Ko e Heigoa ne Ako he Falu Mai he Kitekite Ki a Koe?
1. Ko e heigoa ne ako mai he tau tutaki ha Iesu he kitekite ki a ia?
1 Pehē a Iesu: ‘Kia hahamo e lakau hahamo haku, mo e ako mai ia au.’ (Mata. 11:29) Maaliali ai, ne fakaako e ia e falu he fakatoka e fakafifitakiaga mitaki, nakai ni ke he tau kupu haana. Manamanatu ke he mena ne ako mai he tau tutaki he kitekite ki a Iesu. Kua mahani totonu, mahani molū, mo e loto fakaalofa a ia. (Mata. 8:1-3; Mare. 6:30-34) Ne mahani fakatokolalo mooli a ia. (Ioane 13:2-5) He fakalataha a lautolu mo Iesu ke he gahua he fonua, ne kitia he tau tutaki ko e tagata gahua malolō a ia ti lauia mitaki e fakaako atu haana he kupu mooli ke he falu. (Luka 8:1; 21:37, 38) Lauia fēfē e falu he kitekite ki a tautolu he gahua he fonua?
2. Lauia mitaki fēfē e tau tagata he kaina ke he tauteuteaga mitaki ha tautolu?
2 Tau Tagata he Kaina: Ko e ha tautolu a tau tapulu kua lilifu, tau mahani mitaki, mo e fiafia mooli ke he tau tagata ka lauia lahi e tau tagata he kaina. (2 Kori. 6:3; Filipi 1:27) Ne mailoga e lautolu kua fakaaoga tumau e tautolu e Tohi Tapu. Nava e falu ha kua fanogonogo fakalilifu e tautolu a lautolu ka tutala. Ua fakateaga e puhala he fakatoka e fakafifitakiaga mitaki he tau faahi nei ka futiaki e tau tagata ke he fekau he Kautu.
3. Ko e heigoa e lauiaaga mitaki ka moua he tau matakainaga ha tautolu mai ia tautolu?
3 Tau Matakainaga ha Tautolu: Manamanatu foki ke he lauiaaga mitaki ka moua he tau matakainaga ha tautolu. Kua pikitia e fakamakutu ha tautolu ke he gahua he fonua. He fakamata e lapatoa ke he lapatoa, ko e fakatātāaga tauteute mitaki ha tautolu kua omoomoi e falu ke fakaholo ki mua e tau puhala fakamatala ha lautolu. (Fakatai 27:17) Ko e makai ha tautolu he fakamau hifo fakahako a lautolu ne fakakite e fiafia ti liliu fakamafiti atu ki ai ka lagomatai e falu ke taute pihia. To fakalagalaga fakamitaki e tautolu e falu matakainaga he fakakatoatoa ni ha tautolu a feua.—2 Timo. 4:5.
4. Ko e ha kua lata ia tautolu ke fokifoki tumau e fakafifitakiaga ha tautolu?
4 Ko e ha he liu fokifoki tumau e tau mena ne taute mo e vagahau e koe ti ko e puhala fe ne lauia e falu mai he fakafifitakiaga haau? To fakafiafia he fakafifitakiaga ha tautolu a Iehova ti fakamalolō a tautolu ke taogo atu e tau manatu he aposetolo ko Paulo he fakailoa e ia: “Kia fifitaki mai a mutolu kia au, tuga na au kia Keriso.”—1 Kori. 11:1.