Fakaaoga he Tau Magaaho Oti
1. Ko e tuleke Iloa e Kupu Mooli kua aoga ke taute aki e heigoa?
1 Ko e tuleke Manako Nakai a Koe ke Iloa e Kupu Mooli? kua talaga ke lagomatai a tautolu ke kamata e tau fakaako Tohi Tapu. Ka ko e taha kanavaakau mitaki lahi foki ke fakaaoga e tautolu ke gana aki e tau tega he kupu mooli. (Fakama. 11:6) Hanei falu a manatu ke lagomatai a tautolu ke fakaaoga fakamitaki ai.
2. Fakaaoga fēfē e tautolu e tuleke ke kamata aki e tau fakatutalaaga?
2 Ke Kamata e Fakatutalaaga: Ka foaki e koe e tuleke ke he tagata he kaina, tuhi ke he tau hūhū ono i mua, ti hūhū: “Ha e fe mai he tau hūhū nei kua manamanatu a koe ki ai?” Ka moua haana tali, kitekite mai he tuleke e tali he Tohi Tapu ke he taha hūhū he tagata he kaina ti totou taha kupu ne tū ai. Totou po ke fakatotō e lau i tua, ti foaki e tohi Fakaako he Tohi Tapu. Pete ni ka nakai talia e ia e tohi, kua moua tuai e ia e tuleke, ka fakalagalaga e kupu mooli ke fai vaka ke he haana loto.—Mata. 13:23.
3. Ka lavelave e tagata he kaina ko e heigoa ka liga taute e tautolu?
3 Ka Lavelave e Tagata he Kaina: Liga pehē a koe: “Ha kua vihivihi e magaaho nei, manako au ke toka e tuleke nei ma haau. Kua tohi i ai ono e matapatu hūhū kua fitā he hūhū he laulahi ia tautolu, ti foaki mai fakatonu e tali ke he tau hūhū takitaha, he Tohi Tapu. Ka liu a taua ke feleveia, manako au ke iloa e manatu haau.”
4. Ko e heigoa ka talahau e tautolu he foaki e tuleke ka gahua he puhalatū?
4 Ka Gahua he Puhalatū: Liga pehē a koe: “Fakaalofa atu. Kua hūhū nakai e koe e taha he tau hūhū nei? [Fakaatā ma e tali.] Kua fakakite mai he mena nei e tau tali kua mahino mo e makona kua moua i loto he Tohi Tapu.” Ka nakai fakatepetepe e tagata, liga maeke a koe ke fakatutala ke he taha tali mai he tuleke ti foaki foki e tohi Fakaako he Tohi Tapu.
5. Fakaaoga fēfē e tautolu e tuleke he falu magaaho he tau kaina ai fai tagata?
5 Kaina Ai Fai Tagata: He falu matakavi, fa mahani e tau tagata fakailoa ke toka fakagalo e tau tohi he tau kaina ai fai tagata. Kaeke ko e mahani a ia he fakapotopotoaga haau, ko e ha he nakai toka e tuleke Iloa e Kupu Mooli he falu magaaho? Ka liu atu, maeke ia koe ke pehē: “Magaaho kua mole ne o mai a mautolu, nakai nofo a koe i kaina, ti toka e mautolu e tuleke nei he gutuhala haau. Ko e hūhū fe he tau hūhū nei ne manako a koe ke moua e tali?”
6. Ko e heigoa kua eke e tuleke Iloa e Kupu Mooli mo kanavaakau mitaki lahi he fakamatala?
6 Ko e tuleke Iloa e Kupu Mooli kua fakakite mai e kupu mooli ke he puhala mukamuka mo e hako tonu. Kua fai kakano ki a lautolu he tau lotu oti mo e tau aga fakamotu kehekehe. Mukamuka lahi ke foaki; ti maeke foki he tau fanau mo e tau tagata fakailoa foou ke foaki. Kua fakaaoga nakai e koe he tau magaaho oti kua lata?