Taute e Tau Puhala ke Fakamatala
1 Ko e fakapotopotoaga Kerisiano kua moua mai he tau tagata ne kehekehe e tau tutuaga. Ka e, kua kaufakalataha a tautolu ke fakamalolō ke fakaheke a Iehova. (Sala. 79:13) Ka kelea e malolō tino po ke falu tutuaga uka ne fakakaupa a tautolu ke fakapuloa e tala mitaki, maeke fēfē ia tautolu ke taute e tau puhala ke fakamatala?
2 He Tau Gahua he Tau Aho Takitaha: Ne fakaaoga tumau e Iesu e fakafehagaiaga haana mo e tau tagata he tau aho takitaha ke foaki e fakamatala. Ne tutala a ia ki a Mataio he fano i mua he ofisa tukuhau, ki a Sakaio he fano fenoga, mo e ke he fifine Samaria he okioki. (Mata. 9:9; Luka 19:1-5; Ioane 4:6-10) He tau matagahua ha tautolu he tau aho takitaha, maeke foki ia tautolu ke fuluhi e fakatutala fa mahani ke he fakamatala. He tata mai e Tohi Tapu, fakalataha mo e tau tuleke po ke tau porosua, ka fakamalolō a tautolu ke mautali ke tutala hagaao ke he amaamanakiaga ha tautolu.—1 Pete. 3:15.
3 Kua fakakaupa kia he matulituli haau a koe ke fakalataha ke he gahua he taha fale ke he taha fale? Kia mataala ke he tau puhala ke fakamatala ke he kau gahua fakaekekafo mo e falu ka o atu ki a koe. (Gahua 28:30, 31) Ka taofi tumau he tau tutuaga a koe ki kaina, kua lali nakai a koe ke fakamatala ke he telefoni po ke tohitohi? Taha e matakainaga fifine ne tohi tumau ke he tau magafaoa nakai ko e Fakamoli. Ne tohi foki e ia e tau manatu atihake mai he Tohi Tapu mo e tau mena tutupu haana he magahala ne fakamatala.
4 He Gahuaaga po ke Aoga: Ko e ha tautolu a manako ke fakaheke a Iehova ka omoi foki a tautolu ke taute e tau puhala ke to e tau tega he kupu mooli he gahuaaga po ke aoga. Ko e tagata fakailoa ne valu e tau he moui ne folafola ke he vahega haana e mena ne totou e ia he Awake! hagaao ke he fua mahina. He mole e moua ko e iloa mai e ia i fe, ne kamata agataha e faiaoga haana ke talia Ko e Kolo Toko mo e Awake! ke he tau magaaho oti. He gahuaaga, ko e toka tumau he lagaki he tohi Fakaako he Tohi Tapu he mena ke kitia he falu ka liga mafiti ke hūhū ti takitaki atu ke he fakamatala.
5 Maeke nakai a koe ke manamanatu ke he tau faahi ke taute e tau puhala ke fakamatala he tau matagahua ke he tau aho takitaha? He fakaaoga fakamitaki e tau tutuaga ha tautolu, kia eketaha a tautolu he tau aho takitaha ke “uta mau . . . e poa fakaheke ke he Atua.”—Hepe. 13:15.