Veveheaga 26

Liliu ki Kaina i Kapanaumi

KE HOKO ke he magaaho nei, ko e talahaua ha Iesu kua holofa atu mamao mo e laulahi, mo e tokologa e tau tagata ne fenoga ke he tau matakavi ne nakai fa mahani mau ke he mena ne nofo ai a ia. He mole e falu aho, ne liu a ia ki Kapanaumi puhala atu he Tahi i Kalilaia. Ne mafiti e tuogo e tala ke he maga ko ia kua liu ki kaina, mo e tokologa ne o mai ke he fale ne nofo ai a ia. Ko e tau Farasaio mo e tau akoako Fakatufono ne o mai mamao falu i Ierusalema.

Ne lahi mahaki e moto tagata ti apitia e gutuhala, ti nakai fai ava ke hu atu taha ki fale. Kua mau e fuga lapa taute tala ke fakahoko moli e taha mena ofoofogia. Ko e mena ne tupu he magaaho nei kua aoga lahi, ha kua lagomatai a tautolu ke fakaaue kua ha ha ia Iesu e malolo ke utakehe e kamataaga he mamahi he tagata mo e liu fakamalolo a lautolu oti ne fifili e ia.

Ha ne fae fakaako a Iesu he moto tagata, ne toko fa e tagata tane ne ta mai ke he fale e tagata pareluti he mohega. Ne manako a lautolu ke fakamalolo e Iesu ha lautolu a kapitiga, ka kua apiapi he moto tagata, ne nakai maeke a lautolu ke huhu ki fale. Ko e fakaatukehe ha a ia! Ka e nakai liliu tua a lautolu. Ne toli hake a lautolu ke he tua fale, fakapu, mo e tuku hifo e mohega mo e tagata pareluti i ai ke he tapa ha Iesu.

Ita kia a Iesu he fakatauhele? Nakai! Ne ofo lahi a ia ke he tua ha lautolu. Ne pehe a ia ke he tagata pareluti: “Kua fakamagalo tuai hau a tau hala.” Maeke kia a Iesu ke fakamagalo moli e tau hala? Ne nakai manatu e tau tohikupu mo e tau Farasaio ko e maeke. Ne manamanatu a lautolu ke he ha lautolu a tau loto: “Ko e ha ne vagahau kelea ai pihia e tagata nai ke he Atua? Kua maeke ia hai ke fakamagalo e tau hala, ka ko e Atua ni hokoia?”

Ne fioia ha lautolu a tau manamanatuaga, ti pehe a Iesu ki a lautolu: “Ko heigoa e mena kua manamanatu ai pihia ke he tau loto ha mutolu? Po ke mena fe ne maeke vave? ke pehe ke he tagata pareluti, Kua fakamagalo tuai hau a tau hala; po ke pehe, Ati matike a, ti uta hau a mohega ti fano?”

Ko e magaaho ia, ne fakaata e Iesu e moto tagata, fakalataha mo e hana tau fakafili, ke kitia e fakatataaga ofoofogia ke fakakite kua ha ha ia ia e pule ke fakamagalo e tau hala he lalolagi mo e ko ia moli ko e tagata mua ue atu tali mai i tuai ne moui. Ne fuluhi a ia ke he tagata pareluti mo e poaki: “Ati matike a, ti uta hau a mohega, ti fano ke he hau a fale.” Ne taute pihia ni fakamafiti mogoia, laka hui ki fafo mo e hana mohega ki mua ha lautolu oti! Ha ko e ofomate ne fakaheke e tau tagata ke he Atua mo e kalaga: “Ko e kitia la nai e tautolu ha mena pihia.”!

Mailoga nakai e koe ne talahau e Iesu ko e tau hala ne matutaki mai e tau gagao mo e fakamagaloaga he tau hala ke moua e tino malolo? Ne fakamaama he Tohi Tapu ko e ha tautolu a matua uluaki ko Atamu, ne hala ti ko tautolu ne moua e tau fua he hala ia, ko e tau gagao mo e mate. Ka ko e i lalo hifo he Kautu he Atua, to fakamagalo e Iesu e tau hala ha lautolu oti ka fakaalofa ke he Atua mo e fekafekau ki a Ia, to utakehe oti e tau gagao. Ko e fulufuluola ha a ia ka pihia! Mareko 2:1-12; Luka 5:​17-26; Mataio 9:​1-8; Roma 5:​12, 17-19.

▪ Ko e heigoa e tuaga he matakavi ne hoko moli e mena tupu ofoofogia?

▪ Hoko fefe e tagata pareluti ki a Iesu?

▪ Ko e ha ne hala oti a tautolu, ka e fakakite fefe e Iesu e amaamanakiaga he fakamagaloaga he tau hala ha tautolu mo e maeke ke malolo katoatoa e tau tino?