Ko e Monuina a Iehova ke Mauokafua Ai a Tautolu
1 Ko e kautu he tagata ne fa fuafua ai ke he lahi he hana a totogi. Ko e kakano haia ne tokologa e tau tagata ne onoono ki a lautolu ne muhu tupe kua fiafia lahi mo e makona. Pete ia, ko e tau tagata ne logona hifo kua maeke he tupe ke fakatau e fiafia nukua hehe lahi. (Fakama. 5:12) Nakai fai olioli tukulagi ma lautolu ne “manako ke maukoloa” he puhala fakatino. (1 Timo. 6:9) Kehe lahi, kua fiafia moli e tau fekafekau ha Iehova mo e ko e tau tagata monuina lahi he lalolagi. (Fakatai 10:22; Fakakite. 2:9) Pihia fefe?
2 Tau Fakamoliaga he Tau Monuina ha Tautolu: Moua e tautolu e lotomatala fakaagaga monuina mo e maama he Kupu he Atua, ko e Tohi Tapu. Puhala mai he fakatokatokaaga hana he lalolagi, ne fakaako tumau e Iehova a tautolu hagaao ki a ia mo e hana Tama, ko e aoga tukulagi ma tautolu. Ko e maama tonutika kua maeke ia tautolu ke fakatata ki a Iehova mo e fiafia e fakafetuiaga tata mo ia. (Iako. 4:8) Ke mailoga e mitaki mai he kelea mo e muitua ke he tau fakatufono he Atua ka puipui a tautolu mai he falu gagao mo e tau hagahaga kelea. Haia tautolu e mauokafua to foaki e Iehova ma tautolu, ati fua mai e makona mahani Atua mo e mafola he manamanatuaga.—Mata. 6:33.
3 Kua fiafia e tautolu e mafola mo e kaufakalataha he tau matakainaga fakaagaga ha tautolu ha kua feaki e tautolu e tau fua he agaga he Atua. Fakalataha ai he pipiaga malolo he fakaalofa, kia nakai lata ia tautolu ke logona kua tiaki tuai he Atua po ke he tau matakainaga ha tautolu ka fehagai a tautolu mo e matematekelea.—Kala. 6:10.
4 Fai kakano moli e tau momoui ha tautolu. Ko e kotofaaga mua ue atu a ia ma tautolu ke fakamatala e tala mitaki he lalolagi katoa. Ta mai he mena nei e olioli tukulagi he lagomatai e tautolu falu ke o mai ke he fakafetuiaga mitaki mo e Atua mo e fekafekau fakalataha mo tautolu he tapuakiaga mea. Ko e tanakiaga mua ue atu ha tautolu he fekafekauaga kua ta mai e fakalilifuaga ki a Iehova mo e foaki mai ki a tautolu e makona he lafi atu ke he fakatokolugaaga he hana higoa. Kua fakatumau e tautolu e aga manamanatu mitaki, he iloa ko e amaamanakiaga ha tautolu ma e anoiha to nakai leva ti mailoga ai.
5 Fakakite e Loto Fakaaue ha Tautolu: Kia loto fakaaue tumau a tautolu ke he tau fakamonuinaaga a Iehova, nukua taute moli a tautolu mo tau tagata monuina lahi he lalolagi. (Fakatai 22:4) Kia fai magaaho he tau aho takitaha ke manamanatu fakahokulo ke he tau mena kua omoi a tautolu ke fakaaue ki a Iehova ma e hana fakaalofa fakamokoi mo e ke fakatumau ke foaki ki a ia e tapuakiaga katoatoa.