Ko e Kaitalofa ha Tautolu ke he Falu
1 Ne logona he aposetolo ko Paulo e matagahua ke fakamatala ke he tau tagata. Ne iloa e ia kua taute e Iehova ke maeke he tau tagata oti kana ke fakamoui ke he puhala he toto uho he Tama Hana. (1 Timo. 2:3-6) Ko e mena ia, ne talahau e Paulo: “Ha ha ia au e tau mena he tau tagata Heleni katoa mo e tau tagata kehe, ko e tau iloilo katoa mo e tau goagoa.” Ne gahua fakamakutu mo e nakai mategugu a ia ke totogi hana kaitalofa ke he tau tagata hana he folafola e tala mitaki ki a lautolu.—Roma 1:14, 15.
2 Tuga a Paulo, ne tutuli e tau Kerisiano he vaha nei ke folafola e tala mitaki ke he tau katofia he tau magaaho oti. Hane hoko mafiti mai e ‘matematekelea lahi,’ ko e kumi ha tautolu ki a lautolu ne loto fakamoli kua aoga lahi. Kia omoomoi he fakaalofa moli ke he tau tagata a tautolu ke fakailoilo he gahua fakahao moui nei.—Mata. 24:21; Eseki. 33:8.
3 Totogi e Kaitalofa ha Tautolu: Ko e matapatu puhala ke hokotia a tautolu ke he tau tagata ko e fakamatala he taha gutuhala ke he taha gutuhala. He tau matakavi kua tokologa ne nakai moua ha tagata he kaina, ko e fakamau fakahako tumau mo e liu atu he tau magaaho kehe ka maeke ia tautolu ke tutala mo e tokologa he tau tagata. (1 Kori. 10:33) Maeke foki ia tautolu ke hokotia ke he tau tagata takitaha he fakamatala ke he tau matakavi pisinisi, he tau puhala tu, he tau paaka, he tau tuaga motoka, mo e he telefoni. Kia huhu hifo ki a tautolu, ‘Kua katoatoa nakai e mena ne taute e au ke kumi e tau puhala kehekehe he fakamatala ke maeke ke talahau e fekau he moui?’—Mata. 10:11.
4 Taha e paionia ne ha ha ai e fakalagoaga makai ke hokotia ke he tau tagata oti he matakavi hana. He taha kaina, ne papa tumau e tau pa fakamaama he fale ti nakai fai tagata tumau i kaina. Pete ia, taha aho ne nakai ha ha ai e paionia he fekafekauaga, ne mailoga e ia e motoka he fahi mua he kaina hana ne nakai moua. He fakaaoga e magaaho ia, ne fakatagi e ia e logo he gutuhala. Ne tali he tagata tane, ti takitaki atu e fakatutalaaga fakamua ia ke he tau liu ahi atu loga he matakainaga fifine mo e tane hana. Nakai leva, ne talia he tagata tane e fakaakoaga Tohi Tapu, ti ko e matakainaga tane papatiso a ia mogonei. Ne fakaaue a ia ke he matakainaga fifine nei he logona e fakalagoaga ke fakamatala ke he falu.
5 He mafiti mai e fakaotiaga, ko e magaaho anei ke totogi e kaitalofa ha tautolu ke he tau tagata he eketaha fakamalolo a tautolu he gahua fakamatala.—2 Kori. 6:1, 2.