Fakakite e Fiafia Fakatagata—He Mautauteute
1 Kua lagomatai he mautauteute mitaki ma e fekafekauaga a tautolu ke fakakite e fiafia fakatagata ke he falu. Pihia fēfē? Ka mautauteute mitaki a tautolu, kua nakai lavelave lahi a tautolu he fakataitaiaga ti maeke ke hagaaki fakalahi ke he tagata he kaina. Lafi ki ai, kua lagomatai a tautolu ke fahia mai he vivivivi ti fakaatā a tautolu ke tutala mai he loto. Ti maeke fēfē mogoia ke tauteute e tautolu e fakataitaiaga lauia mitaki?
2 Fakaaoga e Fakataitaiaga ne Latatonu: Fifili mai he Ha Tautolu a Fekafekauaga he Kautu ia Ianuari 2006 taha he tau fakataitaiaga ne foaki kua lata mo e fonua ha mutolu, ti manamanatu ke he puhala ke tuku ke he tau kupu ni haau. Hikihiki ke he fonua ha mutolu. Ma e fakatai, ka liga feleveia a koe mo e tau tagata he falu lotu po ke falu motu, manamanatu ke he puhala kua maeke he fakataitaiaga haau ke hokotia ki a lautolu. He hikihiki e fakafeleveia haau ke he tau tagata takitaha ne tutala a koe ki ai kua fakaata ai e fiafia mooli ki a lautolu.—1 Kori. 9:22.
3 He kamata a koe ke fakaaoga e fakataitaiaga, fakatumau ke hakahaka ai. Ha kua aoga lahi e tau kupu hafagi, mailoga e puhala ne tali he tau tagata e fakafeleveiaaga haau. Kua fiafia nakai a lautolu ke he matakupu? Kua fai tali nakai ke he tau hūhū ne fakalagā e koe? Ka nakai, kia hikihiki ato moua e koe e fakafeleveiaaga kua lauia mitaki.
4 Tau Lagomataiaga Fakamanatu: Kua uka ke he tokologa ke manatu e fakataitaiaga ka eke ko lautolu he gutuhala. Ka pihia a koe, kua lali nakai a koe ke fai magaaho ke fakamahani ke talahau fakaleo lahi e fakataitaiaga haau ke he taha tagata? Maeke he mena nei ke kitia maali e tau manatu haau ke he manamanatuaga ti talahau ai ke he puhala mukamuka, mo e fakapapahi. Maeke foki ke tauteute a koe ke iloa e tau tali kehekehe ka felauaki mo koe.
5 Ko e taha lagomataiaga fakamanatu ko e tohi e fakatōtōaga kū he fakataitaiaga ke he laupepa tote ti kikite ki ai ato hoko atu ke he gutuhala. Falu ne moua kua lagomatai he fakamanatuaga kū nei a lautolu ke fakatotoka mitaki ti maeke foki ke tutala fakamitaki mo e tau tagata. He tau puhala nei, kua lagomatai he mauteute mitaki a tautolu ke fakakite e fiafia fakatagata ke he falu ti maeke ke fakatolomaki ha tautolu a fakataitaiaga ke he tala mitaki.