Veveheaga 3

Kua Fanau Mai a Ia ka Tauteute e Puhala

KUA teitei fanau e tama ha Elisapeta. Ke he tolu e mahina he mole, ne nofo ai a Maria mo ia. Ka ko e magaaho nei kua hoko mai e magaaho ke mavehe a Maria mo e finatu a ia he hala loa ki kaina i Nasareta. Liga ke he ono e mahina i mua to fanau foki a ia.

Ne nakai leva he fano a Maria, ti fanau a Elisapeta. Ne lahi e fiafia he monuina e fanauaga ti malolo a Elisapeta mo e tama! Ko e magaaho ne fakakite e Elisapeta e tama tote ke he hana a tau katofia mo e tau magafaoa, ne fiafia auloa a lautolu.

Ko e aho ke valu aki he mole atu e aho ne fanau ai, ke lata mo e Fakatufono he Atua, ko e tama tane i Isaraela kua lata ke peritome. Ke he tauteaga nei ne ahi mai e tau kapitiga mo e magafaoa. Ne pehe a lautolu ke fakahigoa e tama aki hana matua tane, ko Sakaria. Ka e vagahau hake a Elisapeta. “Aua ia,” he talahau e ia, “ka e ui ni a ia, ko Ioane.” Manatu, ko e higoa haia ne talahau he agelu ko Kaperielu kua lata ke fakahigoa aki e tama.

Ka e taha e mena ne totoko e tau kapitiga ha laua: “Nakai fai tagata he hau a faoa kua ui ke he higoa ia.” Ko e magaaho ia, ne vagahau mo e tau lima, ne huhu a lautolu ke he matua tane ko hai e higoa ne manako a ia ke fakahigoa aki e tama tane. Ne ole a Sakaria ke he lapa maka, ti ofomate a lautolu oti he tohi: “Ko Ioane hana higoa.”

Ko e mena ia, ne liu a Sakaria vagahau ha ko e malolo mana. Na manatu e koe na kuhukuhu a ia he nakai talitonu ke he fakailoaaga he agelu ke fai tama a Elisapeta. Ko e magaaho ne vagahau ai a Sakaria, ne ofo oti a lautolu ko e tau katofia mo e pehe hifo ki a lautolu ni: “Po ke eke fefe e tama nai?”

Ne puke a Sakaria he agaga tapu mo e hula a ia: “Fakaaue a ki a Iehova ko e Atua a Isaraela, nukua ahi mai a ia, mo e lukutoto hana tau tagata, ti fakatupu e ia e hoe he fakamouiaga ma tautolu ke he faoa a Tavita hana fekafekau.” Ko e “hoe [nei] he fakamouiaga,” ko ia moli ni, ko e Iki ko Iesu, ne nakai la fanau mai. Kua puhala mai ia ia, ti pehe a Sakaria, ko e Atua ka “foaki mai kia tautolu kia laveaki mai he tau lima ha lautolu ne fai fi mai, ti nakai matakutaku a tautolu, ka e fekafekau a tautolu kia ia, mo e fakatapu mo e tututonu ki mua hana ke he tau aho oti he mouiaga ha tautolu.”

Ko e magaaho ia ne talahau tuai e Sakaria hagaao ke he hana tama ko Ioane: “Ko koe foki ma tama na e, to talahaua a koe, ko e perofeta hana ne Mua Ue Atu, ha ko e mena mua atu a koe ki mua a Iehova, ke tauteute e tau puhala hana; ke fakailoa atu e fakamouiaga ke he hana tau tagata, ke he fakamagaloaga he tau hala ha lautolu. Ha ko e fakaalofa hofihofi noa he Atua ha tautolu, kua ahi mai ai a tautolu he maama mai luga. Ke fakamaama aki a lautolu kua nonofo ke he pouli mo e ata he mate, ke takitaki ha tautolu a tau hui ke he hala he mafola.”

Ka ko e magaaho nei ko Maria, ko e fifine nakai la fai tane, kua hoko atu ki kaina i Nasareta. Ko e heigoa la ka tupu ki a ia ke he magaaho ka kitia ai hana a fatu? Luka 1:​56-80; Levitika 12:​2, 3.

▪ Motua fefe a Ioane mai ia Iesu?

▪ Ko e heigoa e tau mena tutupu he tu e valu aho ha Ioane he fanau?

▪ Ahi mai fefe e Atua ke he hana tau tagata?

▪ Ko e heigoa e gahua ne talahau tuai ke taute e Ioane?