Lagomatai e Tau Tagata Fakaako Tohi Tapu ke Eke mo Tau Tagata Fakailoa he Tala Mitaki he Kautu
1 Ko e poakiaga ne fakatoka e Iesu ke he tau tutaki haana ne fakakite ia Mataio 28:19, 20 kua laulahi mooli. Ne tala age ke he tau tutaki he Keriso ke taute fakaloga atu foki e tau tutaki, to fakahiku ke matutaki e gahua taute tutaki. To taute e fakavēaga ma e fakapuloaaga fakahiku he lalolagi katoa ke he tala mitaki he Kautu he Atua he magaaho uho lahi he fakaotiaga, nukua momoui ai a tautolu mogonei.—Mata. 24:14.
2 Liga ko e tau tagata fakaako Tohi Tapu ha tautolu ko e fanau ni ha tautolu po ke falu hane fiafia ke fakaako e Tohi Tapu mo tautolu. Kua manako mooli a tautolu ke lagomatai a lautolu ia ke talia e matagahua nei ke lagomatai e falu ke eke mo tau tutaki ha Iesu Keriso.—Luka 6:40.
3 Tauteute a Lautolu ke Iloa ke Fakamatala: Fakamafana a lautolu ne fakaako mo koe ke tutala ke he falu mena hane ako e ia. Tala age ki a lautolu e tau tala atihake ke he gahua he fonua. Fakamahani e tau tama haau mai he ikiiki ke fakalataha ke he fekafekauaga he puhala fua mitaki hagaao ke he lotomatala ha lautolu. (Sala. 148:12, 13) He fakakite ke he tau kupu mo e fakafifitakiaga kua loto fakaaue a koe ke he fekafekauaga.—1 Timo. 1:12.
4 Na fakaaoga ni e Iehova a lautolu ne talia mo e omaoma e tau tutūaga tututonu haana. Mooli, kua nakai lahi mahaki e iloaaga he tau tagata fakailoa foou ke tuga e tau fekafekau papatiso tukulele, ne makutu he Kautu, ka kua lata ia lautolu ne foou ke talitonu mo e maeke ke fakamaama e tau matapatu fakaakoaga he Tohi Tapu. (Kikite Organized, lau 79-82.) He vevehe kehe katoatoa a lautolu mai i ‘Papelonia Lahi’ mo e tau putoiaaga politika, kua lata ia lautolu ke fakalataha tumau ke he tau feleveiaaga he fakapotopotoaga.—Fakakite. 18:4; Ioane 17:16; Hepe. 10:24, 25.
5 Ka maeke ia koe ke talitonu kua lata e taha he tau tagata fakaako Tohi Tapu haau ke eke mo tagata fakailoa nakaila papatiso, kua lata ke fakailoa atu e mena nei ke he leveki fakapotopotoaga. To fakatoka e ia ke tokoua e motua ke feleveia mo koe mo e tagata fakaako Tohi Tapu haau ke fifili kua lata nakai a ia ke eke mo tagata fakailoa nakaila papatiso he tala mitaki he Kautu fakalataha mo e fakapotopotoaga. Ko e kotofaaga mitaki haau a ia mogoia ke fakalaulahi e fakamahani he tagata fakaako Tohi Tapu haau he fakatauō a ia mo koe ke he gahua he fonua.