fakaholoaga pauaki ne foaki ke lima e lau he Tohi Tapu. Ko e tau matafeiga ke he Tohi Tapu kua fakave ke he totouaga nei. Ka e taha fakaholoaga he totouaga ne lafi ki luga kua fakalahi atu e vala ia. He muitua a koe ke he fakaholoaga nei, to maeke ia koe ke totou katoa e Tohi Tapu he tolu e tau. Kua mafola kaeke manako e taha ke fakalahi atu e totouaga ha lautolu mai he setulu he fakaholoaga lafi ki luga, mo e falu ka liga ai maeke ke mumuitua ki ai. Aua fakatatai atu ke he taha foki, ka e hulahula ke he mena kua maeke ia koe ke fakamoli. (Kala. 6:4) Ko e mena mua atu a ia ke totou e Kupu he Atua he tau aho oti.—Sala. 1:1-3.
4 Ke hu he Aoga Fekafekau Fakateokarasi, lata ia koe ke tutala ke he leveki aoga. Fakamolemole, taute e kotofaaga hau ko e mena uho lahi, ti ua auhia fakateao noa. Fakaaue ke he aoga ha ko e foakiaga a Iehova. Tauteute fakamitaki, kia makaukau mo e fakamahani fakalahi ke he vala ne kua kotofa, ti foaki e tala mai he loto hau, ko e mena ia ka aoga katoa ai mai he aoga fulufuluola nai.